ନୂଆଦିଲ୍ଲୀ: ପ୍ୟାରିସ ପାରାଅଲିମ୍ପିକ୍ସ ୨୦୨୪ରେ ଭାରତର ପଦକ ସଂଖ୍ୟା ବୃଦ୍ଧି ପାଇବାରେ ଲାଗିଛି । ସୋମବାର ଭାରତକୁ ଦ୍ବିତୀୟ ସ୍ବର୍ଣ୍ଣ ପଦକ ଦେଇଛନ୍ତି ଭାରତୀୟ ଷ୍ଟାର ପାରା ସଟ୍‌ଲର ନୀତେଶ କୁମାର । ସୋମବାର ସେ ପୁରୁଷ ଏକକ SL3 ଇଭେଣ୍ଟରେ ସ୍ବର୍ଣ୍ଣ ପଦକ ହାସଲ କରିଛନ୍ତି । ପୁରୁଷ ଏକକ SL3 ଫାଇନାଲରେ ଗ୍ରେଟ ବ୍ରିଟେନର ଡାନିଏଲ ବଥେଲଙ୍କୁ ୨-୧ରେ ପରାସ୍ତ କରି ଦେଶ ପାଇଁ ସ୍ବର୍ଣ୍ଣ ପଦକ ଜିତିଛନ୍ତି ନୀତେଶ । 

୨୯ ବର୍ଷୀୟ ଭାରତୀୟ ଷ୍ଟାର ପାରା ସଟ୍‌ଲର ପ୍ରଥମ ସେଟ୍ ୨୧-୧୪ରେ ଜିତିଥିଲେ । କିନ୍ତୁ ପରେ ଅଗ୍ରଣୀ ହାସଲ କରିବା ସତ୍ତ୍ୱେ ଦ୍ବିତୀୟ ସେଟ୍ ୧୮-୨୧ରେ ହାରିଥିଲେ ।  ଏହା ପରେ ନୀତେଶ ଚମତ୍କାର ପ୍ରତ୍ୟାବର୍ତ୍ତନ କରି ତୃତୀୟ ସେଟ୍ ୨୩-୨୧ରେ ଜିତି ସ୍ୱର୍ଣ୍ଣ ପଦକ ହାସଲ କରିଛନ୍ତି ।  ଏକ ଘଣ୍ଟା ୨୧ ମିନିଟ୍‌ର ଯୁଦ୍ଧ ପରେ ସଫଳତା ହାସଲ କରିଛନ୍ତି ନୀତେଶ । 

ଗମ୍ଭୀର ଭିନ୍ନକ୍ଷମ ଥିବା ଖେଳାଳିମାନେ SL3 ବର୍ଗରେ ପ୍ରତିଦ୍ୱନ୍ଦ୍ୱିତା କରନ୍ତି, ସେମାନଙ୍କୁ ଅଧା କୋର୍ଟରେ ଖେଳିବାକୁ ଦିଆଯାଏ । ତେବେ ପ୍ରମୋଦ ଭଗତଙ୍କ ପରେ ଦ୍ବିତୀୟ ଭାରତୀୟ ସଟ୍‌ଲର ଭାବେ SL3 ବର୍ଗରେ ପାରାଅଲିମ୍ପିକ୍ସ ଗୋଲ୍ଡ ଜିତିବାର ରେକର୍ଡ କରିଛନ୍ତି ନୀତେଶ କୁମାର । ସେପଟେ ପାରାଅଲିମ୍ପିକ୍ସରେ ବ୍ୟାଡମିଣ୍ଟନରେ ଭାରତକୁ ସବୁ ଗୋଲ୍ଡ ମେଡାଲ ହିଁ ମିଳିଛି । ୨୦୨୦ ଟୋକିଓ ପାରାଅଲିମ୍ପିକ୍ସରେ ପ୍ରମୋଦ ଭଗତ (SL3)  ଏବଂ କ୍ରିଷ୍ଣା ନାଗର (SH 6) ସ୍ବର୍ଣ୍ଣ ପଦକ ଜିତିଥିଲେ ।