ନୂଆଦିଲ୍ଲୀ ୧୮/୦୩ : ଘରେ କେହିନଥିବା ସୁଯୋଗରେ ଚୋର ପଶି ଟଙ୍କା, ସୁନା, ଦାମୀ ଗହଣା, ଲାପଟପ୍ ଓ ଅନ୍ୟ ମୂଲ୍ୟବାନ ବସ୍ତୁ ଚୋରି କରୁଥିବାର ଘଟଣା ଅଧିକାଂଶ ସମୟରେ ନଜରକୁ ଆସିଥାଏ । ତେବେ ଥାଇଲାଣ୍ଡ ଫୁକେତ୍ ସହରର ପାଟୋଙ୍ଗ ପୁଲିସ ପାଇଁ ଏକ ନିଆରା ଧରଣର ଚୋରି ମୁଣ୍ଡବ୍ୟଥାର କାରଣ ପାଲଟିଛି । ସେଠାରେ କେହି ଘର ଆଗରେ ଶୁଖୁଥିବା ମହିଳାମାନଙ୍କର ଅଣ୍ଡରଗାର୍ମେଣ୍ଟ ଚୋରି କରିନେଉଥିବାର ବହୁ ଅଭିଯୋଗ ଆସିବା ପରେ ପୁଲିସ ଚୋରର ସନ୍ଧାନ କରୁଛି ।
ଚଳିତମାସ ଆରମ୍ଭରେ ପ୍ରଥମେ ଜଣେ ମହିଳା ଏ ନେଇ ଅଭିଯୋଗ କରିଥିଲେ । ଏହାପରେ ନିକଟସ୍ଥ ଘରଗୁଡି଼କରେ ଲାଗିଥିବା ସିସିଟିଭି ଫୁଟେଜ୍ର ଯାଞ୍ଚ କରାଗଲା । ସେଥିରୁ ନୀଳ ରଙ୍ଗର ଟି-ସାର୍ଟ ଓ କଳା ରଙ୍ଗର ସର୍ଟସ୍ ପିନ୍ଧିଥିବା ଜଣେ ବ୍ୟକ୍ତି କେତେଗୁଡି଼ଏ ଅଣ୍ଡରଗାର୍ମେଣ୍ଟ ଚୋରି କରି ନେଉଥିବା ଦେଖିବାକୁ ମିଳିଲା । ସେହି ଫୁଟେଜ୍ ସ୍ଥାନୀୟ ସୋସିଆଲ ମିଡିଆ ଚ୍ୟାନେଲଗୁଡ଼ିକରେ ଭାଇରାଲ୍ ହେବା ପରେ ଆହୁରି ବହୁ ସଂଖ୍ୟକ ମହିଳା ନିଜ ନିଜର ଅଣ୍ଡରଗାର୍ମେଣ୍ଟ ଚୋରି ନେଇ ଅଭିଯୋଗ କରିଛନ୍ତି ।
ସେମାନଙ୍କ ଅନୁସାରେ, ଘର ବାହାରେ ଶୁଖୁଥିବା ଅଣ୍ଡରଗାର୍ମେଣ୍ଟ ଚୋରି ହୋଇଯିବା ସେମାନଙ୍କୁ ଚିନ୍ତିତ କରୁଛି । ଏହି ଛୋଟ ମୋଟ ଚୋରି କରୁଥିବା ବ୍ୟକ୍ତି ଯେ ସେଠାରେ ବଡ଼ ଧରଣର ଚୋରି ନ କରିବେ ତାହା କିଏ କହିବ । ତେଣୁ ଅଭିଯୁକ୍ତ ତୁରନ୍ତ ଗିରଫ ହେବା ଦରକାର । ଏହାପରେ ପୁଲିସ ସିସିଟିଭି ଫୁଟେଜ୍ ଆଧାରରେ ଅଭିଯୁକ୍ତଙ୍କୁ ଧରିବା ଲାଗି ଉଦ୍ୟମ କରୁଛି । ସେହି ଅଞ୍ଚଳରେ ରହୁଥିବା ଲୋକଙ୍କୁ ମଧ୍ୟ ପଚରାଉଚରା କରୁଛି । ମାସକ ପୂର୍ବରୁ ବ୍ୟାଙ୍କକ୍ରେ ମଧ୍ୟ ସମାନ ଧରଣର ଘଟଣା ସାମ୍ନାକୁ ଆସିଥିଲା । ସେଠାକାର ନୋଇ ଜିଲ୍ଲାରୁ ପୁଲିସ ମହିଳାଙ୍କ ଅଣ୍ଡରଗାର୍ମେଣ୍ଟ ଚୋରି କରୁଥିବା ଅଭିଯୋଗରେ ଜଣେ ୩୮ ବର୍ଷୀୟ ବ୍ୟକ୍ତିଙ୍କୁ ଗିରଫ କରିଥିଲା । ତାଙ୍କ ଆପାର୍ଟମେଣ୍ଟରେ ଚଢ଼ାଉ ହେବା ପରେ ଅଧିକାରୀମାନେ ମହିଳାଙ୍କ ଅଣ୍ଡରଗାର୍ମେଣ୍ଟ ସମେତ ଚୋରି ହୋଇଥିବା ୫୯୧ଟି ଜିନିଷ ପାଇଥିଲେ । ଏହାପରେ ପୀଡ଼ିତାମାନଙ୍କୁ ସେମାନଙ୍କର ଜିନିଷ ଫେରାଇ ଦିଆଯାଇଥିଲା ।