ପୁରୀ, ୪/୬ : ନରେନ୍ଦ୍ର ପୋଖରୀ ବାଣ ବିସ୍ପୋରଣ ଘଟଣା। ଏଥିରେ ୪ ଅଭିଯୁକ୍ତ ଗିରଫ । ତେବେ ରବିବାର ଦିନ ନିମାପଡା ବ୍ଲକର ଚାରିଛକ ଥାନା ଅଞ୍ଚଳର ୪ ଜଣ ବାଣ ବେପାରୀକୁ ପୋଲିସ ଗିରଫ କରି କୁମ୍ଭାରପଡା ଥାନାରେ ଅଟକ ରଖି ପଚରାଉଚରା କରିଥିଲା । ଆଜି ସେମାନଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ଗିରଫ ହୋଇଥିବା ୪ ଅଭିଯୁକ୍ତ ହେଲେ ଚାରିଛକ ଅଞ୍ଚଳର ପ୍ରଶାନ୍ତ କୁମାର ନାୟକ, ଟୁକୁ ରଞ୍ଜନ ସ୍ୱାଇଁ, ବୁଧି ଭୋଇ ଏବଂ ଜଗନ୍ନାଥ ରାଉତ ବୋଲି ଜଣାପଡିଛି । ପୋଲିସ ୧୮୧/୨୪ରେ ଏକ ମାମଲା ରୁଜୁ କରି ତଦନ୍ତ ଚଳାଇଛି ।
ସୂଚନା ମୁତାବକ, ଗତ ୨୯ ତାରିଖ ଦିନ ମହାପ୍ରଭୁଙ୍କ ଭଉଁରୀ ଅବସରରେ ପୁରୀ ନରେନ୍ଦ୍ର ପୁଷ୍କରିଣୀର ଦେବୀଘାଟ ନିକଟରେ ବାଣ ବିସ୍ପୋରଣ ଘଟିଥିଲା । ଯେଉଁଥିରେ ୩୫ରୁ ଅଧିକ ବ୍ୟକ୍ତି ଆହାତ ହୋଇଥିଲେ । ଆହତମାନଙ୍କୁ ପ୍ରଥମେ ପୁରୀ ସଦର ମୁଖ୍ୟ ଚିକିତ୍ସାଳୟ ଓ ପରେ ଭୁବନେଶ୍ୱର ଓ କଟକର ବିଭିନ୍ନ ମେଡିକାଲରେ ଭର୍ତ୍ତି କରାଯାଇଥିଲା । ତେବେ ଆହତଙ୍କ ମଧ୍ୟରୁ ଏବେ ସୁଦ୍ଧା ୧୩ ଜଣଙ୍କ ମୃତ୍ୟୁ ଘଟିଥିବା ବେଳେ ଅନେକ ଆହତ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି । ତେବେ ବିନା ଅନୁମତିରେ ବାଣ ଫୁଟାଇବା ଓ ଅଘଟଣକୁ ନେଇ ପୋଲିସ ପକ୍ଷରୁ ନିଜ ଆଡୁ ଏକ ମାମଲା ରୁଜୁ କରାଯାଇ ତଦନ୍ତ ଆରମ୍ଭ କରାଯାଇବା ବେଳେ ଆଜି ସେମାନଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି ।