ନୂଆଦିଲ୍ଲୀ, ୧୭/୦୩: ଋଷ ରାଷ୍ଟ୍ରପତି ନିର୍ବାଚନ ଲାଗି ତିନିଦିନ ଧରି ମତଦାନ ହେଉଥିବା ବେଳେ ଶନିବାର ଥିଲା ଦ୍ୱିତୀୟ ଦିନ । ନିର୍ବାଚନ ପ୍ରଚାର ଆରମ୍ଭ ମାତ୍ରେ ଋଷର ଲୋକଙ୍କ ମଧ୍ୟରେ ଭୋଟ୍ ନେଇ ସେତେଟା ଉତ୍ସାହ ଦେଖିବାକୁ ମିଳି ନଥିଲା । ତେବେ ପାଶ୍ଚାତ୍ୟ ଗଣମାଧ୍ୟମର ଦାବି ହେଉଛି, ଚଳିତ ନିର୍ବାଚନରେ ଋଷରେ ଖସିଛି ମତଦାନ ହାର ।

ଶନିବାର ଋଷର ନିର୍ବାଚନ ଆୟୋଗର ଉପାଧ୍ୟକ୍ଷ ନିକାଲେ ବୁଲାଏବ ଗଣମାଧ୍ୟମକୁ କହିଛନ୍ତି, ଦେଶବ୍ୟାପୀ ଏବେ ସୁଦ୍ଧା ୫୧.୭୭ ପ୍ରତିଶତ ମତଦାନ ହୋଇଛି । ଚଳିତଥର ମାର୍ଚ୍ଚ ୧୫ରୁ ୧୭ ପର୍ଯ୍ୟନ୍ତ ମତଦାନ ହେଉଛି । ଆଶା କରାଯାଉଛି, ରବିବାର ଶେଷ ଦିନରେ ମତଦାନ ପ୍ରତିଶତ ବୃଦ୍ଧି ପାଇବ ।

୨୦୨୦ରେ ଋଷ ସରକାରଙ୍କ ଦ୍ୱାରା ସମ୍ବିଧାନ ସଂଶୋଧନ ପରେ ଏହା ହେଉଛି ପ୍ରଥମ ନିର୍ବାଚନ । ସମ୍ବିଧାନ ସଂଶୋଧନ ପରେ ଭ୍ଲାଦିମିର୍ ପୁଟିନ୍ ୨୦୩୬ ପର୍ଯ୍ୟନ୍ତ ଋଷର ରାଷ୍ଟ୍ରପତି ରହିବା ନେଇ ରାସ୍ତା ସଫା ହୋଇ ଯାଇଥିଲା ।
ଏବେ ହେଉଥିବା ନିର୍ବାଚନରେ ପୁଟିନଙ୍କ ବିପକ୍ଷରେ ୪ ଜଣ ପ୍ରାର୍ଥୀ ଲଢ଼ୁଛନ୍ତି । ଲିବରେଲ୍ ଡେମୋକ୍ରେଟିକ୍ ପାର୍ଟି (LDPR)ର ଲିୟୋନିଦ 

ସ୍ଲଟସ୍କି, କମ୍ୟୁନିଷ୍ଟ ପାର୍ଟିର ନିକୋଲେ ଖାରିଟୋନୋବ ଏବଂ ନ୍ୟୁ ପିପଲ୍ ପାର୍ଟିର ସେବ୍ଲାଦିସ୍ଲାବ ଦାବାନକୋବ ଲଢ଼ୁଛନ୍ତି । କିନ୍ତୁ ଆଶା କରାଯାଉଛି, ପ୍ରତିଥର ଭଳି ଭ୍ଲାଦିମିର୍ ପୁଟିନ୍ ପଞ୍ଚମଥର ଲାଗି ବିଜୟୀ ହୋଇ ରାଷ୍ଟ୍ରପତି ହେବେ ।

ଋଷରେ ଶାନ୍ତି ଶୃଙ୍ଖଳାର ସହ ନିର୍ବାଚନ ଚାଲିଛି । କୌଣସି ସ୍ଥାନରେ ହିଂସା ହୋଇଥିବା ଖବର ଆସି ନାହିଁ । ଶନିବାର ସୁଦ୍ଧା ୩୯ ଲକ୍ଷରୁ ଅଧିକ ମତଦାତା ଭୋଟ୍ ଦେଇଥିବା ଜଣାପଡ଼ିଛି । ୨୦୨୨ ପରେ ୟୁକ୍ରେନ୍ ଠାରୁ ହାସଲ କରିଥିବା ଅଞ୍ଚଳରେ ଋଷ ମତଦାନ କରୁଛି । ଯାହାକୁ ୟୁକ୍ରେନ୍ ସହ ବିରୋଧ କରୁଛନ୍ତି ପାଶ୍ଚାତ୍ୟ ରାଷ୍ଟ୍ର ।