ଭୁବନେଶ୍ୱର ୧୦/୦୫: ଚଳଚ୍ଚିତ୍ରରେ ସାନ୍ତାଳି ଚେହେରା । ଅଭିନୟଠାରୁ ନିର୍ଦ୍ଦେଶନା ଯାଏ ସବୁଠି ସାନ୍ତାଳି ଭାବ । ନିରୀହ, ନିଷ୍କପଟ ଏହି ଜନଜାତିଙ୍କ ସଂସ୍କୃତି ଓ ଜୀବନ ଏବେ ପ୍ରତିବିମ୍ବିତ ହେଉଛି ଲାଇଟ୍, କ୍ୟାମେରା ଓ ଆକ୍ସନ୍ ମାଧ୍ୟମରେ । କାହାଣୀଠାରୁ ଆରମ୍ଭ କରି ଚରିତ୍ର ସବୁକୁ ଜୀବନ୍ୟାସ ଦେଉଛନ୍ତି ଦୁଇ ସାନ୍ତାଳି ଚଳଚ୍ଚିତ୍ର ନିର୍ଦ୍ଦେଶକ ଶ୍ୟାମସୁନ୍ଦର ମାଝୀ ଓ ଦୀପକ କୁମାର ବେଶ୍ରା । ଶ୍ୟାମ ବାଲେଶ୍ୱରର ହୋଇଥିବା ବେଳ ଦୀପକ ପଡ଼ୋଶୀ ଜିଲ୍ଲା ମୟୂରଭଞ୍ଜର ।
୨୦୧୯ରେ ପ୍ରଥମ କରି ଶ୍ୟାମଙ୍କ ନିର୍ଦ୍ଦେଶନାରେ ଆସିଥିଲା ସାନ୍ତାଳି ଚଳଚ୍ଚିତ୍ର ‘କୁକଲି’ । ଯାହାର ଅର୍ଥ ପ୍ରଶ୍ନ । ବାଲେଶ୍ୱର ସ୍ଥିତ ମାର୍ଶଲ ମଣ୍ଡଓବା ପ୍ରଡକ୍ସନ୍ ସହାୟତାରେ ମୁକ୍ତିଲାଭ କରିଥିବା ଶ୍ୟାମଙ୍କ ଏହି ଚଳଚ୍ଚିତ୍ର ପରବର୍ତ୍ତୀ ସମୟରେ ବିଭିନ୍ନ ଜାତୀୟ ଓ ଅନ୍ତର୍ଜାତୀୟ ଚଳଚ୍ଚିତ୍ର ଉତ୍ସବ ଦ୍ୱାରା ୧୩୦ରୁ ଅଧିକ ପୁରସ୍କାର ପାଇଥିଲା । ୨୦୨୨ରେ ଶ୍ୟାମଙ୍କ ନିର୍ଦ୍ଦେଶିତ ମୀରୁ (ଶୁଆ) ମୁକ୍ତିଲାଭ କରିଥିଲା । ପିଙ୍କି ପ୍ରଡକ୍ସସନର ପ୍ରଯୋଜନାରେ ମୁକ୍ତିଲାଭ କରିଥିବା ଏହି ଚଳଚ୍ଚିତ୍ର ଇତିମଧ୍ୟରେ ୪୮ଟି ଅନ୍ତର୍ଜାତୀୟ ପୁରସ୍କାର ପାଇପାରିଛି ।
ଶ୍ୟାମଙ୍କ ଭଳି ଦୀପକଙ୍କ ନିର୍ଦ୍ଦେଶିତ ଚଳଚ୍ଚିତ୍ର ମୋହତ୍ (ମୂଲ୍ୟ) ଓ ପାପାୟା (ଏକ ଫଳର ନାମ) ମଧ୍ୟ ବିଭିନ୍ନ ଜାତୀୟ ଓ ଅନ୍ତର୍ଜାତୀୟ ଉତ୍ସବରେ ପ୍ରଶଂସା ଅର୍ଜନ କରିଛି । ମୋହତ୍ ୨୦୨୨-୨୩ରେ ୭ଟି ପୁରସ୍କାର ପାଇଥିବା ବେଳେ ପପାୟା ୨୦୨୪ରେ ଦୁଇଟି ପୁରସ୍କାର ପ୍ରାପ୍ତ କରିଛି । ଦୀପକ ଓ ଶ୍ୟାମଙ୍କ ୪ଟି ଯାକ ସାନ୍ତାଳି ଚଳଚ୍ଚିତ୍ରରେ ଗୋଟିଏ କଥା ସମାନ । ସେଇଟା ହେଲା ନୂଆ ଚରିତ୍ରଙ୍କୁ ସୁଯୋଗ ଦେବା । ଅର୍ଥାତ ଯେଉଁମାନଙ୍କର ପୂର୍ବରୁ ଲାଇଟ-କ୍ୟାମେରା ଓ ଆକ୍ସନ୍ ସହ କୌଣସି ସମ୍ପର୍କ ନଥିଲା । ଏଥିପାଇଁ ସେମାନଙ୍କୁ ବିଭିନ୍ନ ସମୟରେ ବିପରୀତ ପାରିପାଶ୍ୱିର୍କ ପରିସ୍ଥିତିର ସାମ୍ନା କରିବାକୁ ପଡ଼ିଛି । ପରେ ଯାଇ ସେମାନଙ୍କୁ ଚରିତ୍ର ସ୍ୱରୂପ ଦିବ୍ୟାଜ୍ୟୋତି ମାରାଣ୍ଡି, ଶିବ ହେମ୍ବ୍ରମ ଓ ତୁଫାନ ସୋରେଙ୍କ ସନ୍ଧାନ ମିଳିଛି ।
ଦିବ୍ୟାଜ୍ୟୋତି ଓ ତୁଫାନ ମୟୂରଭଞ୍ଜର ହୋଇଥିବା ବେଳେ ଶିବ ଝାଡ଼ଖଣ୍ଡର ଜାମସେଦପୁର ଅଞ୍ଚଳର । ଦିବ୍ୟଜ୍ୟୋତି କହନ୍ତି, ଯେତେବେଳେ ମୁଁ ‘କୁକଲି’ ଚଳଚ୍ଚିତ୍ରର ମୁଖ୍ୟ ଚରିତ୍ରରେ ଅଭିନୟ କରିଥିଲି ସେତେବେଳେ ବାଲେଶ୍ୱରର ବୈଷ୍ଣବ ବନ୍ଧ ଆଶ୍ରମ ସ୍କୁଲରେ ଷଷ୍ଠ ପଢ଼ୁଥିଲି । ‘ମୀରୁ’ ଚଳଚ୍ଚିତ୍ରରେ ଅଭିନୟ ବେଳକୁ ଉକ୍ତ ସ୍କୁଲରେ ନବମ ଶ୍ରେଣୀ ହୋଇଯାଇଥିଲା । ସମାନ ଭାବେ ଶିବ ଏବେ ଜାମ୍ସେଦପୁରର ରୋବର୍ଟ ହାଇସ୍କୁଲରେ ସପ୍ତମ ଶ୍ରେଣୀରେ ପଢ଼ୁଥିବା ବେଳେ ତୁଫାନ ବାରିପଦାର ତଳଡିହି ପ୍ରାଥମିକ ସ୍କୁଲରେ ୫ମ ଶ୍ରେଣୀରେ ପଢ଼ୁଛନ୍ତି । ଦୀପକ କହନ୍ତି, ବାରିପଦାର ବିଭିନ୍ନ ସ୍କୁଲରେ ଟ୍ୟାଲେଣ୍ଟ ହଣ୍ଟ କାର୍ଯ୍ୟକ୍ରମ ଜରିଆରେ ମୁଁ ତୁଫାନକୁ ପାଇଛି । ଏଥିପାଇଁ ମୋତେ ବାରିପଦାର ୩ଟି ସ୍କୁଲ ଯିବାକୁ ପଡ଼ିଥିଲା ।
