ବ୍ରହ୍ମପୁର, ୧୪/୦୫ : ବ୍ରହ୍ମପୁର ବିଜେପି ସାଂସଦ ପ୍ରାର୍ଥୀ ପ୍ରଦୀପ କୁମାର ପାଣିଗ୍ରାହୀଙ୍କୁ ଆକ୍ରମଣ ମାମଲା। ସ୍ଵାଧୀନ ବିଧାୟକ ପ୍ରାର୍ଥୀ ଶିବ ଶଙ୍କର ଦାଶଙ୍କୁ ଗିରଫ କରି କୋର୍ଟ ଚାଲାଣ କଲା ଗୋଷାଣୀ ନୂଆଗାଁ ଥାନା ପୁଲିସ। ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲକୁ ପଠାଇ ଦିଆଯାଇଛି।
ପ୍ରକାଶ ଥାଉକି, ସୋମବାର ସନ୍ଧ୍ୟାରେ ମତଦାନ ସରିବା ପରେ ଇଭିଏମ୍ ସିଲ୍ ହୋଇଛି କି ନାହିଁ ଦେଖିବାକୁ ବିଜେପି ସାଂସଦ ପ୍ରାର୍ଥୀ ପ୍ରଦୀପ ପାଣିଗ୍ରାହୀ ଓ ତାଙ୍କ ସମର୍ଥକ ଗୋସାଇଁନୂଆଗାଁର ୧୩୨ନଂ ବୁଥ୍କୁ ଯାଇଥିଲେ । ଥାନା ନିକଟରେ ଥିବା ଇଭିଏମ୍ ଗାଡ଼ି ନିକଟକୁ ଯାଇ ସେ ସମ୍ପୃକ୍ତ ଅଫିସରଙ୍କ ସହ କଥା ହେଉଥିବା ବେଳେ ସ୍ୱାଧୀନ ପ୍ରାର୍ଥୀ ପିଣ୍ଟୁ ପହଞ୍ଚିଥିଲେ । ଉଭୟଙ୍କ ମଧ୍ୟରେ କିଛି ବଚସା ହେବା ପରେ ପିଣ୍ଟୁ ପ୍ରଦୀପଙ୍କୁ ମାଡ଼ ମାରିଥିବା ଥାନାରେ ଅଭିଯୋଗ ହୋଇଛି । ପରେ ଉଭୟ ପ୍ରାର୍ଥୀଙ୍କ ସମର୍ଥକ ଗୋଷ୍ଠୀ ମଧ୍ୟରେ ହାତାହାତି ପରିସ୍ଥିତି ସୃଷ୍ଟି ହୋଇଥିଲା । ପୁଲିସ ହସ୍ତକ୍ଷେପ ପରେ ପରିସ୍ଥିତି ନିୟନ୍ତ୍ରଣାଧୀନ ହୋଇଥିଲା ।
ପ୍ରଦୀପଙ୍କ ଛାତିକୁ ମାଡ଼ ହୋଇଥିବାରୁ ତାଙ୍କର ଏକ୍ସରେ କରାଯାଇଥିଲା। ପିଣ୍ଟୁଙ୍କୁ ଗୋସାଇଁନୂଆଗାଁ ଥାନା ପୁଲିସ ଅଟକ ରଖିଥିଲା। ଡାକ୍ତରଖାନାରେ ଅବ୍ୟବସ୍ଥା ନେଇ ବିଜେପି କର୍ମୀ ହୋହଲ୍ଲା କରିଥିଲେ। ଡାକ୍ତରଖାନାରେ ପ୍ରଦୀପ ପାଣିଗ୍ରାହୀଙ୍କ ଶତାଧିକ ସମର୍ଥକ ଘଟଣାକୁ ନିନ୍ଦା କରିବା ସହ ପିଣ୍ଟୁଙ୍କ ଗିରଫ ଦାବି କରିଥିଲେ ।