ଭୁବନେଶ୍ୱର,୦୩/୦୮:  ଚଳିତବର୍ଷ ଜୁଲାଇରେ ରାଜ୍ୟ ଜିଏସ୍‌ଟି  (ରାଜ୍ୟ ଜିଏସ୍‌ଟି + ସମନ୍ୱିତ ଜିଏସ୍‌ଟି  ସେଟେଲ୍‌ମେଣ୍ଟ) ବାବଦକୁ ଓଡ଼ିଶା ୨୦୩୫.୧୮ କୋଟି ଟଙ୍କା ସଂଗ୍ରହ କରିଛି ।  ଏହା ୨୦୨୩ ଜୁଲାଇରେ ୧୬୨୮.୪୩  କୋଟି ଟଙ୍କା ଥିଲା । ଏ କ୍ଷେତ୍ରରେ ଓଡ଼ିଶାର ଅଭିବୃଦ୍ଧି ହାର ରହିଛି ୨୪.୯୮%  । ପୁନଃ  ଚଳିତ ବର୍ଷ ଜୁଲାଇ ମାସ ପର୍ଯ୍ୟନ୍ତ ରାଜ୍ୟ  ଜିଏସ୍‌ଟି ସଂଗ୍ରହ ପରିମାଣ ୮୮୬୬.୯୫  କୋଟି ଟଙ୍କାରେ ପହଞ୍ଚିଛି, ଯାହା ପୂର୍ବବର୍ଷ  ସମାନ ଅବଧିରେ ଥିଲା ୭୦୫୫.୫୩  କୋଟି । ଏ କ୍ଷେତ୍ରରେ ଓଡ଼ିଶାର  ଅଭିବୃଦ୍ଧି ହାର ରହିଛି ୨୫.୬୭%  ।  

ସେହିପରି ଚଳିତ ବର୍ଷ ଜୁଲାଇ  ମାସରେ ଓଡ଼ିଶାର ମୋଟ ଜିଏସ୍‌ଟି  (କେନ୍ଦ୍ରୀୟ ଜିଏସ୍‌ଟି, ରାଜ୍ୟ ଜିଏସ୍‌ଟି,  ସମନ୍ୱିତ ଜିଏସ୍‌ଟି ଓ ସେସ୍‌) ସଂଗ୍ରହ  ପରିମାଣ ୪୯୨୫.୦୨ କୋଟି ଟଙ୍କାରେ  ପହଞ୍ଚିଛି । ୨୦୨୩ ଜୁଲାଇରେ ଏହି  ପରିମାଣ ଥିଲା ୪୨୪୫.୪୦ କୋଟି  ଟଙ୍କା । ପୁନଃ ଚଳିତ ବର୍ଷ ଜୁଲାଇ ମାସ  ପର୍ଯ୍ୟନ୍ତ ଓଡ଼ିଶାର ମୋଟ ଜିଏସ୍‌ଟି  ସଂଗ୍ରହ ପରିମାଣ ୨୦୮୪୧.୩୩  କୋଟି ଟଙ୍କାରେ ପହଞ୍ଚିଛି, ଯାହା ପୂର୍ବବର୍ଷ ସମାନ ଅବଧିରେ ଥିଲା  ୧୮୦୫୮.୮୪ କୋଟି । ଏ କ୍ଷେତ୍ରରେ  ଅଭିବୃଦ୍ଧି ହାର ରହିଛି ୧୫.୪୧% । 

ରାଜ୍ୟ ବାଣିଜ୍ୟ କର ଏବଂ ଜିଏସ୍‌ଟି  କମିଶନରେଟ୍‌ ଦ୍ୱାରା ପରିଚାଳିତ  ହେଉଥିବା ସମସ୍ତ ଟିକସ ବ୍ୟବସ୍ଥା  ଯଥା-ରାଜ୍ୟ ଜିଏସ୍‌ଟି/ସମନ୍ୱିତ ଜିଏସ୍‌ଟି  ଫଇସଲା, ଭାଟ୍‌, ବୃତ୍ତିକର ଆଦି  ଅଧୀନରେ ଚଳିତ ବର୍ଷ ଜୁଲାଇ ମାସରେ  ୩୨୦୯.୬୬ କୋଟି ଟଙ୍କା ସଂଗ୍ରହ  ହୋଇଛି, ଯାହାକି ଗତବର୍ଷ ଜୁଲାଇ ମାସରେ ୨୭୧୬.୫୨ କୋଟି ଟଙ୍କା  ଥିଲା । ଏ କ୍ଷେତ୍ରରେ ଅଭିବୃଦ୍ଧି ହାର  ରହିଛି ୧୮.୧୫ ପ୍ରତିଶତ । ଚଳିତବର୍ଷ  ଜୁଲାଇରେ ୨୧.୦୨ ଲକ୍ଷ ସଂଖ୍ୟକ ଇ-ୱେ  ବିଲ୍‌ ଜାରି କରାଯାଇଛି, ଯାହା ପୂର୍ବ ବର୍ଷ  ସମାନ ସମୟରେ ଥିଲା ୨୦.୧୩ ଲକ୍ଷ ।