୩ଟି ଯାକ ଚଳଚ୍ଚିତ୍ର କାହାଣୀ ସାମ୍ପ୍ରତିକ ଘଟଣାବଳୀ ସହ ଆଦିବାସୀଙ୍କ ଜୀବନ କିପରି ପ୍ରଭାବିତ ହେଉଛି ତାହା ଉପରେ ପର୍ଯ୍ୟବସିତ । ଶ୍ୟାମସୁନ୍ଦର ମାଝୀଙ୍କ ନିର୍ଦ୍ଦେଶିତ ‘କୁକଲି’ ଚଳଚ୍ଚିତ୍ରରେ ବିଶ୍ୱରେ ବିଭିନ୍ନ ପ୍ରକାର ଧ୍ୱଂସଲୀଳା ଚାଲିଥିବା ବେଳେ ସାଧାରଣ ମଣିଷ ଜୀବନରେ କିପରି ଶାନ୍ତିର ଆବଶ୍ୟକତା ରହିଛି ତାହାକୁ ପରିସ୍ପୁଟ କରାଯାଇଛି । ଏଥିରେ ମୁଖ୍ୟ ଚରିତ୍ର ଭୂମିକାରେ ଅଭିନୟ କରିଥିବା ପୁକଲି ଏକ ଟେଲିଭିଜନ୍ ଚ୍ୟାନେଲରେ ଯୁଦ୍ଧର ଧ୍ୱଂସଲୀଳା ଦେଖିବା ପରେ କିପରି ବିବ୍ରତ ହୋଇପଡ଼ିଛନ୍ତି ତାହା ପ୍ରଦର୍ଶିତ କରାଯାଇଛି । ସେହିପରି ତାଙ୍କ ନିର୍ଦ୍ଦେଶିତ ଚଳଚ୍ଚିତ୍ର ‘ମୀରୁ’ରେ ଏକ ଶୁଆର ଜୀବନ ସହ ମୀରୁର ଜୀବନକୁ ତୁଳନା କରିବାକୁ ଚେଷ୍ଟା କରାଯାଇଛି । ଚଳଚ୍ଚିତ୍ରରେ ମୀରୁର ବାପା ମୀରୁକୁ ପାରିବାରିକ କଳହ ଓ ଦ୍ୱନ୍ଦ୍ୱ ଭିତରକୁ ଟାଣୁଥିବା ବେଳେ ତା’ର ମା’ କିପରି ତାକୁ ସବୁ ସମୟରେ ପଢ଼ିବାକୁ ଉତ୍ସାହିତ କରିଛନ୍ତି ତାହା ଦେଖାଇବାର ପ୍ରୟାସ କରାଯାଇଛି ।
ଦୀପକ କୁମାର ବେଶ୍ରାଙ୍କ ନିର୍ଦ୍ଦେଶିତ ‘ମୋହତ’ ସ୍ଥିରତା ଓ ସମୟର ଗୁରୁତ୍ୱକୁ ଏକ ଭିନ୍ନ ଢଙ୍ଗରେ ପରିବେଷଣ କରିବାକୁ ଚେଷ୍ଟା କରିଛି । ଏହି ଚଳଚ୍ଚିତ୍ରରେ ମୋବାଇଲ୍ ଫୋନ୍ ସହ ଶିକ୍ଷାର ପରିଣାମକୁ ସଂଯୋଗ କରାଯାଇଛି । ସମାନ ଭାବେ ‘ପାପାୟା’ ଚଳଚ୍ଚିତ୍ରରେ ପାଠପଢ଼ାର ଗୁରୁତ୍ୱକୁ ଦେଖାଇବାର ଚେଷ୍ଟା କରାଯାଇଛି ।
