କଟକ ୦୧/୦୩: ଅଙ୍ଗ ଦାନ ମହତ ଦାନ। ମୃତ୍ୟୁ ପରେ ବି ଅନ୍ୟମାନଙ୍କ ଜୀବନ ବଞ୍ଚାଇ ଦେଲେ ସାଇ ଶିବୁ ଦାସ(ଓମ୍)। ବ୍ରେନ ଟ୍ୟୁମର ଜନିତ ରୋଗରେ ଆକ୍ରାନ୍ତ ହୋଇ ଜୀବନମରଣ ସହ ସଂଘର୍ଷ କରି ଆସୁଥିଲେ । ଶେଷରେ ମାତ୍ର ୧୭ ବର୍ଷ ବୟସରେ ସବୁଦିନ ପାଇଁ ଆଖି ବୁଜିଦେଇଛନ୍ତି । ତାଙ୍କ ମୃତ୍ୟୁ ପରେ ପରିବାର ଲୋକ ୨ଟି କିଡନୀ ଦାନ କରିଛନ୍ତି। ଏସସିବି ମେଡ଼ିକାଲରେ ଅର୍ଗାନ ଡୋନେଟ୍ କାର୍ଯ୍ୟ ସମ୍ପନ୍ନ ହୋଇଛି ।
କେନ୍ଦ୍ରାପଡା ଜିଲ୍ଲା ପଟ୍ଟାମୁଣ୍ତାଇ ଅଞ୍ଚଳର କଲେଜ ଛାତ୍ର ସାଇ ଶିବୁ। ବ୍ରେନ ଟ୍ୟୁମର ରୋଗରେ ପୀଡିତ ହୋଇ ଏସସିବି ମେଡିକାଲରେ ଚିକିତ୍ସିତ ହେଉଥିଲେ । ୨ ଦିନ ତଳୁ ତାଙ୍କର ବ୍ରେନ ଡେଡ୍ ହୋଇ ସାରିଥିଲା। ଶୁକ୍ରବାର ସକାଳୁ ସେ ଚିର ନୀଦ୍ରାରେ ଶୋଇଗଲେ ଓମ୍ । କିନ୍ତୁ ତା ପୂର୍ବରୁ ତାଙ୍କର ୨ଟି କିଡନୀ ଦାନ କରିବା ଲାଗି ପରିବାର ଲୋକ ସମ୍ମତି ପ୍ରଦାନ କରିଥିଲେ । ଯାହା ଆଜି ସଫଳତାର ସହ ସମ୍ପର୍ଣ୍ଣ ହୋଇଛି । ମୃତ୍ୟୁ ପୂର୍ବରୁ ଅର୍ଗାନ ଡୋନେଟ କରି ଏକ ନୂଆ ଅଧ୍ୟାୟ ସୃଷ୍ଟି କରିଛନ୍ତି ମୃତ ଛାତ୍ରଙ୍କ ପରିବାର ଲୋକେ ।
ଏସସିବି କର୍ତ୍ତୃପକ୍ଷ ସସମ୍ମାନେ ମୃତଦେହକୁ ପଟ୍ଟାମୁଣ୍ତାଇ ପଠାଇଛନ୍ତି । ସେଠାରେ ରାଷ୍ଟ୍ରୀୟ ମର୍ଯ୍ୟାଦାର ସହିତ ମୃତ ଛାତ୍ରଙ୍କର ଶେଷକୃତ୍ୟ ସମ୍ପର୍ଣ୍ଣ ହେବ । କେନ୍ଦ୍ରାପଡା କଲେଜରେ ପଢୁଥିବା ସାଇ ଶିବୁ ଜଣେ ମେଧାବୀ ଛାତ୍ର ଥିଲେ । ସ୍ବଭାବରେ ମଧ୍ୟ ଖୁବ ଶାନ୍ତ ଓ ମେଳାପି ଥିଲେ ସାଇ ଶିବୁ ।