ନୂଆଦିଲ୍ଲୀ: ନେଦରଲ୍ୟାଣ୍ଡର ଆଡେ ସହରରେ ଅବସ୍ଥିତ ଏକ ନାଇଟ୍ କ୍ଲବରେ ଅନେକ ଲୋକଙ୍କୁ ବନ୍ଧକ ରଖାଯାଇଥିବା ଖବର ସାମ୍ନାକୁ ଆସିଛି । ଏହି ସମୟ ମଧ୍ୟରେ ପୋଲିସ ଘଟଣାସ୍ଥଳରେ ପହଞ୍ଚି ସମଗ୍ର ଅଞ୍ଚଳକୁ କର୍ଡନ କରିଛି । ପୋଲିସ ଆଖପାଖ ଅଟ୍ଟାଳିକାରେ ଥିବା ୧୫୦ ଲୋକକୁ ଅନ୍ୟତ୍ର ସ୍ଥାନାନ୍ତର କରିଛି । ଏନେଇ ଜଣେ ପୋଲିସ ଅଧିକାରୀ ରହିଛନ୍ତି ଯେ, ଏହି ଘଟଣା ଡଚ୍ ସହରର ଆଡେ ସହରରେ ଘଟିଛି । କିଛି ଲୋକଙ୍କୁ ଏଠାରେ ବନ୍ଧକ ରଖାଯାଇଥିଲା । ଏବେ ସମସ୍ତ ବନ୍ଧକଙ୍କୁ ମୁକ୍ତ କରାଯାଇଛି । ଏହି ଘଟଣାରେ ଜଣକୁ ଗିରଫ କରାଯାଇଛି । ଏବେ ଏହି ଘଟଣା ସମ୍ପୂର୍ଣ୍ଣ ନିୟନ୍ତ୍ରଣାଧିନ ହୋଇନଥିବା କହିଛନ୍ତି ସେ । ତେବେ ସେ ଏହି ଘଟଣା ଉପରେ ଅଧିକ ସୂଚନା ଦେବାକୁ ମନା କରି ଦେଇଛନ୍ତି । ଗଣମାଧ୍ୟମ ରିପୋର୍ଟ ଅନୁଯାୟୀ, ନାଇଟ୍ କ୍ଲବରେ କେତେ ଜଣଙ୍କୁ ବନ୍ଧକ ରଖାଯାଇଥିଲା, ସେନେଇ ସୂଚନା ଦେଇନାହାଁନ୍ତି ସେ ।
ସୂଚନା ମୁତାବକ ଆମଷ୍ଟରଡାମ୍ର ଦକ୍ଷିଣ-ପୂର୍ବଠାରୁ ୮୫ କିଲୋମିଟର (୫୩ ମାଇଲ) ଦୂର ଆଡେରେ ଏହା ଘଟିଛି ।ଗଣମାଧ୍ୟମ ରିପୋର୍ଟ ଅନୁଯାୟୀ, ସ୍ଥାନୀୟ ପୌରସଂସ୍ଥା ଏହି ସୂଚନା ଦେଇଛି । ଦଙ୍ଗା ନିୟନ୍ତ୍ରଣକାରୀ ପୋଲିସ ଏବଂ ବୋମା ନିଷ୍କାସନକାରୀ ଦଳ ଘଟଣାସ୍ଥଳରେ ପହଞ୍ଚିଛନ୍ତି । ଏଠାରେ ଟାଉନ୍ ସେଣ୍ଟର୍ ଠାରୁ ଦୂରରେ ରହିବାକୁ ଲୋକଙ୍କୁ ନିବେଦନ କରାଯାଇଛି । ଟ୍ରେନ୍ ଟ୍ରାଫିକ୍ ଦିଗ ପରିବର୍ତ୍ତନ କରାଯାଇଛି । ତେବେ ଏହି ଘଟଣା ଆତଙ୍କବାଦୀ ଆକ୍ରମଣ ସହ ଜଡିତ ଅଛି ବୋଲି କୌଣସି ସ୍ପଷ୍ଟ ସୂଚନା ଦେଇନାହିଁ ପୋଲିସ ।