ପ୍ୟାରିସ୍‌,୦୮/୦୯: ପ୍ୟାରିସ୍‌ ପାରାଲିମ୍ପିକ୍ସର  ଦଶମ ଦିବସରେ ଭାରତକୁ ଆଉ ୨ଟି ପଦକ ମିଳିଛି ।  ପୁରୁଷ ଜାଭେଲିନ୍‌ (ଏଫ୍‌-୪୧)ରେ ନବଦୀପ ସ୍ୱର୍ଣ୍ଣ  ଏବଂ ମହିଳା ୨୦୦ମିଟର (ଟି-୧୨)ରେ ସିମରନ  ବ୍ରୋଞ୍ଜ ପଦକ ଜିତିଛନ୍ତି । ଏଥିସହ ଭାରତର ପଦକ  ସଂଖ୍ୟା ୨୯କୁ ବୃଦ୍ଧି ପାଇଛି । ସେଥିମଧ୍ୟରେ ୭ ସ୍ୱର୍ଣ୍ଣ,  ୯ ରୌପ୍ୟ ଏବଂ ୧୩ ବ୍ରୋଞ୍ଜ ପଦକ ସାମିଲ ରହିଛି । 

ଜାଭେଲିନ୍‌: ପାରା ଆଥଲେଟିକ୍ସ ବିଶ୍ୱ  ଚାମ୍ପିଅନସିପ୍‌ ବ୍ରୋଞ୍ଜ ପଦକ ବିଜେତା ନବଦୀପ  ୪୭.୩୨ମିଟର ଥ୍ରୋ କରି ଦ୍ୱିତୀୟ ସ୍ଥାନ ଅଧିକାର କରିଥିଲେ । ସେ ନିଜର ତୃତୀୟ ପ୍ରୟାସରେ ଏହି  ଦୂରତା ଛୁଇଁଥିଲେ । ଏହା ତାଙ୍କ କ୍ୟାରିୟର ଶ୍ରେଷ୍ଠ  ପ୍ରଦର୍ଶନ ରହିଥିଲା । ମାତ୍ର ପ୍ରଥମ ସ୍ଥାନ ଅଧିକାର  କରିଥିବା ଇରାନର ସାଦେଖ ବିଏଟ ସାୟା ଅଯୋଗ୍ୟ  ଘୋଷିତ ହେବା ଫଳରେ ନବଦୀପଙ୍କୁ ସ୍ୱର୍ଣ୍ଣ ପଦକ  ମିଳିଥିଲା । ସାଦେଖ ୫୭.୬୪ମିଟର ଥ୍ରୋ କରିଥିଲେ ।  ଚୀନର ପେଙ୍ଗଜିୟାଙ୍ଗ୍‌ ସନ ୪୪.୭୨ମିଟର ସହ  ରୌପ୍ୟ ଏବଂ ଇରାକର ୱିଲଡାନ ୪୦.୪୬ମିଟର  ସହ ବ୍ରୋଞ୍ଜ ପଦକ ହାସଲ କରିଛନ୍ତି । ନବଦୀପ  ପୂର୍ବରୁ ୨୦୧୯ରେ ୨୦ବର୍ଷରୁ କମ୍‌ ବିଶ୍ୱ  ଚାମ୍ପିଅନସିପ୍‌ରେ ସ୍ୱର୍ଣ୍ଣ ପଦକ ଜିତି ଲୋକଲୋଚନକୁ  ଆସିଥିଲେ । ଗତ ଟୋକିଓ ପାରାଲିମ୍ପିକ୍ସରେ ସେ  ଚତୁର୍ଥ ସ୍ଥାନରେ ରହି ଅଳ୍ପକେ ପଦକରୁ  ବଞ୍ଚିତ ଥିଲେ । ମାତ୍ର ଏଥର ସେ  ପାରାଲିମ୍ପିକ୍ସ ସ୍ୱପ୍ନ ପୂରଣ କରିଛନ୍ତି । 

