ନୂଆଦିଲ୍ଲୀ,୧୪/୮: ଉତ୍ତରପ୍ରଦେଶର ହାପୁର ବାସିନ୍ଦା ଜଣେ ଯୁବକ ଦେଶ ପାଇଁ ପ୍ରାଣବଳି ଦେଇଥିବା ୬୩୧ ଜଣ ସୈନ୍ୟଙ୍କ ନାଁ ନିଜ ଶରୀରରେ ଟାଟୁ କରିଛନ୍ତି । ମହାତ୍ମା ଗାନ୍ଧି, ରାଣୀ ଲକ୍ଷ୍ମୀବାଈ ଓ ଭଗତ ସିଂହଙ୍କ ଚିତ୍ର ମଧ୍ୟ ସେ ଶରୀରରେ ଟାଟୁ କରିଛନ୍ତି । ଏହି ଅନନ୍ୟ କାର୍ଯ୍ୟ ଲାଗି ଇଣ୍ଡିଆ ବୁକ୍ ଅଫ୍ ରେକର୍ଡସ୍ରେ ସ୍ଥାନ ପାଇଛନ୍ତି ଅଭିଷେକ ଗୌତମ । ସେତିକି ନୁହେଁ, ‘ଜୀବିତ ସ୍ମାରକ’ର ଟାଇଟଲ ମଧ୍ୟ ସେ ହାସଲ କରିଛନ୍ତି ।
ତେବେ ୩୧ ବର୍ଷୀୟ ଅଭିଷେକ କହିଛନ୍ତି, ନିଜର କିଛି ସାଙ୍ଗଙ୍କ ସହିତ ସେ ଲେହ-ଲଦାଖ ଗସ୍ତରେ ଯାଇଥିଲେ । ସେଠାରେ କାରଗିଲ ଯୁଦ୍ଧରେ ପ୍ରାଣବଳି ଦେଇଥିବା ସୈନ୍ୟଙ୍କ ଦୁଃସାହସିକ କାହାଣୀ ତାଙ୍କୁ ପ୍ରେରିତ କଲା । ଭ୍ରମଣ ସମୟରେ ଏକ ଘଟଣାରେ ଭାରତୀୟ ଆର୍ମି ଅଭିଷେକଙ୍କର ଜଣେ ସାଙ୍ଗଙ୍କ ଜୀବନ ବଞ୍ଚାଇଲେ । ଭାରତୀୟ ଆର୍ମି ପାଇଁ ଯାତ୍ରା ସମୟରେ ସେମାନେ ନିଜକୁ ସୁରକ୍ଷିତ ମଧ୍ୟ ମଣିଲେ । ସେବେଠାରୁ ଭାରତୀୟ ସୈନ୍ୟଙ୍କୁ ସମ୍ମାନ ଜଣାଇବାର ଉପଯୁକ୍ତ ମାର୍ଗ ସେ ଖୋଜୁଥିଲେ । ତା’ପରେ ଶରୀରରେ ଟାଟୁ କରିବାର ବିଚାର ତାଙ୍କ ମନକୁ ଆସିଲା । ଏହା ପରେ ଅଭିଷେକ କାରଗିଲ ସୈନ୍ୟଙ୍କର ନାଁ ଖୋଜିବାରେ ଏବଂ ସେମାନଙ୍କ ପରିବାରକୁ ଭେଟିବାରେ ପୂରା ଗୋଟିଏ ବର୍ଷ ବିତାଇଦେଲେ । ତା’ପରେ ସେ ଦିଲ୍ଲୀରେ ଜଣେ ଟାଟୁ କଳାକାରଙ୍କୁ ଭେଟିଲେ । ଏ ନେଇ ବିପଦ ରହିଥିବା ଡାକ୍ତରମାନେ ଚେତାଇବା ସେତ୍ତେ୍ୱ ଅଭିଷେକ ନିଜ ନିଷ୍ପତ୍ତିରେ ଅଟଳ ରହିଲେ ଏବଂ ସୈନ୍ୟଙ୍କ ନାଁ ଶରୀରରେ ଟାଟୁ କରାଇଲେ ।
କାରଗିଲରେ ମୁତୟନ ଥିବା ସମୟରେ ପ୍ରାଣ ହରାଇଥିବା ୫୫୯ ଜଣ ସୈନ୍ୟଙ୍କ ନାଁ ସେ ପ୍ରଥମେ ଶରୀରରେ ଟାଟୁ କଲେ । ଏକ ସ୍ମାରକ ସ୍ତମ୍ଭ ମଧ୍ୟ ଟାଟୁ କରାଇଲେ । ଏନେଇ ଅଭିଷେକ କହିଛନ୍ତି ‘ଲୋକେ ଏବେ କେବଳ ଅଗଷ୍ଟ ୧୫ ଓ ଜାନୁଆରୀ ୨୬ କିମ୍ବା ଭାରତ-ପାକ୍ କ୍ରିକେଟ୍ ମ୍ୟାଚ୍ରେ ଦେଶପ୍ରେମ ପ୍ରଦର୍ଶନ କରୁଛନ୍ତି । କିନ୍ତୁ ମୋ ଉଦ୍ଦେଶ୍ୟ ଭିନ୍ନ । ମୁଁ ଭାରତୀୟ ଆର୍ମିରେ ଯୋଗ ଦେଇପାରିଲି ନାହିଁ । କିନ୍ତୁ ନିଜ ଦେଶପ୍ରେମକୁ ସବୁଦିନ ମନେ ପକାଇବାକୁ ଚାହୁଁଥିଲି । ଏହି ଟାଟୁ ସେହି ଉଦ୍ଦେଶ୍ୟକୁ ପୂରଣ କରିଛି ।’
