ନୂଆଦିଲ୍ଲୀ ୩୦/୦୩: ବେଳେବେଳେ ଛୋଟ ଛୋଟ କଥାକୁ ନେଇ ଝଗଡ଼ା ହେବାରୁ ଦମ୍ପତିଙ୍କ ମଧ୍ୟରେ ସଂପର୍କ ତୁଟିଯାଇଥାଏ । ଏହି ବ୍ରେକଅପ୍ ଉଭୟ ପକ୍ଷ ପାଇଁ କଷ୍ଟଦାୟକ । କେହି କେହି ଦମ୍ପତି ବ୍ରେକ୍ଅପ୍ ପରେ ପରସ୍ପରଠାରୁ ଦୂରତା ବଜାୟ ରଖୁଥିବାବେଳେ କିଛି ପ୍ରତିଶୋଧ ପରାୟଣ ମଧ୍ୟ ହୋଇପଡ଼ିଥାନ୍ତି । ଏହି କ୍ରମରେ ନିକଟରେ ଜଣେ ମହିଳା ନିଜ ବ୍ରେକଅପ୍ ପରର ଅନୁଭୂତିକୁ ସୋସିଆଲ ମିଡିଆରେ ସେୟାର କରିଛନ୍ତି ଯାହା ଭାଇରାଲ୍ ହେଉଛି । ମହିଳାଙ୍କ ବୟଫ୍ରେଣ୍ଡ ଜଣେ ଲାଇସେନ୍ସପ୍ରାପ୍ତ ପାଣିପାଇପ୍ ମିସ୍ତ୍ରୀ । ବ୍ରେକଅପ୍ ପରେ ତାଙ୍କ ଶୌଚାଳୟ ପ୍ୟାନ୍ଟିକୁ ନେଇ ପଳାଇଥିବା ମହିଳା ଜଣକ ଉଲ୍ଲେଖ କରିଛନ୍ତି ।
ସୋସିଆଲ ମିଡିଆରେ ମହିଳା କରିଥିବା ପୋଷ୍ଟ ଅନୁସାରେ, ତାଙ୍କର ବୟଫ୍ରେଣ୍ଡ ଖାଇବାକୁ ଗଲେ କଦାପି ନିଜ ଭାଗର ବିଲ୍ ପଇଠ କରୁନଥିଲେ । ହୋଟେଲ୍ ବା ରେସ୍ତୋରାଁର କୌଣସି କର୍ମଚାରୀଙ୍କୁ ଟିପ୍ସ ବି ଦେଉନଥିଲେ । ବୟଫ୍ରେଣ୍ଡଙ୍କର ଆଉ କିଛି ଗୁଣ ବି ତାଙ୍କର ପସନ୍ଦ ନଥିଲା । ଏଭଳିସ୍ଥଳରେ ନିକଟରେ ଦିନେ ଏକ ବଡ଼ ଧରଣର ଝଗଡ଼ା ପରେ ଉଭୟଙ୍କର ବ୍ରେକଅପ୍ ହୋଇଗଲା । ଏହାପରେ ମହିଳା ରାଗି ଯାଇ ନିଜ ବେଡରୁମ୍ରେ ଶୋଇପଡ଼ିଲେ । ସେପଟେ ତାଙ୍କ ବୟଫ୍ରେଣ୍ଡ ନିଜ ଜିନିଷପତ୍ର ବନ୍ଧାବନ୍ଧି କରି ସେଠାରୁ ବାହାରିଯିବାକୁ ପ୍ରସ୍ତୁତ ହେଉଥିଲେ । ଇତିମଧ୍ୟରେ ମହିଳାଙ୍କୁ ନିଦ ହୋଇଗଲା । ତେବେ ସେ ଉଠିବାବେଳକୁ ଆଶ୍ଚର୍ଯ୍ୟ ହୋଇଗଲେ । କାରଣ ବୟଫ୍ରେଣ୍ଡ ଘରର ଶୌଚାଳୟରୁ ପ୍ୟାନ୍ ଉଠାଇ ନେଇ ଚାଲିଯାଇଥିଲେ । ପାଣିପାଇପ୍ ମିସ୍ତ୍ରୀ ହୋଇଥିବାରୁ ସେ ନିଜର ଦକ୍ଷତାକୁ ପ୍ରଦର୍ଶନ କରିଥିଲେ। ଘରେ ଆଉ ଶୌଚାଳୟ ନ ଥିବାରୁ ମହିଳାଜଣକ ବାଧ୍ୟହୋଇ ନିକଟବର୍ତ୍ତୀ ଦୋକାନକୁ ଗଲେ । ଅବଶ୍ୟ ପରେ ସେ ଏକ ନୂଆ ପ୍ୟାନ୍ ଲଗାଇଛନ୍ତି । ମହିଳାଙ୍କର ଏହି ବ୍ରେକଅପ୍ କାହାଣୀକୁ ଅନେକ ମଜାଦାର ଆଖ୍ୟା ଦେଇଛନ୍ତି ।