ନୂଆଦିଲ୍ଲୀ: ଭାରତରେ କୋଟିପତିଙ୍କ ସଂଖ୍ୟା ବୃଦ୍ଧି ପାଇଛି । ଗତ ୫ ବର୍ଷ ମଧ୍ୟରେ ବାର୍ଷିକ ୧୦ କୋଟିରୁ ଅଧିକ ଆୟ କରୁଥିବା ଲୋକଙ୍କ ସଂଖ୍ୟା ୬୩ ପ୍ରତିଶତ ବଢ଼ିଛି । ଏନେଇ ସେଣ୍ଟ୍ରମ୍ ଇନଷ୍ଟିଚ୍ୟୁସନାଲ ରିସର୍ଚ୍ଚ ରିପୋର୍ଟରୁ ଜଣାପଡ଼ିଛି । ରିପୋର୍ଟ ଅନୁସାରେ, ଭାରତରେ ପ୍ରାୟ ୩୧ ହଜାର ୮୦୦ ଜଣ ଲୋକ ବାର୍ଷିକ ୧୦ କୋଟିରୁ ଅଧିକ ରୋଜଗାର କରନ୍ତି । ଏହି ସଂଖ୍ୟା ଗତ ପାଞ୍ଚ ବର୍ଷ ମଧ୍ୟରେ ୬୩ ପ୍ରତିଶତ ବୃଦ୍ଧି ପାଇଛି । 

ସେହିପରି ବର୍ଷକୁ ୫ କୋଟିରୁ ଅଧିକ ରୋଜଗାର କରୁଥିବା ବ୍ୟକ୍ତିଙ୍କ ସଂଖ୍ୟା ୪୯ ପ୍ରତିଶତ ବଢ଼ି ୫୮ ହଜାର ୨୦୦ରେ ପହଞ୍ଚିଯାଇଛି । ୫୦ ଲକ୍ଷରୁ ଅଧିକ ରୋଜଗାର କରୁଥିବା ଲୋକଙ୍କ ସଂଖ୍ୟା ୨୫ ପ୍ରତିଶତ ବୃଦ୍ଧି ପାଇ ୧୦ ଲକ୍ଷରେ ପହଞ୍ଚିଛି । ଆର୍ଥିକ ବର୍ଷ ୨୦୧୯ରୁ ୨୦୨୪ ମଧ୍ୟରେ ବର୍ଷକୁ ୫୦ ଲକ୍ଷରୁ ଅଧିକ ରୋଜଗାର କରୁଥିବା ଲୋକଙ୍କ ମୋଟ ଆୟରେ ୬୪ ପ୍ରତିଶତ ବୃଦ୍ଧି ହୋଇ ୪୯ ଲକ୍ଷ କୋଟିରେ ପହଞ୍ଚିଛି । ସେହିପରି ଏହି ପାଞ୍ଚ ବର୍ଷ ମଧ୍ୟରେ ୧୦ କୋଟିରୁ ଅଧିକ ରୋଜଗାର କରୁଥିବା ଲୋକଙ୍କ ମୋଟ ଆୟ ୧୨୧% ବୃଦ୍ଧି ପାଇ ୩୮ ଲକ୍ଷ କୋଟିରେ ପହଞ୍ଚି ଥିବାବେଳେ ୫ କୋଟିରୁ ଅଧିକ ରୋଜଗାର କରୁଥିବା ଲୋକଙ୍କ ଆୟ ୧୦୬ ପ୍ରତିଶତ ବଢ଼ି ୪୦ ଲକ୍ଷ କୋଟି ଟଙ୍କା ହୋଇଛି । 

ରିପୋର୍ଟ ଦେଖିଲେ ଜଣାପଡ଼ୁଛି ଯେ,  ୫୦ ଲକ୍ଷ ଟଙ୍କାରୁ ଅଧିକ ରୋଜଗାର କରୁଥିବା ବ୍ୟକ୍ତିଙ୍କ ସଂଖ୍ୟା ୨୫ ପ୍ରତିଶତ ବଢ଼ି  ପ୍ରାୟ ୧୦ ଲକ୍ଷରେ ପହଞ୍ଚିଛି । ଅନ୍ୟପଟେ ଭାରତରେ  ଆଗକୁ ହାଇ ନେଟ୍ ୱର୍ଥ  ଏବଂ ଅଲ୍ଟ୍ରା ହାଇ ନେଟ୍ ୱର୍ଥ ବ୍ୟକ୍ତିବିଶେଷଙ୍କ ମିଳିତ ସମ୍ପତ୍ତିରେ ବୃଦ୍ଧି ଘଟିବ ବୋଲି ରିପୋର୍ଟରେ ପୂର୍ବାନୁମାନ କରାଯାଇଛି ।