ନୂଆଦିଲ୍ଲୀ: ମଧ୍ୟ ସିରିଆରେ ଇସଲାମିକ୍ ଷ୍ଟେଟ୍ (ଆଇଏସ୍) ଗୋଷ୍ଠୀର ସନ୍ଦିଗ୍ଧ ଆତଙ୍କବାଦୀ ମାନେ ଏକ ଭୟଙ୍କର ଆକ୍ରମଣ କରିଛନ୍ତି । ଆଇଏସ୍ ଗୋଷ୍ଠୀଙ୍କ ଏହି ଆକ୍ରମଣରେ ୨୨ ଜଣ ଯବାନଙ୍କ ମୃତ୍ୟୁ ହୋଇଛି, ଯେଉଁମାନେ କି ସରକାରଙ୍କୁ ସମର୍ଥନ ଜଣାଇ ଆସୁଥିଲେ । ଯୁଦ୍ଧ ଉପରେ ନଜର ରଖୁଥିବା ଏକ ସଂଗଠନ ଏବଂ ସରକାରୀ ସମର୍ଥକ ଗଣମାଧ୍ୟମ ଆଜି (ଶୁକ୍ରବାର) ଏହି ସୂଚନା ଦେଇଛନ୍ତି । ସୂଚନା ମୁତାବକ ଗୁରୁବାର ବିଳମ୍ବିତ ରାତିରେ ସୁଖନା ସହର ନିକଟରେ ସରକାରୀ ସମର୍ଥିତ କୁଡସ୍ ବ୍ରିଗେଡ୍ ସଦସ୍ୟଙ୍କୁ ନେଇ ଯାଉଥିବା ଏକ ବସ୍ ଉପରେ ବନ୍ଧୁକଧାରୀ ମାନେ ଆକ୍ରମଣ କରିଛନ୍ତି ।  

ଆତଙ୍କବାଦୀ ମାନେ ଆକ୍ରମଣ କରିଥିବା ସୁଖନା ସହର ଏକଦା ଆଇଏସ୍‌ର ଏକ ଗଡ଼ ଥିଲା । କୁଡସ୍ ବ୍ରିଗେଡ୍ ମୁଖ୍ୟତଃ ପାଲେଷ୍ଟାଇନ ଯୋଦ୍ଧାଙ୍କୁ ନେଇ ଗଠିତ, ଯେଉଁମାନେ ସରକାର ଏବଂ ରୁଷ ଦ୍ୱାରା ସମର୍ଥିତ । ଏହି ଆକ୍ରମଣ ପାଇଁ ତୁରନ୍ତ କେହି ନିଜକୁ ଦାୟୀ କରିନାହାଁନ୍ତି । ହେଲେ ବ୍ରିଟେନ ଭିତ୍ତିକ ଯୁଦ୍ଧ ଉପରେ ନିଜର ରଖୁଥିବା ସଂଗଠନ ‘ସିରିଆନ ଅବଜରଭେଟରୀ ଫର ହ୍ୟୁମାନ ରାଇଟ୍‌ସ’ ଏବଂ ସରକାରୀ ସମର୍ଥକ ରେଡିଓ ଷ୍ଟେସନ ଶ୍ୟାମ ଏଫଏମ ଉଭୟ କହିଛନ୍ତି ଯେ ଏହି ଆକ୍ରମଣ ପଛରେ ଆଇଏସର ହାତ ରହିଛି ।