ନୂଆଦିଲ୍ଲୀ, ୩୧/୦୧ : ସଂସଦରେ ବଜେଟ ଅଧିବେଶନ ଆରମ୍ଭ ହୋଇଛି। ଏହା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିରୋଧୀଙ୍କୁ କଟାକ୍ଷ କରିଛନ୍ତି। ସଂସଦରେ ହଙ୍ଗାମା କରୁଥିବା ବିରୋଧୀ ଦଳକୁ ଟାର୍ଗେଟ୍ କରିଛନ୍ତି। ସେ କହିଛନ୍ତି ଯେ, ଗତ ୧୦ ବର୍ଷ ମଧ୍ୟରେ ଯାହାର ଯେମିତି ଇଚ୍ଛା ସେ ସେମିତି ଭାବରେ ସଂସଦରେ କାର୍ଯ୍ୟ କରିଛନ୍ତି। ସଂସଦରେ ହଙ୍ଗାମା କରିବା କିଛି ଲୋକଙ୍କ ଅଭ୍ୟାସ ପାଲଟିଛି। ଯେଉଁମାନେ ଏଭଳି ଅଭ୍ୟାସଗତ ଭାବରେ ଲୋକତାନ୍ତ୍ରିକ ମୂଲ୍ୟବୋଧର ଚିରହରଣ କରନ୍ତି ସେମାନେ ଆତ୍ମନିରୀକ୍ଷଣ କରନ୍ତୁ। ୧୦ ବର୍ଷ ମଧ୍ୟରେ ସେମାନେ ନିଜ ସଂସଦୀୟ କ୍ଷେତ୍ର ପାଇଁ ଯେଉଁ କାର୍ଯ୍ୟ କରିଛନ୍ତି ତାହା ୧୦୦ ଲୋକଙ୍କୁ ପଚାରି ବୁଝନ୍ତୁ, କେହି ମନେ ରଖି ନଥିବେ। କିନ୍ତୁ ଯେଉଁମାନେ ଉତ୍ତମ ବିଚାର ସହ ସଂସଦକୁ ଲାଭାନ୍ଵିତ କରିଛନ୍ତି, ସେମାନଙ୍କୁ ଲୋକ ଆଜି ବି ମନେ ପକାଉଛନ୍ତି। ପ୍ରଶଂସା କରୁଛନ୍ତି। ଏ ବଜେଟ୍ ଅଧିବେଶନ ସେମାନଙ୍କ ପଶ୍ଚାତାପର ସମୟ।

ପ୍ରଧାନମନ୍ତ୍ରୀ କହିଛନ୍ତି ଯେ, ନିର୍ବାଚନ ସମୟ ନିକଟ ହେଲେ ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପନ ହୁଏ ନାହିଁ। ଆମେ ବି ସେହି ନିୟମ ପାଳନ କରିବୁ। ସରକାର ଆସିବା ପରେ ପୂର୍ଣ୍ଣାଙ୍ଗ ବଜେଟ୍ ଆସିବ। ଅର୍ଥ ମନ୍ତ୍ରୀ ନିର୍ମଳା ସୀତାରମଣ ଆସନ୍ତାକାଲି ବଜେଟ୍ ଉପସ୍ଥାପନ କରିବେ। ଦେଶ ନିତ୍ୟ ପ୍ରଗତିର ଶିଖର ଛୁଇଁ ଆଗକୁ ବଢିବ ବୋଲି ମୋର ଆଶା ରହିଛି। 

ପ୍ରଧାନମନ୍ତ୍ରୀ ପୁଣି କହିଛନ୍ତି ଯେ, ନୂଆ ସଂସଦ ଭବନରେ ପ୍ରଥମ ଅଧିବେଶନରେ ନାରୀ ଶକ୍ତି ବନ୍ଦନ ଅଧିନିୟମ ହୋଇଥିଲା। ଏହାପରେ ଜାନୁଆରୀ ୨୬ରେ କର୍ତ୍ତବ୍ୟ ପଥରେ ନାରୀ ଶକ୍ତିର ସାମର୍ଥୟ ଏବଂ ଶୌର୍ଯ୍ୟ ଦେଖିବାକୁ ମିଳିବ। ଆଜି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ମାର୍ଗ ଦର୍ଶନରେ ବଜେଟ ଅଧିବେଶନ ଆରମ୍ଭ ହୋଇଛି। ଆସନ୍ତାକାଲି ନିର୍ମଳା ସୀତାରମଣଙ୍କ ଦ୍ଵାରା ବଜେଟ ଉପସ୍ଥାପନ ହେବ। ଏହା ଏକ ପ୍ରକାରର ନାରୀ ଶକ୍ତିର ସାକ୍ଷାତକାରର ପର୍ବ।