ନୂଆଦିଲ୍ଲୀ: ଶ୍ରୀ ରାଷ୍ଟ୍ରୀୟ ରାଜପୁତ କରଣୀ ସେନାର ରାଷ୍ଟ୍ରୀୟ ଅଧ୍ୟକ୍ଷ ସୁଖଦେବ ସିଂ ଗୋଗାମେଡିଙ୍କୁ ଗୁଳିମାରି ହତ୍ୟା କରାଯାଇଛି । ଗ୍ୟାଙ୍ଗଷ୍ଟର ରୋହିତ ଗୋଡାରା ଏହି ହତ୍ୟାକାଣ୍ଡ ପାଇଁ ନିଜକୁ ଦାୟି କରିଛି । ଲରେନ୍ସ ବିଷ୍ନୋଇ ଗ୍ୟାଙ୍ଗର ସଦସ୍ୟ ରୋହିତ ଗୋଡାରା ସୋସିଆଲ ମିଡିଆରେ ପୋଷ୍ଟ କରି ଲେଖିଛି ଯେ, 'ରାମ-ରାମ ସମସ୍ତ ଭାଇମାନଙ୍କୁ, ମୁଁ ରୋହିତ ଗୋଦାରା କାପୁରିସର, ଗୋଲ୍ଡି ବରାଡ ଭାଇ, ଆଜି ଯେଉଁ ସୁଖଦେବ ଗୋଗାମେଡିଙ୍କ ହତ୍ୟା ହୋଇଛି, ଏହାର ସମ୍ପୂର୍ଣ୍ଣ ଦାୟିତ୍ବ ମୁଁ ନେଉଛି । ଏହି ହତ୍ୟା ମୋ ଦ୍ବାରା କରାଯାଇଛି ।  ଭାଇମାନେ, ମୁଁ ଆପଣଙ୍କୁ କହିବାକୁ ଚାହେଁ ଯେ ସେ ଆମର ଶତ୍ରୁମାନଙ୍କ ସହ ସହଯୋଗ କରୁଥିଲେ । ସେମାନଙ୍କ ସହ ମଧ୍ୟ ଖୁବଶୀଘ୍ର ଭେଟଘାଟ ହେବ । ଏବେ ଆସନ୍ତୁ ଜାଣିବା ଏହି ରୋହିତ ଗୋଡାରା କିଏ ? 

ଗ୍ୟାଙ୍ଗଷ୍ଟର ରୋହିତ ଗୋଡାରା ବିକାନେରର ବାସିନ୍ଦା ଏବଂ ସେ ଏବେ କାନାଡାରେ ବୋଲି କୁହାଯାଉଛି । ଗୋଡାରା ବିରୋଧରେ ଗ୍ୟାଙ୍ଗଷ୍ଟର ରାଜୁ ଠେହଟ ହତ୍ୟା ସମେତ ବିଭିନ୍ନ ମାମଲାରେ ୩୨ ଟି ମାମଲା ରୁଜୁ ହୋଇଛି । ପୋଲିସର ସୂଚନାନୁସାରେ, ଗୋଡାରା ରାଜସ୍ଥାନର ବ୍ୟବସାୟୀଙ୍କ ଠାରୁ ଦାଦାବଟି ଭାବରେ ୫ କୋଟିରୁ ୧୭ କୋଟି ଟଙ୍କା ନେଇଛି । 

 ଏହା ବ୍ୟତୀତ ପଞ୍ଜାବୀ ଗାୟକ ସିଦ୍ଧୁ ମୁସେୱାଲାଙ୍କ ହତ୍ୟାରେ ମଧ୍ୟ ଗୋଡାରାର ନାମ ସାମ୍ନାକୁ ଆସିଥିଲା । ଗତ ବର୍ଷ ଜୁନ୍ ମାସରେ ସେ ପୱନ କୁମାରଙ୍କ ନାମରେ ନକଲି ପାସପୋର୍ଟ ତିଆରି କରି ଦୁବାଇକୁ ପଳାଇଛି ଏବଂ ତା ବିରୋଧରେ ଇଣ୍ଟରପୋଲ ରେଡ କର୍ଣ୍ଣର ନୋଟିସ ଜାରି କରାଯାଇଛି ।