ଛତ୍ରପୁର/ ଗଞ୍ଜାମ/ ବିଡିପୁର,୨୭/୦୫: ଗଞ୍ଜାମ ଏସ୍ପି ଜଗମୋହନ ମୀନାଙ୍କ ନିର୍ଦ୍ଦେଶକ୍ରମେ ଆସନ୍ତା ୭ ତାରିଖ ପର୍ଯ୍ୟନ୍ତ ଗଞ୍ଜାମ ପୁଲିସ ଜିଲ୍ଲାର ସମସ୍ତ ଥାନା ଅଞ୍ଚଳରେ ରାତ୍ର କଟକଣା ଜାରି କରାଯାଇଛି । ଆଇନଶୃଙ୍ଖଳା ପରିସ୍ଥିତିକୁ ଆଖି ଆଗରେ ରଖି ରାତି ୮ଟା ପରେ ଚାହା ଦୋକାନ, ଢାବା ଆଦି ବନ୍ଦ ରହିବ ବୋଲି ନିର୍ଦ୍ଦେଶ ଦିଆଯାଇଛି । ଏହି ସୂଚନା ଦେଇଛନ୍ତି ଛତ୍ରପୁର ଥାନା ଆଇଆଇସି ନିରୋଦ କୁମାର ଦାସ । ଏହି ଦୁଇ ପ୍ରକାର ଦୋକାନରେ ସାଧାରଣତଃ ଅଧିକ ଭିଡ ରହୁଥିବାରୁ ଏଭଳି ପଦକ୍ଷେପ ନିଆଯାଇଛି । ଥାନା ଅଞ୍ଚଳମାନଙ୍କରେ ଫ୍ଲାଗ୍ମାର୍ଚ୍ଚ କରାଯାଉଛି । ଅପରପକ୍ଷରେ ଗଞ୍ଜାମ ଥାନା ପୁଲିସ ଗଞ୍ଜାମ ସହର ଏବଂ ଆଖପାଖ ଅଞ୍ଚଳର ସମସ୍ତ ଦୋକାନ ବଜାରକୁ ରାତି ୮ଟା ପରେ ବନ୍ଦ କରିବାକୁ ବାଧ୍ୟ କରୁଥିବା ଅଭିଯୋଗ ହୋଇଛି । ଏହାକୁ ନେଇ ସାଧାରଣରେ ପ୍ରତିକ୍ରିୟା ପ୍ରକାଶ ପାଇଛି ।
ନିର୍ବାଚନ ଫଳ ଘୋଷଣା ପରିପ୍ରେକ୍ଷୀରେ ହିଂସା ବୃଦ୍ଧି ଆଶଙ୍କା କରାଯାଉଥିବାରୁ ଏହାକୁ ରୋକିବା ଉଦ୍ଦେଶ୍ୟରେ ଗଞ୍ଜାମ ଥାନା ଅଞ୍ଚଳରେ ରାତି ୮ଟା ପରେ ଦୋକାନ ବଜାର, ଢାବା, ମଦ ଦୋକାନ ଆଦି ବନ୍ଦ ରଖିବାକୁ ନିର୍ଦ୍ଦେଶ ଦେଇଛି ପୁଲିସ । ଗଞ୍ଜାମ ଥାନା ଆଇଆଇସି ସୁମିତ୍ରା ପାତ୍ରଙ୍କ ତତ୍ତ୍ୱାବଧାନରେ ରବିବାର ପୂର୍ବାହ୍ଣରେ ଏସ୍ଆଇ ହୃଷିକେଶ ମିଶ୍ର ଓ ଅନିରୁଦ୍ଧ ସ୍ୱାଇଁ, ଏଏସ୍ଆଇ ସୁପ୍ରଭା ସାହୁ ଓ ଜି. ଅନନ୍ତ ରାଓ, ହାବିଲଦାର ସିଏଚ୍ ବିଶୁ ପାତ୍ରଙ୍କ ସମେତ ଥାନାର ସମସ୍ତ କର୍ମଚାରୀ, ଏକ ପ୍ଲାଟୁନ କେନ୍ଦ୍ରୀୟ ସୁରକ୍ଷା ବାହିନୀ ମିଳିତ ଭାବେ ଫ୍ଲାଗ୍ମାର୍ଚ୍ଚ କରିଛନ୍ତି । ଗଞ୍ଜାମ ସହର, କାଇଁଚପୁର ପଞ୍ଚାୟତ, ଅଗସ୍ତିନୂଆଗାଁ, ତେଲୁଗୁ ନୂଆଗାଁ, ପାଳିବନ୍ଦ ପଞ୍ଚାୟତ ଓ ଲକ୍ଷ୍ମୀପୁରରେ ଫ୍ଲାଗ୍ମାର୍ଚ୍ଚ କରାଯାଇଛି ।
ସେହିପରି ଜଗନ୍ନାଥପ୍ରସାଦ ଥାନା ପୁଲିସ ବିଡିପୁର ସମେତ ବିଭିନ୍ନ ଗ୍ରାମରେ ଫ୍ଲାଗ୍ମାର୍ଚ୍ଚ କରିଛି । ଥାନାଧିକାରୀ ଅରୁଣ କୁମାର ସିଂଙ୍କ ତତ୍ତ୍ୱାବଧାନରେ ଥାନାରୁ ପୁଲିସ ବାହିନୀ ବାହାରି ବିଡିପୁର, ଛାମୁଣ୍ଡା, କୁମୁଣ୍ଡା, ଆଲାଡ଼ି, ପଟ୍ଟଧାରା, କାଦପଡା ଆଦି ଗ୍ରାମରେ ଫ୍ଲାଗ୍ମାର୍ଚ୍ଚ କରିଥିଲେ । ହିଂସା ଏବଂ ବିଶୃଙ୍ଖଳା ଠାରୁ ଦୂରେଇ ରହିବା ସହିତ କୌଣସି ପରିସ୍ଥିତିରେ ମଧ୍ୟ ଆଇନକୁ ହାତକୁ ନନେବା ଓ ପୁଲିସକୁ ସହଯୋଗ କରିବା ପାଇଁ ଡାକବାଜି ଯନ୍ତ୍ରରେ ