ନୂଆଦିଲ୍ଲୀ,୨୨/୦୩: ଆସନ୍ତା ଜୁଲାଇ ୨୬ ତାରିଖରୁ ଆରମ୍ଭ ହେବ ପ୍ୟାରିସ ଅଲିମ୍ପିକ୍ସ । ଭାରତୀୟ ଅଲିମ୍ପିକ୍ସ ସଂଘ (ଆଇଓଏ) ପକ୍ଷରୁ ୨ଟି ବଡ଼ ଘୋଷଣା ହୋଇଛି । ୪୧ ବର୍ଷୀୟ ଭେଟେରାନ ଟେବୁଲ ଟେନିସ ଖେଳାଳି ଶରତ କମଲ ପ୍ୟାରିସ ଅଲିମ୍ପିକ୍ସ ଉଦ୍ଘାଟନୀ ଉତ୍ସବରେ ଭାରତୀୟ ଦଳର ନେତୃତ୍ୱ ନେଇ ତ୍ରିରଙ୍ଗା ଧାରଣ କରିବେ । ସେହିପରି କିମ୍ବଦନ୍ତୀ ମହିଳା ବକ୍ସର ଏମ୍ସି ମେରୀକମ୍ ଚିଫ୍ ଡି ମିଶନ ନିଯୁକ୍ତ ହୋଇଛନ୍ତି । ଅଲିମ୍ପିକ୍ସ ଜୁଲାଇ ୨୬ ତାରିଖରୁ ଆରମ୍ଭ ହୋଇ ଅଗଷ୍ଟ ୧୧ ତାରିଖରେ ଉଦ୍ଯାପିତ ହେବ । କେତେ ଜଣିଆ ଭାରତୀୟ ଦଳ ଅଲିମ୍ପିକ୍ସରେ ପ୍ରତିନିଧିତ୍ୱ କରିବେ ତାହା ଏ ପର୍ଯ୍ୟନ୍ତ ଚୂଡ଼ାନ୍ତ ହୋଇନି । ଆଇଓଏ ପକ୍ଷରୁ ଜାରି କରାଯାଇଥିବା ପ୍ରେସ୍ ବିଜ୍ଞପ୍ତିରେ ଶରତଙ୍କୁ ଭାରତୀୟ ଅଲିମ୍ପିକ୍ସ ଦଳର ‘ଏକତା ଓ ଉତ୍ସାହ’ ରୂପେ ଅବିହିତ କରାଯାଇଛି । ମେରୀକମଙ୍କ ସହ ଶିବ କେଶବନଙ୍କୁ ଡେପୁଟି ଚିଫ୍ ଡି ମିଶନ ନିଯୁକ୍ତ କରାଯାଇଛି ।
ଅଲିମ୍ପିକ୍ସରେ ଭାରତୀୟ ସୁଟିଂ ଦଳ ଉପରେ ନଜର ରଖିବେ ଅଲିମ୍ପିଆନ ଗଗନ ନାରଙ୍ଗ । ଏଥର ସୁଟିଂରେ ଭାରତ ଏକ ବଡ଼ ଦଳ ପଠାଇବ । ଏ ପର୍ଯ୍ୟନ୍ତ ୧୯ଟି କୋଟା ମିଳି ସାରିଛି । ହୁଏତ ଆଗକୁ ଏ ସଂଖ୍ୟା ବୃଦ୍ଧି ପାଇବ । ଆଇଓଏ ସଭାପତି ପିଟି ଉଷା କହିଛନ୍ତି, ‘ଆମେ ବହୁତ ଖୁସି ଯେ ପ୍ୟାରିସ ଅଲିମ୍ପିକ୍ସ ପାଇଁ ଏଭଳି ଅଫିସିଆଲ ଆମେ ଚୟନ କରିଛୁ, ଯେଉଁମାନଙ୍କର କ୍ରୀଡ଼ାପ୍ରତି ଗଭୀର ଅନୁରାଗ ରହିଛି ଏବଂ ସେମାନଙ୍କ ଦ୍ୱାରା କ୍ରୀଡ଼ାବିତ ଅନୁପ୍ରାଣିତ ହେବେ ଏବଂ ଦେଶକୁ ଗୌରବାନ୍ୱିତ କରିବେ ।’ ପ୍ୟାରିସ କ୍ରୀଡ଼ାରେ ୧୦,୫୦୦ ଜଣ କ୍ରୀଡ଼ାବିତ ଅଂଶ ଗ୍ରହଣ କରିବେ ।
ଗତ ଥର ୧୨୨ ଜଣ କ୍ରୀଡ଼ାବିତ ଭାରତୀୟ ଦଳରେ ସାମିଲ ରହିଥିଲେ । ଆଶା ଏଥର ଏ ସଂଖ୍ୟା ବୃଦ୍ଧି ପାଇବ । ଏ ପର୍ଯ୍ୟନ୍ତ ତୀରନ୍ଦାଜୀ, ବକ୍ସିଂ, ଆଥଲେଟିକ୍ସ, ଅଶ୍ୱାରୋହଣ, ହକି, ସେଲିଂ, ସୁଟିଂ, ଟେବୁଲ ଟେନିସ ଓ କୁସ୍ତିରେ ୫୮ ଜଣ (୩୯ ପୁରୁଷ, ୧୯ ମହିଳା) ଖେଳାଳି ଅଲିମ୍ପିକ୍ସ ଟିକେଟ୍ ହାସଲ କରିଛନ୍ତି । ଗତ ସଂସ୍କରଣରେ ଗୋଟିଏ ସ୍ୱର୍ଣ୍ଣ ସହ ମୋଟ୍ ୭ଟି ପଦକ ମିଳିଥିଲା । ଏଥର ପଦକ ସଂଖ୍ୟା ଦୁଇ ଅଙ୍କ ଛୁଇଁବ ବୋଲି ଆଶା ରହିଛି ।
