ପୁରୀ,୨୯/୦୭: ଶ୍ରୀମନ୍ଦିର ଆନନ୍ଦବଜାର ପରିସରରେ ମହାପ୍ରସାଦ ଖାଉଥିବା ବେଳର ଫଟୋ ଉଠାଇ ସୋସିଆଲ ମିଡିଆରେ ଭାଇରାଲ କରିଛନ୍ତି ଜଣେ ବ୍ୟକ୍ତି । ଫଟୋ ଭାଇରାଲ କରିଥିବା ବ୍ୟକ୍ତି ଜଣକ ହେଉଛନ୍ତି ସିଦ୍ଧାର୍ଥ ପାଣ୍ଡେ । ସେ ନିଜ ଇନ୍ଷ୍ଟାଗ୍ରାମ୍ରେ ଫଟୋକୁ ସେୟାର କରିଛନ୍ତି । ଏହି ଫଟୋରେ ଆନନ୍ଦବଜାର ସହ ଭୋଗମଣ୍ଡପ ଦୃଶ୍ୟ ମଧ୍ୟ ଦେଖାଯାଉଛି । ସିଦ୍ଧାର୍ଥ ଏହି ଫଟୋ ଭାଇରାଲ କରିଥିବା ବେଳେ ଏହା ଜଗନ୍ନାଥପ୍ରେମୀଙ୍କ ମହଲରେ ଉଦ୍ବେଗ ସୃଷ୍ଟି କରିଛି । ଥରେ କି ଦୁଇ ଥର ନୁହେଁ ବାରମ୍ବାର ଶ୍ରୀମନ୍ଦିର ଭିତର ଓ ଭିଡିଓ ଫଟୋ ଭାଇରାଲ ହେଉଥିବାରୁ ଏହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି । ତୁରନ୍ତ ପୁଲିସ ଓ ଶ୍ରୀମନ୍ଦିର ପ୍ରଶାସନ ଉକ୍ତ ଘଟଣାରେ ହସ୍ତକ୍ଷେପ କରି କଡ଼ା ଆଭିମୁଖ୍ୟ ଗ୍ରହଣ କରନ୍ତୁ ବୋଲି ଦାବି ହୋଇଛି ।
ଗତ ୧୬ତାରିଖରେ ରାଜା ସାକାର ବୋଲି ଜଣେ ବ୍ୟକ୍ତି ଶ୍ରୀମନ୍ଦିର ପରିସରରେ ସେଲ୍ଫି ଉଠାଇ ଫଟୋ ନିଜ ସୋସିଆଲ ମିଡିଆରେ ଭାଇରାଲ କରିଥିଲେ । ମାତ୍ର ୧୨ ଦିନ ପରେ ପୁଣି ଶ୍ରୀମନ୍ଦିର ଆନନ୍ଦବଜାର ଓ ଭୋଗ ମଣ୍ଡପ ସୋସିଆଲ ମିଡିଆରେ ଘୂରି ବୁଲିଲାଣି । ସୁରକ୍ଷା ବଳୟ ମଧ୍ୟରେ ଶ୍ରୀମନ୍ଦିର କିପରି ରହିଛି ତାହା ଏଥିରୁ ସ୍ପଷ୍ଟ ହୋଇଛି ।
