ଭୁବନେଶ୍ୱର ୦୭/୦୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଓଡ଼ିଶା ଗସ୍ତ ପୂର୍ବରୁ ରାଜ୍ୟବାସୀଙ୍କୁ ରେଳ ମନ୍ତ୍ରାଳୟର ବଡ଼ ଭେଟି । ଖୁବ୍‌ଶୀଘ୍ର ରାଜ୍ୟରେ ଗଡ଼ିବାକୁ ଯାଉଛି ଚତୁର୍ଥ ବନ୍ଦେ ଭାରତ ଏକ୍ସପ୍ରେସ । ଆସନ୍ତା ୧୫ ତାରିଖରେ ବ୍ରହ୍ମପୁର-ଟାଟାନଗର ମଧ୍ୟରେ ଏହି ଟ୍ରେନ ଚଳାଚଳର ଶୁଭାରମ୍ଭ ହେବ । ପ୍ରଧାନମନ୍ତ୍ରୀ ମୋଦି  ଏହି ଟ୍ରେନ ଚଳାଚଳକୁ ଲୋକାର୍ପଣ କରିବାର କାର୍ଯ୍ୟକ୍ରମ ରହିଥିବା ଜଣାପଡ଼ିଛି ।  ଏହି ଟ୍ରେନ୍‌ ସହ ଓଡ଼ିଶାରେ ମୋଟ ୪ଟି ବନ୍ଦେ ଭାରତ ଏକ୍ସପ୍ରେସ ଗଡ଼ିବ ।  

ଟାଟାନଗର-ବ୍ରହ୍ମପୁର ଓ ଟାଟାନଗର-ପାଟନା ମାର୍ଗରେ ବନ୍ଦେ ଭାରତ ଏକ୍ସପ୍ରେସ ଟ୍ରେନ ଚଳାଚଳ ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ଶୁକ୍ରବାର  ଏହି ଦୁଇ ମାର୍ଗ ପାଇଁ ବନ୍ଦେ ଭାରତ ଏକ୍ସପ୍ରେସ  ଟ୍ରେନ ଟାଟାନଗରରେ ପହଞ୍ଚିଛି । ଲୋକାର୍ପଣ  ପୂର୍ବରୁ ଏହି ଦୁଇ ମାର୍ଗରେ ଟ୍ରାଏଲ ରନ୍‌ କରାଯିବ ।  ଆସନ୍ତା ୮ତାରିଖରେ ଟାଟା ନଗରରୁ ବ୍ରହ୍ମପୁର ମାର୍ଗରେ ବନ୍ଦେଭାରତ  ଏକ୍ସପ୍ରେସ ଟ୍ରେନର ଟ୍ରାଏଲ  ରନ୍‌ କରାଯିବାକୁ ନିଷ୍ପତ୍ତି ହୋଇଛି । ଟାଟାନଗରରୁ ବ୍ରହ୍ମପୁର ମଧ୍ୟରେ ଚଳାଚଳ କରିବାକୁ ଥିବା ବନ୍ଦେଭାରତ  ଏକ୍ସପ୍ରେସ୍‌ ୭ରୁ୮ଘଣ୍ଟା ମଧ୍ୟରେ ପ୍ରାୟ ୫୮୬କିମି ମାର୍ଗ ଅତିକ୍ରମ କରିବ । 

ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଜିଲ୍ଲା କେନ୍ଦୁଝର ଗଡ଼ ଦେଇ ଏହି ଟ୍ରେନ୍‌  ଯିବ । ଟାଟାନଗରରୁ ଟ୍ରେନ୍‌ ବାହାରି ଚାଇଁବସା, ବାଂଶପାଣି, କେନ୍ଦୁଝର ଗଡ଼,  ହରିଚନ୍ଦନପୁର, ଜଖପୁରା, କଟକ, ଭୁବନେଶ୍ୱର, ଖୋର୍ଦ୍ଧା ରୋଡ୍‌, ବାଲୁଗାଁ ଆଦି  ୧୨ଟି ରେଳ ଷ୍ଟେସନ ଦେଇ ବ୍ରହ୍ମପୁରରେ ପହଞ୍ଚିବ । ସପ୍ତାହକୁ ୬ଦିନ ଏହି  ଟ୍ରେନ ଚଳାଚଳ କରିବ ବୋଲି ଜଣାପଡ଼ିଛି । 

ଉଲ୍ଲେଖଯୋଗ୍ୟ ଗତବର୍ଷ ଓଡ଼ିଶାରେ ଲୋକାର୍ପଣ ହୋଇଥିଲା ପ୍ରଥମ ବନ୍ଦେ ଭାରତ ଏକ୍ସପ୍ରେସ୍‌, ଯାହା ପୁରୀରୁ ହାୱାଡା  ପର୍ଯ୍ୟନ୍ତ ଚଳାଚଳ କରୁଛି । ଏଥିସହ ଭୁବନେଶ୍ୱର-ବିଶାଖାପାଟଣା ଓ ପୁରୀ-ରାଉରକେଲା ରୁଟ୍‌ରେ ବନ୍ଦେ ଭାରତ ଚଳାଚଳ କରୁଛନ୍ତି ।