ଭୁବନେଶ୍ୱର, ୨୦।୩: ଟ୍ରେନ୍ରେ ଯାତାୟାତ କରୁଥିବା ଯାତ୍ରୀଙ୍କ ପାଇଁ ଖୁସି ଖବର । ଏଣିକି ରେଳ ଷ୍ଟେସନରେ ରହିବ ୱାନ୍ କ୍ୟୁଆର୍ କୋଡ୍ ମେସିନ । ଗତକାଲି ଭୁବନେଶ୍ୱର ରେଳ ଷ୍ଟେସନସ୍ଥିତ ଅନରିଜର୍ଭଡ ଟିକେଟିଂ ସିଷ୍ଟମ(ୟୁଟିଏସ) କାଉଣ୍ଟରରେ ପ୍ରଥମ ଥର ଏକ କ୍ୟୁଆର କୋଡ୍ ମେସିନ ସ୍ଥାପନ ହୋଇଛି । ଏହି ମେସିନରେ ଥିବା କ୍ୟୁଆର କୋଡରେ ମୋବାଇଲ ଯୋଗେ ସ୍କାନ କରି ଟିକେଟ କରିପାରିବେ ଯାତ୍ରୀ । ଯଦି ଚାହିଁବେ ଏଟିଭିଏମରୁ ହାର୍ଡ କପି ବାହାର କରିବେ ନହେଲେ ସଫ୍ଟ କପି ସାଙ୍ଗରେ ନେବେ । ଏଥିସହ ଟଙ୍କା ପଇଠ ମଧ୍ୟ ଡିଜିଟାଲ ମାଧ୍ୟମରେ ହେବ ।
ତେଣୁ ଯେଉଁମାନେ କ୍ୟାସଲେସ ଚାହୁଁଥିବେ ସେମାନଙ୍କ ପାଇଁ ଏହା ବିଶେଷଭାବେ ସୁବିଧା ହେବ । ପୂର୍ବରୁ ଏଟିଭିଏମ ରେଳ ବିଭାଗ ତରଫରୁ ଆଗକୁ ସମସ୍ତ ରେଳ ଷ୍ଟେସନରେ ଏଭଳି ସୁବିଧା ଉପଲବ୍ଧ ହେବ । ପୂର୍ବରୁ ଭୁବନେଶ୍ୱର ରେଳ ଷ୍ଟେସନରେ ଅଟୋମେଟିକ୍ ଭେଣ୍ଡିଂ ଟିକେଟ୍ ମେସିନ ରହିଛି । ଏଥିରେ ମଧ୍ୟ ଟିକେଟ ହେଉଥିଲା । ହେଲେ ଏଥିରେ କ୍ୟାସଲେସ ବ୍ୟବସ୍ଥା ନଥିଲା । ଅପରପକ୍ଷେ, କ୍ୟୁଆର କୋଡ୍ ଟିକେଟିଂ ବ୍ୟବସ୍ଥା ଯୋଗୁ ପଞ୍ଜିକରଣ କେନ୍ଦ୍ରରୁ ଭିଡ଼ କମିବ ବୋଲି ଜଣେ ରେଳ ଯାତ୍ରୀ କହିଛନ୍ତି ।