ଭୁବନେଶ୍ୱର,୧୩/୦୯: ଚଳିତବର୍ଷ ଦୂର୍ଗାପୂଜାକୁ ଅପରାଧମୁକ୍ତ କରିବାକୁ କମିଶନରେଟ ପୁଲିସର ତତ୍ପରତା ଦେଖାଇଛି । ପାର୍ବଣ ପୂର୍ବରୁ ଦୁର୍ଦ୍ଦାନ୍ତ ଅପରାଧୀଙ୍କୁ ରାଜଧାନୀରୁ ତଡ଼ିପାର କରିବାକୁ ଗୁରୁତ୍ୱ ଦେଉଛି । ଏଥର ଦଶହରା ପୂଜା ପେଣ୍ଡାଲରେ ଦୁର୍ଦ୍ଦାନ୍ତ ଅପରାଧୀଙ୍କୁ ଦେଖିବାକୁ ମିଳିବନି । ଝାରପଡ଼ା ସ୍ୱତନ୍ତ୍ର କାରାଗାରରେ ଦଶହରା ସମୟ କାଟିବେ ଦାଗୀ । ଏନେଇ ସବୁ ଥାନା ସ୍ତରରେ ସ୍ୱତନ୍ତ୍ର ଅଭିଯାନ ଆରମ୍ଭ ହୋଇଥିବା ପୁଲିସ ଆୟୁକ୍ତ ସଞ୍ଜୀବ ପଣ୍ଡା କହିଛନ୍ତି ।
ବିଗତ ବର୍ଷରେ ପାର୍ବଣରେ ଆତଙ୍କ ଖେଳାଉଥିବା ଅଧିକାଂଶ ପେସାଦାର ଚୋର, ଲୁଟେରା ଏବେ କାରାଗାରରେ କଏଦୀ ଭାବେ ଅଛନ୍ତି । ତଥାପି କିଛି ଅଭ୍ୟାସଗତ ଏଥର ପାର୍ବଣରେ ଆତଙ୍କ ଖେଳାଇବା ଆଶଙ୍କା ରହିଛି । ଦୁର୍ଦ୍ଦାନ୍ତମାନେ ଦାଦାବଟି ମାଗିବାରେ ମାତିପାରନ୍ତି । ଏଭଳି ୩୦ ଜଣ ଦୁର୍ଦ୍ଦାନ୍ତ ଓ ପେସାଦାରଙ୍କ ଏକ ତାଲିକା ପ୍ରସ୍ତୁତ କରିଛି ପୁଲିସ । ସେମାନେ ପୂଜା ସମୟରେ ପଦାରେ ବୁଲିପାରିବେନି । ପାର୍ବଣରେ ପରିବାର ଲୋକଙ୍କ ସହ ରହିପାରିବେନି । ପ୍ରତିଦିନ ଥାନାରେ ହାଜିରା ନଦେଲେ ହାତକଡି଼ ପିନ୍ଧାଇବ ପୁଲିସ । ଚଳିତବର୍ଷ ୭ ଜଣ ଦୁର୍ଦ୍ଦାନ୍ତଙ୍କୁ ତଡି଼ପାର୍ କରାଯାଇଛି ।
ପାର୍ବଣ ବେଳେ ସହରରେ ଚୋରା ନିଶା କାରାବାର ବଢ଼ିବା ଆଶଙ୍କା ରହିଛି । ନିଶା କାରାବାର ଉପରେ ପୁଲିସ ତୀକ୍ଷ୍ମ ନଜର ରଖିବ । ମଦ, ଗଞ୍ଜେଇ ଓ ବ୍ରାଉନ୍ସୁଗର ବେପାରିଙ୍କୁ ଗୋଡ଼ାଇ ଗୋଡ଼ାଇ ଧରିବ । ପ୍ରତିଦିନ ସନ୍ଧ୍ୟାରେ ସହର ସାରା ବାଇକ୍ ପାଟ୍ରୋଲିଂ ଚାଲିଛି । ବିଭିନ୍ନ ଖଟିରେ ଅସାମାଜିକଙ୍କ ଉତ୍ପାତ ରୋକିବା ସହ ମଦ୍ୟପଙ୍କ ଗାଡ଼ିଚାଳନା ବନ୍ଦ କରିବାକୁ ଗୁରୁତ୍ୱ ଦିଆଯାଉଛି । ଦାଦାବଟି ଓ ପୂଜା ଚାନ୍ଦା ବାବଦରେ ତଥ୍ୟ ଦେବାକୁ ପୁଲିସ ସମସ୍ତଙ୍କୁ ପରାମର୍ଶ ଦେଇଛି ।