ମହିଳା ୨୦୦ମିଟର: ଦୃଷ୍ଟି ବାଧିତ  ମହିଳା ଆଥଲେଟ୍‌ ସିମରନ ନିର୍ଦ୍ଧାରିତ  ଦୂରତାକୁ ୨୪.୭୫ ସେକେଣ୍ଡ୍‌ରେ ଶେଷ କରି ତୃତୀୟ  ସ୍ଥାନରେ ରହି ବ୍ରୋଞ୍ଜ ପଦକ ହାସଲ କରିଥିଲେ ।  ତାଙ୍କ ସହ ଗାଇଡ୍‌ ଅଭୟ ସିଂହ ଦୌଡ଼ିଥିଲେ ।  କ୍ୟୁବାର ପ୍ରସିଦ୍ଧ ଆଥଲେଟ୍‌ ଓମାରା ଡୁରାଣ୍ଡ ଏଲିଆସ୍‌  ୨୩.୬୨ ସେକେଣ୍ଡ ସହ ସ୍ୱର୍ଣ୍ଣ ଏବଂ ଭେନେଜୁଏଲାର  ଆଲେଜାନ୍ଦ୍ରା ପାଓଲା ପେରେଜ ଲୋପେଜ ୨୪.୧୯  ସେକେଣ୍ଡ ସହ ରୌପ୍ୟ ପଦକ ଜିତିଛନ୍ତି । ଓମାରା  କ୍ରମାନ୍ୱୟରେ ତୃତୀୟ ଥର ଟାଇଟଲ୍‌ ବଜାୟ ରଖିଛନ୍ତି ।  ଇତିମଧ୍ୟରେ ସେ ପାରାଲିମ୍ପିକ୍ସରେ ମୋଟ ୧୧ଟି ସ୍ୱର୍ଣ୍ଣ  ପଦକ ଜିତିଛନ୍ତି । ସେ ଭାଗ ନେଇଥିବା ସମସ୍ତ  ଇଭେଣ୍ଟରେ ଅପ୍ରତିଦ୍ୱନ୍ଦ୍ୱୀ ସାବ୍ୟସ୍ତ ହୋଇଛନ୍ତି । 

କାନୋଏ: ନିରାଶ କଲେ ପ୍ରାଚୀ ମହିଳା ୨୦୦ମିଟର (ଭିଏଲ୍‌-୨) ଇଭେଣ୍ଟରେ  ପ୍ରାଚୀ ଯାଦବ ଫାଇନାଲ୍‌ରେ ଅଷ୍ଟମ ସ୍ଥାନରେ ରହି ବିଦାୟ ନେଇଥିଲେ । ସେ ନିର୍ଦ୍ଧାରିତ ଦୂରତାକୁ  ୧:୦୮.୫୫ ସେକେଣ୍ଡରେ ଶେଷ କରିଥିଲେ ।  ବ୍ରିଟେନର ଏମ୍ମା ୱିଗ୍ସ (୫୮.୮୮) ସ୍ୱର୍ଣ୍ଣ, କାନାଡ଼ାର  ବ୍ରିୟାନା ହେନେସି (୧:୦୦.୧୨) ରୌପ୍ୟ ଏବଂ  ଅଷ୍ଟ୍ରେଲିଆର ସୁସାନ ସିପଲ (୧:୦୧.୩୯)  ବ୍ରୋଞ୍ଜ ପଦକ ଜିତିଥିଲେ । ପୂର୍ବରୁ ସେମି  ଫାଇନାଲ୍‌ରେ ପ୍ରାଚୀ ତୃତୀୟ ସ୍ଥାନରେ  ରହି ଫାଇନାଲ୍‌ରେ ସ୍ଥାନ ପକ୍କା କରିଥିଲେ । 

ସୁଇମିଂ: ସୂୟାଶଙ୍କ ଅଭିଯାନ ଶେଷ ପୁରୁଷ ୫୦ମିଟର ବଟରଫ୍ଲାଏ (ଏସ୍‌-୭)  ଇଭେଣ୍ଟରେ ସୂୟାଶ ନାରାୟଣ ଯାଦବ ଫାଇନାଲ୍‌କୁ  ଯୋଗ୍ୟତା ଅର୍ଜନ କରିବାରେ ବିଫଳ ହୋଇଛନ୍ତି । ହିଟ୍‌୧ ପ୍ରତିଦ୍ୱନ୍ଦ୍ୱିତା କରିଥିବା ସୂୟାଶ ୩୩.୪୭ ସେକେଣ୍ଡ  ସହ ପଞ୍ଚମ ସ୍ଥାନରେ ରହି ବିଦାୟ ନେଇଥିଲେ