ପ୍ୟାରିସ,୦୬/୦୮: ଗ୍ରେଟ୍ ବ୍ରିଟେନକୁ ସୁଟ୍ଆଉଟ୍ କରି ଭାରତ ରବିବାର ସେମି ଫାଇନାଲରେ ପ୍ରବେଶ କରିଥିଲା । ମଙ୍ଗଳବାର ସେମି ଫାଇନାଲ ଲଢ଼େଇରେ ଜର୍ମାନୀକୁ ଭେଟିବ । ଏହି ମ୍ୟାଚ୍ରେ ନିର୍ଣ୍ଣୟ ହେବ ଭାରତର ପଦକର ରଙ୍ଗ । ଯଦି ବିଜୟୀ ହେଉଛି ସ୍ୱର୍ଣ୍ଣ ଓ ରୌପ୍ୟ ଏବଂ ଯଦି ପରାଜିତ ହେଉଛି ତେବେ ବ୍ରୋଞ୍ଜ ଦୌଡ଼ରେ ରହିବ । ଭାରତୀୟ ସମୟ ରାତି ୧୦.୩୦ ମିନିଟରେ ମ୍ୟାଚ୍ ଆରମ୍ଭ ହେବ ।
ଗ୍ରେଟ୍ ବ୍ରିଟେନ ବିପକ୍ଷରେ ୧୭ ମିନିଟରେ ଦଳର ପ୍ରମୁଖ ଡିଫେଣ୍ଡର ଅମିତ ରୋହିଦାସଙ୍କୁ ମିଳିଥିଲା ରେଡ୍ କାର୍ଡ । ଟୁର୍ଣ୍ଣାମେଣ୍ଟ ନିର୍ଦ୍ଦେଶକ ତାଙ୍କୁ ଗୋଟିଏ ମ୍ୟାଚ୍ ବାସନ୍ଦ କରିଛନ୍ତି । ଯଦିଓ ହକି ଇଣ୍ଡିଆ ଏନେଇ ଅପିଲ କମିଟି ନିକଟରେ ଆବେଦନ କରିଥିଲା, ତାହା ବି ଖାରଜ ହୋଇଛି । ଅର୍ଥାତ ଅମିତ ସେମି ଫାଇନାଲ ଖେଳି ପାରିବେ ନାହିଁ । ଯାହା ଏବେ ଭାରତ ପାଇଁ ପ୍ରମୁଖ ସମସ୍ୟା ଭାବେ ଉଭା ହୋଇଛି । ବଡ଼ ମ୍ୟାଚ୍ରେ ଦଳର ପ୍ରମୁଖ ଡିଫେଣ୍ଡର ଅମିତ ରହିବେ ନାହିଁ, ତାହା ଦଳର ସନ୍ତୁଳନକୁ ନିଶ୍ଚିତ ବିଗାଡ଼ି ଦେବ । ଗୋଲକିପର ପିଆର ଶ୍ରୀଜେଶଙ୍କ ସହ ସେ ଗୋଲପୋଷ୍ଟକୁ ପ୍ରାଚୀର ଭଳି ସୁରକ୍ଷା ଦେଇଥାନ୍ତି । ଜର୍ମାନୀ ବିପକ୍ଷରେ ତାଙ୍କ ଉପସ୍ଥିତି ଏକାନ୍ତ ଆବଶ୍ୟକ ରହିଥିଲା।
ଅମିତଙ୍କ ଅନୁପସ୍ଥିତିରେ ଗତକାଲି ବ୍ରିଟେନ ବିପକ୍ଷରେ ଶ୍ରୀଜେଶ ହିଁ ଦଳକୁ ମ୍ୟାଚ୍ ଜିତାଇବାରେ ମୁଖ୍ୟଭୂମିକା ନିର୍ବାହ କରିଥିଲେ । ୧୦ ଜଣ ଖେଳାଳି ୪୩ ମିନିଟ ମ୍ୟାଚ୍ ଖେଳିବା ଏବଂ ବ୍ରିଟେନ ବିପକ୍ଷରେ ଅଲିମ୍ପିକ୍ସ କ୍ୱାର୍ଟର ଫାଇନାଲ ଜିତିବା ଥିଲା ଅତି ଅବିଶ୍ୱସନୀୟ ଓ ଅବର୍ଣ୍ଣନୀୟ । ଜର୍ମାନୀ ବିପକ୍ଷରେ ମଧ୍ୟ ସେଭଳି ପ୍ରଦର୍ଶନର ଆବଶ୍ୟକତା ରହିଛି । ଜର୍ମାନୀ ଭଲ ଫର୍ମରେ ଅଛି । ଗ୍ରୁପ୍-ଏରେ ୪ଟି ମ୍ୟାଚ୍ ଜିତି ଟପ୍ପର ହୋଇଥିଲା । କ୍ୱାର୍ଟର ଫାଇନାଲରେ ଆର୍ଜେଣ୍ଟିନାକୁ ୩-୨ ଗୋଲରେ ହରାଇଥିଲା । ଯଦିଓ ମ୍ୟାଚ୍ ବେଶ ସଂଘର୍ଷପୂର୍ଣ୍ଣ ରହିଥିଲା । ଭାରତର ଦୁର୍ବଳ ଦିଗ ସଂପର୍କରେ ଅବଗତ ହେବା ପରେ ସେମାନେ ନିଶ୍ଚିତ ଭାବେ ଦୃଢ଼ ରଣନୀତି ପ୍ରସ୍ତୁତ କରି ସାରିଥିବେ ।
ଏପର୍ଯ୍ୟନ୍ତ ଅଧିନାୟକ ହର୍ମନପ୍ରୀତ ସିଂଙ୍କ ପ୍ରଦର୍ଶନ ଅତି ଉନ୍ନତ ରହିଛି । ୭ଟି ଗୋଲ୍ ସେ ଦେଇ ସାରିଲେଣି । ସେମିତି ଦଳର ଅନ୍ୟ ଖେଳାଳିମାନେ ନିଜ ସାମର୍ଥ୍ୟ ଠାରୁ ଅଧିକ ପ୍ରଦର୍ଶନ ଦେଇ ଚାଲିଛନ୍ତି । ଆଶା ଜର୍ମାନୀ ବିପକ୍ଷରେ ଦଳ ଶ୍ରେଷ୍ଠ ପ୍ରଦର୍ଶନ ଦେବ ଏବଂ ୪୪ ବର୍ଷ ପରେ ଅଲିମ୍ପିକ୍ସ ଫାଇନାଲ ଖେଳିବାର ସ୍ୱପ୍ନ ପୂରଣ କରିବ।
