ଭୋପାଳ: ମଧ୍ୟପ୍ରଦେଶର ନିର୍ବାଚନୀ ରାଲିରୁ ପାକିସ୍ତାନକୁ ଟାର୍ଗେଟ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଆତଙ୍କବାଦୀର ସପ୍ଲାୟର ଏବେ ଅଟା ପାଇଁ ବ୍ୟାକୁଳ ହେଉଛି ବୋଲି କହିଛନ୍ତି ମୋଦୀ । ସେ ଆହୁରି କହିଛନ୍ତି, ସମଗ୍ର ବଶ୍ବରେ ଏବେ ଯୁଦ୍ଧର ସ୍ଥିତି ଲାଗିରହିଛି । ଏଭଳି ସ୍ଥିତିରେ ଭାରତରେ ଦ୍ରୁତ ଅଭିବୃଦ୍ଧି ଜାରି ରହିଛି । ଦୁନିଆରେ ଯୁଦ୍ଧର ସଙ୍କଟ ଜାରି ରହିଥିବା ବେଳେ ଭାରତରେ ମଜଭୁତ ସରକାରର ଆବଶ୍ୟକତା ରହିଛି । ଏହି ନିର୍ବାଚନ ଭାରତକୁ ମହାଶକ୍ତି କରାଇବା ପାଇଁ ନିର୍ବାଚନ । ଏହି ନିର୍ବାଚନ ଭାରତର ଭବିଷ୍ୟତ ଲାଗି ନିର୍ବାଚନ ବୋଲି ମଧ୍ୟପ୍ରେଦଶର ଦମୋହରେ ଆୟୋଜିତ ନିର୍ବାଚନ ରାଲିରେ କହିଛନ୍ତି ପ୍ରଧାନମନ୍ତ୍ରୀ ମୋଦୀ ।
ପିଏମ ମୋଦୀ କହିଛନ୍ତି ଯେ, ବର୍ତ୍ତମାନ ବିଶ୍ବରେ ଭାରତର ଜୟ ଜୟ କାର ହେଉଛି । ଆଜି ଦେଶରେ ବିଜେପି ସରକାର ଅଛି । ଯିଏ କାହା ଚାପରେ କେବେ ଚେପା ହୋଇଛି ନା କାହା ଆଗରେ ମୁଣ୍ଡ ନୁଆଁଇଛି । ରାଷ୍ଟ୍ର ପ୍ରଥମ ଆମର ମୂଳ ସିଦ୍ଧାନ୍ତ । ଭାରତକୁ କିଭଳି ଶସ୍ତାରେ ତେଲ ମିଳିପାରିବ, ଏଥିପାଇଁ ଆମେ ଦେଶ ହିତରେ ନିଷ୍ପତ୍ତି ନେଇଛୁ । ଭାରତର କୃଷକଙ୍କୁ କିଭଳି ଖାଦ୍ୟ ମିଳିବ, ଏଥିପାଇଁ ଆମେ ଦେଶ ହିତରେ ନିଷ୍ପତ୍ତି ନେଇଛୁ ବୋଲି ମୋଦୀ କହିଛନ୍ତି । ସେ କହିଛନ୍ତି, ଆମେ କୋଟି କୋଟି ପରିବାରକୁ ମାଗଣା ରାସନ ଦେବା ଲାଗି ବ୍ୟବସ୍ଥା କରିଛୁ । ମାଗଣାରେ କରୋନା ଭ୍ୟାକ୍ସିନ ଦେଇଛୁ । ଆମ ପାଇଁ ଦେଶ ପ୍ରଥମ ବୋଲି ମୋଦୀ କହିଛନ୍ତି ।
ସେପଟେ ଇଣ୍ଡି ମେଣ୍ଟକୁ ଟାର୍ଗେଟ କରିବାକୁ ଯାଇ ମୋଦୀ କହିଛନ୍ତି ଯେ, ସେମାନେ ଦେଶର ପ୍ରତିରକ୍ଷାକୁ ପଛରେ ରଖିଥିଲେ । ବାୟୁ ସେନା କିଭଳି ପଛରେ ରହିବ ସେନେଇ ସମସ୍ତ ଶକ୍ତି ଖଟାଇ ଦେଇଥିଲା କଂଗ୍ରେସ । ଦେଶକୁ ରାଫେଲ ନଆସୁ ବୋଲି ଚାହୁଁଥିଲା କଂଗ୍ରେସ । ହେଲେ ଆମେ ୨୧ ହାଜର କୋଟି ଟଙ୍କାର ପ୍ରତିରକ୍ଷା ଉପକରଣ ରପ୍ତାନି କରିଛୁ। ଏବେ ଆମେ ବ୍ରହ୍ମୋସ୍ ମିସାଇଲ ଦେଉଛୁ ବୋଲି କହିଛନ୍ତି ପ୍ରଧାନମନ୍ତ୍ରୀ ମୋଦୀ ।