ନୂଆଦିଲ୍ଲୀ ୨୮/୦୯ : କାଚ ବୋତଲ ଭିତରେ ୨୦୦ ବର୍ଷ ପୁରୁଣା ଚିଠି । ଫ୍ରାନ୍ସର ଏକ ପ୍ରତ୍ନତାତ୍ତ୍ୱିକ ସ୍ଥଳୀରେ କାମ କରୁଥିବା ଛାତ୍ର ସ୍ୱେଚ୍ଛାସେବୀଙ୍କର ଏକ ଟିମ୍ ଏହି ଅନନ୍ୟ ଆବିଷ୍କାର କରିଛନ୍ତି । ଗଲିଶ ଟାଉନ୍ରେ ଅବଶେଷଗୁଡ଼ିକର ଖନନ ସମୟରେ ସେମାନେ ଏକ ମାଟି ପାତ୍ର ପାଇଲେ । ତା’ ମଧ୍ୟରେ ଲୁଚାଯାଇଥିବା ଏକ କାଚ ବୋତଲ ସେମାନେ ଆବିଷ୍କାର କଲେ । ବୋତଲକୁ ପ୍ରାୟ ୨୦୦ ବର୍ଷ ଧରି ଲୁଚାଇ ରଖାଯାଇଥିଲା । ଏଥିରେ ଏକ ଚିଠି ଥିଲା । ସେଇଟି ଉକ୍ତ ସ୍ଥାନରେ କାମ କରିଥିବା ପୂର୍ବର ଜଣେ ପ୍ରତ୍ନତତ୍ତ୍ୱବିତ୍ଙ୍କର । ୟୁରୋପୀୟ ସଂଘର ଆଞ୍ଚଳିକ ପ୍ରତ୍ନତତ୍ତ୍ୱବିଜ୍ଞାନ ସେବାର ମୁଖ୍ୟ ଗୁଇଲମ୍ ବ୍ଲଣ୍ଡେଲଙ୍କୁ ଚିଠିର ଯାଞ୍ଚ୍ ଲାଗି ପଠାଯାଇଥିଲା । ବ୍ଲଣ୍ଡେଲ ବୋତଲଟିକୁ ଖୋଲି ଚିଠି ପଢ଼ିଲେ ।
ସେଥିରେ ଲେଖାଥିଲା, ‘ବିଭିନ୍ନ ବୌଦ୍ଧିକ ସଂସ୍ଥାର ସଦସ୍ୟ ଡାଇପ୍ପେ ବାସିନ୍ଦା ପିଜେ ଫେରେଟ୍ ୧୮୨୫ ମସିହାରେ ଏଠାରେ ଖନନ କରିଥିଲେ । ସାଇଟ୍ ଡି ଲାଇମ୍ସ ବା କାସାର୍ସ କ୍ୟାମ୍ପ୍ ନାମରେ ପରିଚିତ ଏହି ବିଶାଳ କ୍ଷେତ୍ରରେ ସେ ନିଜର ଯାଞ୍ଚ୍ ଜାରି ରଖିଛନ୍ତି ।’ ପିଜେ ଫେରେଟ୍ ସ୍ଥାନୀୟ ଅଞ୍ଚଳର ଜଣେ ପ୍ରସିଦ୍ଧ ବ୍ୟକ୍ତି ଥିଲେ । ନଗରନିଗମ ରେକର୍ଡରୁ ସ୍ପଷ୍ଟ ହୁଏ, ୨୦୦ ବର୍ଷ ତଳେ ସେ ଉକ୍ତ ସ୍ଥାନରେ ପ୍ରଥମେ ଖନନ କରିଥିଲେ । ଏହି ଆବିଷ୍କାରକୁ ନେଇ ପ୍ରତ୍ନତତ୍ତ୍ୱବିତ୍ ଓ ଐତିହାସିକମାନେ ଖୁବ୍ ଉତ୍ସାହିତ ଅଛନ୍ତି । ଏହି ଚିଠି ଗଲିଶ ଗାଁର ଇତିହାସ ବିଷୟରେ ଗୁରୁତ୍ୱପୂର୍ଣ୍ଣ ତଥ୍ୟ ଦେଇପାରେ ବୋଲି ସେମାନେ ଆଶା କରୁଛନ୍ତି । ପ୍ରାରମ୍ଭିକ ଊନବିଂଶ ଶତାବ୍ଦୀର ପ୍ରତ୍ନତାତ୍ତ୍ୱିକ ପ୍ରକ୍ରିୟା ବିଷୟରେ ମଧ୍ୟ ସେମାନଙ୍କୁ ଜ୍ଞାନ ମିଳିପାରିବ । ଯେଉଁ କାଚ ବୋତଲ ଭତରୁ ଚିଠି ମିଳିଛି, ତାହା ଏକ ପ୍ରକାର ଶିଶି ଥିଲା ଯାହାକୁ ମହିଳାମାନେ ଗଳାରେ ପିନ୍ଧୁଥିଲେ । ସେଥିରେ ଗନ୍ଧଯୁକ୍ତ ଲୁଣ ଭର୍ତ୍ତି କରାଯାଉଥିଲା ବୋଲି ଏହି ପ୍ରତ୍ନତାତ୍ତ୍ୱିକ ଅଭିଯାନ ଟିମ୍ର ମୁଖ୍ୟ ଗୁଇଲମ୍ ବ୍ଲଣ୍ଡେଲ କହିଛନ୍ତି ।
