ନୂଆଦିଲ୍ଲୀ,୨୧।୫:  ପୁନେ ପୋର୍ସେ ଦୁର୍ଘଟଣା ମାମଲାରେ ଆସିଛି ବଡ ଅପଡେଟ୍। ପୁନେ ସିଟି ପୋଲିସ ମଙ୍ଗଳବାର ଅଭିଯୁକ୍ତ ନାବାଳକର ବାପା ବିଶାଳ ଅଗ୍ରଓ୍ବାଲଙ୍କୁ ଗିରଫ କରିଛି। ଏହା ସହିତ ୧୭ ବର୍ଷର ନାବାଳକକୁ ଦୁର୍ଘଟଣା ରାତିରେ ମଦ ପିଆଇବା ଅଭିଯୋଗରେ ବାର ମାଲିକ ଏବଂ ବାର ମ୍ୟାନେଜରଙ୍କୁ ଗିରଫ କରାଯାଇଛି। 

ସୂଚନା ଅନୁସାରେ, ୧୭ ବର୍ଷୀୟ ନାବାଳକ ଗାଡି ପୁଣେରେ ରବିବାର ରାତି ପ୍ରାୟ ସାଢେ ଦୁଇଟା ସମୟରେ ଏହି ଲଗଜରୀ କାର ଏକ ବାଇକକୁ ଧକ୍କା ଦେଇଥିଲା। ବାଇକରେ ଥିବା ଦୁଇ ସଫ୍ଟୱେୟାର ଇଞ୍ଜିନିୟର ଅନିସ ଅଓ୍ବାଧିକ ଓ ଅଶ୍ବୀନ କୋସ୍ତା ଙ୍କ ମୃତ୍ୟୁ ଘଟିଥିଲା। ଦୁର୍ଘଟଣା ରାତିରେ ନାବାଳିକା ଜଣକ ତାଙ୍କ ସାଙ୍ଗମାନଙ୍କ ସହିତ ଦୁଇଟି ସ୍ଥାନରେ ମଦ୍ୟପାନ କରିଥିଲା। ତାଙ୍କ ସହ ଜଣେ ଡ୍ରାଇଭର ମଧ୍ୟ ଥିଲେ। ଏହି ଘଟଣାରେ ପୀଡିତଙ୍କ ପରିବାର କହିଛନ୍ତି, ଏହା ଦୁର୍ଘଟଣା ନୁହେଁ ହତ୍ୟା। କାରଣ ନାବାଳକ ପାଖରେ ଲାଇସେନ୍ସ ନଥିଲା, ସେ ମଦ ପିଇଥିଲେ।  କେବଳ ସେତିକି ନୁହେଁ ପୋର୍ସେ  କାରକୁ ଘଣ୍ଟାକୁ ୨୪୦ କିଲୋମିଟର ସ୍ପିଡ୍‌ରେ ଚଳାଉଥିଲେ।’

ଏହି ପୋର୍ସେ କାରର ମୂଲ୍ୟ ୧.୬୧ କୋଟିରୁ ୨.୪୪ କୋଟି ଟଙ୍କା ରହିଛି। ତେବେ ଦୁର୍ଘଟଣାଗ୍ରସ୍ତ ଗାଡିର କୌଣସି ପଞ୍ଜୀକରଣ କିମ୍ବା କୌଣସି ନମ୍ବର ପ୍ଲେଟ୍ ନଥିବା ନେଇ ପୋଲିସ ଜାଣିବାକୁ ପାଇଛି। ମଦ୍ୟପାନ କରି ଗାଡ଼ି ଚଳାଉଥିବା ନାବାଳକର ଡ୍ରାଇଭିଂ ଲାଇସେନ୍ସ ମଧ୍ୟ ନଥିବା ନେଇ ପୋଲିସ ସୂଚନା ଦେଇଛି। ହିଟ୍ ଆଣ୍ଡ ରନ୍ ମାମଲାରେ ପୋଲିସ ପୋର୍ସେ କାର ଚଳାଉଥିବା ନାବାଳିକାର ଗିରଫ କରି  ଘଟଣାର ତଦନ୍ତକୁ ଆଗକୁ ବଢାଇଛି।

ଏଫଆଇଆର ଅନୁସାରେ, ନାବାଳକର ବାପା ଜାଣିଥିଲେ ଯେ, ତାଙ୍କ ପୁଅ ପାଖରେ ଲାଇସେନ୍ସ ନାହିଁ, କାର ଚଳାଇବାକୁ ଦେଇଥିଲେ। ତାକୁ ପାର୍ଟି ଓ ମଦ ପିଇବାକୁ ମଧ୍ୟ ବାରଣ କରୁନଥିଲେ। ପୀଡିତଙ୍କ ପରିବାର କହିଛନ୍ତି, ଅଭିଯୁକ୍ତର ଜାମିନ ରଦ୍ଦ କରାଯାଉ। ଉଲ୍ଲେଖନୀୟ ଯେ, ଗିରଫ ହେବାର ୧୫ ଘଣ୍ଟା ଭିତରେ ଅଭିଯୁକ୍ତ ନାବାଳକୁ ପୁନେ କୋର୍ଟ କିଛି ସର୍ତ୍ତ ସହ ବେଲ୍ ଦେଇଥିଲେ। ଅଭିଯୁକ୍ତ ସଡକ  ଦୁର୍ଘଟଣାର ପ୍ରଭାବ ଓ ସମାଧାନ ସମ୍ପର୍କରେ ୩୦୦ ଶବ୍ଦରେ ରଚନା ଏବଯ ଟ୍ରାଫିକ୍ ପୋଲିସ ସହ ୧୫ ଦିନ କାମ କରିବାକୁ ନିର୍ଦେଶ ଦେଇଥିଲେ।ଏହା ସହ ନିଶାମୁକ୍ତ କେନ୍ଦ୍ର ଯାଇ ମଦ ନିଶା ଛଡାଇବାକୁ କୁହାଯାଇଛି। ତେବେ ଅଭିଯୁକ୍ତର ବୟସ ୧୭ ବର୍ଷ ୮ ମାସ ହୋଇଥିବାରୁ ପୋଲିସ କହିଛି, ଦୁର୍ଘଟଣା କରିଥିବା ନାବାଳକ ଉପରେ ଆଡଲ୍ଟ ଅନୁସାରେ, ମାମଲା ଚାଲିବାକୁ  ହାଇକୋର୍ଟଙ୍କୁ ନିବେଦନ କରିବେ।