ସମ୍ବଲପୁର,୧୮/୦୯: ଆଉ ମାତ୍ର  ଦିନକ ପରେ ପଶ୍ଚିମ ଓଡିଶାର ଗଣପର୍ବ ନୂଆଁଖାଇ । ହେଲେ ବର୍ତ୍ତମାନ ସୁଦ୍ଧା ନୂଆଁଖାଇ ଦିନ କିମ୍ବା ଏହାର ବାସି ଛୁଟି ଘୋଷଣା ହୋଇନାହିଁ । ଏଭଳି ସ୍ଥିତିରେ ନୂଆଁଖାଇ ପୂର୍ବରୁ  ଆଜି ହିଁ ଏକମାତ୍ର କାର୍ଯ୍ୟଦିବସ ରହିଛି ।  ଫଳରେ ଆସନ୍ତାକାଲି ଉଭୟ ରାଜ୍ୟ ସରକାରଙ୍କ  ପକ୍ଷରୁ ହେଉଥିବା ଛୁଟି ଏବଂ ବାସି ଛୁଟି  ଘୋଷଣା ନ ହେଲେ ସାରା ପଶ୍ଚିମ ଓଡିଶାରେ  ଏହା ଅସନ୍ତୋଷର କାରଣ ହେବା ଏକପ୍ରକାର  ଥୟ ବୋଲି ଜଣାପଡିଲାଣି । କିନ୍ତୁ, ଗୁରୁତ୍ୱପୂର୍ଣ କଥା ହେଉଛି ଯେ, ଗତବର୍ଷ ଯେଭଳି ଛୁଟି  ପାଇଁ ପଶ୍ଚିମ ଓଡିଶାର ବିଭିନ୍ନ ଜିଲ୍ଲାରେ  ଆନ୍ଦୋଳନ ଯାଏ କଥା ଯାଇଥିଲା ଏବର୍ଷ ସେଭଳି  ସ୍ଥିତି ଦେଖିବାକୁ ମିଳିନାହିଁ । କେବଳ କାଁ ଭାଁ  ଦାବିପତ୍ରରେ ସୀମିତ ରହିଯାଇଛି । ସେପଟେ,  ଛୁଟି ଘୋଷଣା ହୋଇନଥିବାରୁ ଉଭୟ ସରକାର  ଏବଂ ବେସରକାରୀ କର୍ମଚାରୀ ମହଲରେ  ଭାଲେଣି ପଡିଗଲାଣି । 

ଗତବର୍ଷ ସାରା ପଶ୍ଚିମ ଓଡିଶାରେ ନୂଆଁଖାଇ ଛୁଟିକୁ ନେଇ ଏକପ୍ରକାର ଆନ୍ଦୋଳନ ଭଳି ସ୍ଥିତି  ସୃଷ୍ଟି ହୋଇଥିଲା । ଏପରିକି ବରଗଡ ଭଳି  କିଛି ଜିଲ୍ଲାରେ କୋଶଲ ସେନା ଜିଲ୍ଲାପାଳଙ୍କ ଅଫିସ ଘେରାଉ କରିଥିବା ବେଳେ ସବୁଠି  ପ୍ରତିବାଦର ସ୍ୱର ଦେଖିବାକୁ ମିଳୁଥିଲା । ବିଶେଷ କରି ସାରା ପଶ୍ଚିମ ଓଡିଶାର ଏହା ଗଣପର୍ବ  ହୋଇଥିବା ସତ୍ତେ୍ୱ ଏହାକୁ ଛୁଟି ଘୋଷଣାରେ  କରାଯାଉଥିବା ଅବହେଳା ହିଁ ଅସନ୍ତୋଷର କାରଣ  ହୋଇଆସିଛି । ଏପରିକି ପୂର୍ବରୁ ତତ୍କାଳୀନ  ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ସମୟରେ ଏହା  ସରକାରୀ ଛୁଟି ଘୋଷଣା ହୋଇଥିଲା । ହେଲେ  ପରବର୍ତ୍ତୀ ସମୟରେ ଏହି ଛୁଟି ବନ୍ଦ ହୋଇଗଲା ।  ଏଭଳି ସ୍ଥିତିରେ ଗତବର୍ଷ ବିଭିନ୍ନ ସଂଗଠନ  ଆନ୍ଦୋଳନକୁ ଓହ୍ଲାଇଥିବା ବେଳେ ପଶ୍ଚିମ  ଓଡିଶାର ଅନେକ ବିଧାୟକ, ସାଂସଦଙ୍କ ସମେତ  ଅନେକ ନେତା ମୁଖ୍ୟମନ୍ତ୍ରୀଙ୍କୁ ପତ୍ର ଲେଖି  ଦାବି କରିଥିଲେ ।

 ଏହାପରେ ରାଜ୍ୟ ସରକାର  ରାଜ୍ୟପାଳଙ୍କ ନିର୍ଦ୍ଦେଶକ୍ରମେ ନେଗୋସିଏବୁଲ୍‌  ଇନଷ୍ଟ୍ରୁମେଣ୍ଟ ଧାରାରେ ନୂଆଁଖାଇ ପାଇଁ ଗତବର୍ଷ ସେପଟେମ୍ବର ୧ ତାରିଖକୁ ଛୁଟି ଘୋଷଣା  କରିଥିଲେ । ହେଲେ ଏବର୍ଷ ନୂଆଁଖାଇକୁ  ଆଉ ମାତ୍ର ୨ ଦିନ ବାକି ରହିଥିଲେ ହେଁ  ବର୍ତ୍ତମାନ ସୁଦ୍ଧା ନାଁ ରାଜ୍ୟ ସରକାର କିମ୍ବା  ଆର୍‌ଡିସିସ୍ତରୀୟ ଛୁଟି ଘୋଷଣା ହୋଇପାରିନାହିଁ ।  ଏହି ପରିପ୍ରେକ୍ଷୀରେ  ସୋମବାର  ଗୋଟିଏ ଦିନ ହିଁ ସରକାରୀ କାର୍ଯ୍ୟଦିବସ ଥିବା  ବେଳେ ମଙ୍ଗଳବାରରେ ଗଣେଷ ପୂଜା ପାଇଁ  ଛୁଟି ରହିବ । ଆଉ ବୁଧବାର ନୂଆଁଖାଇ । ତେଣୁ, ଆସନ୍ତାକାଲି ହିଁ ଉଭୟ ରାଜ୍ୟ ସରକାରଙ୍କ  ଏନ୍‌ଆଇ ଆକ୍ଟରେ ନୂଆଁଖାଇ ଦିନ ପାଇଁ ଛୁଟି  ଘୋଷଣା ସହିତ ଆର୍‌ଡିସିଙ୍କ ଜିଲ୍ଲାସ୍ତରୀୟ ଛୁଟି  ଘୋଷଣା କରିବାକୁ ପଡିବ । ଆଉ ଯଦି ଏଥିରେ  ଅବହେଳା ହୁଏ, ତାହେଲେ ସରକାରୀ ଏବଂ  ବେସରକାରୀ କର୍ମଚାରୀ କେମିତି ଆସି ପରିବାର ସହିତ ନୂଆଁଖାଇରେ ସାମିଲ ହେବେ ତାହା ଏବେ  ଚିନ୍ତାର ବିଷୟ ହୋଇଛି ।