ନୂଆଦିଲ୍ଲୀ: ଭାରତର ଜବରଦସ୍ତ ପ୍ରଶଂସା କଲେ ନେପାଳର ବୈଦେଶିକ ମନ୍ତ୍ରୀ ନାରାୟଣ ପ୍ରକାଶ ସଉଦ । ସେ କହିଛନ୍ତି ଯେ ନେପାଳ ଭାରତ ପରି ପଡ଼ୋଶୀ ପାଇଥିବାରୁ ନିଜକୁ ସୌଭାଗ୍ୟ ମନେ କରୁଛି, ଯିଏ ହିମାଳୟ ରାଷ୍ଟ୍ର ତଥା ଏହାର ଲୋକଙ୍କ ବିକାଶରେ ସହଯୋଗ କରିଛି । ବୈଦେଶିକ ବ୍ୟାପାର ମନ୍ତ୍ରୀ ପୂର୍ବ ନେପାଳରେ ନିର୍ମିତ ହିମାଳୟ କିରଣ ପବ୍ଲିକ କ୍ୟାମ୍ପସର ଏକ ନୂତନ କୋଠା ଉଦଘାଟନ କରିଥିଲେ । ଏହି ସମୟରେ ଭାରତର ରାଷ୍ଟ୍ରଦୂତ ନବୀନ ଶ୍ରୀବାସ୍ତବ ମଧ୍ୟ ଉପସ୍ଥିତ ଥିଲେ । ଏହି କୋଠା ନିର୍ମାଣ ପାଇଁ ଭାରତ ୩.୭ କୋଟି ନେପାଳୀ ଟଙ୍କା ସହାୟତା କରିଛି ।

 ୧୯୪୯ ମସିହାରେ ହିମାଳୟ ମିଡିଲ୍ ସ୍କୁଲ ଭାବରେ ପ୍ରତିଷ୍ଠିତ ହିମାଳୟ କିରଣ ପବ୍ଲିକ୍ କ୍ୟାମ୍ପସ୍ ୨୦୦୫ ରେ ସ୍ନାତକୋତ୍ତର ଡିଗ୍ରୀ ପାଠ୍ୟକ୍ରମ ଆରମ୍ଭ କରିଥିଲା । ଏଥିରେ ୬ ଶହରୁ ଅଧିକ ଛାତ୍ର ଅଧ୍ୟୟନ କରୁଛନ୍ତି । ସେମାନଙ୍କ ମଧ୍ୟରୁ ୬୦ ପ୍ରତିଶତ ଛାତ୍ରୀ ଅଟନ୍ତି। ପୂର୍ବ ନେପାଳର କୋଶୀ ପ୍ରଦେଶର ସଂଖୁବାସାବା ଜିଲ୍ଲାରେ ଅବସ୍ଥିତ ଏହି କ୍ୟାମ୍ପସକୁ ବୈଦେଶିକ ମନ୍ତ୍ରୀ ସଉଦ ଏବଂ ଭାରତୀୟ ରାଷ୍ଟ୍ରଦୂତ ଶ୍ରୀବାସ୍ତବ ବୁଧବାର ଉଦଘାଟନ କରିଛନ୍ତି ।

 ସଉଦ କହିଛନ୍ତି ଏହା ଏକ ଗର୍ବର ବିଷୟ ଏବଂ ନେପାଳ ଭାରତ ଭଳି ପଡ଼ୋଶୀ ମାନଙ୍କ ପାଇଁ ଭାଗ୍ୟବାନ, ଯେଉଁମାନେ ନେପାଳ ଏବଂ ଏହାର ଲୋକଙ୍କ ବିକାଶରେ ସହଯୋଗ କରିଛନ୍ତି । ନେପାଳର ବିକାଶ ପ୍ରୟାସରେ ଭାରତର ନିରନ୍ତର ସମର୍ଥନକୁ ମୁଁ ଆଶା କରୁଛି।