ନୂଆଦିଲ୍ଲୀ,୩।୯:  ଆଟଲାସ୍ ସାଇକେଲ୍ସର ପୂର୍ବତନ ଅଧ୍ୟକ୍ଷ ସଲିଲ କପୁରଙ୍କ ଆତ୍ମହତ୍ୟା। ନିଜକୁ ଗୁଳି ମାରି ସେ ହାରିଛନ୍ତି ଜୀବନ। ଘଟଣାସ୍ଥଳରୁ ଏକ ସୁସାଇଡ୍ ନୋଟ୍ ମଧ୍ୟ ଜବତ ହୋଇଛି।   ଦିଲ୍ଲୀର ଏପିଜି ଅବଦୁଲ କଲାମ ମାର୍ଗ ସ୍ଥିତ ତାଙ୍କ ବାସଭବନରେ ସଲିଲ୍ ଆତ୍ମହତ୍ୟା କରିଥିବାର ଜଣାପଡିଛି। ମଧ୍ୟାହ୍ନ ପ୍ରାୟ ୨ଟା ୩୦ ମିନିଟ୍‌ରେ ପୋଲିସକୁ ତାଙ୍କ ଘରୁ ସୁସାଇଡ୍ ନୋଟ୍ ମିଳିଛି।

ପୋଲିସକୁ ମିଳିଥିବା ସୁସାଇଡ୍ ନୋଟ୍‌ରେ କପୁର କିଛି ଲୋକଙ୍କ ଉପରେ ଉତ୍ପୀଡନ ଅଭିଯୋଗ ଆଣିଛନ୍ତି। ଦିଲ୍ଲୀ  ପୋଲିସ କହିଛି ଯେ, ଆଟଲାସ୍ ସାଇକେଲ୍‌ର ପୂର୍ବତନ ଅଧ୍ୟକ୍ଷ ସଲିଲ୍‌ କପୁର ଏପିଜେ ଅବଦୁଲ କଲାମ ଲେନ୍ ସ୍ଥିତ ନିଜ ଘରେ ଆତ୍ମହତ୍ୟା କରିଛନ୍ତି। ପୋଲିସର ଏକ ଟିମ୍ ଘଟଣାସ୍ଥଳରେ ଉପସ୍ଥିତ ରହିଛି ଓ ମାମଲାର ତଦନ୍ତ କରୁଛି। ସଲିଲ୍‌ଙ୍କ ମୃତଦେହକୁ ପୋଲିସ କବଜାରେ ନେଇଛି ଓ ପୋଷ୍ଟମର୍ଟମ ପାଇଁ ହସ୍ପିଟାଲକୁ ପଟାଇଛି। ପୋଲିସ ଆତ୍ମହତ୍ୟାର ଧାରା ଅନୁସାରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।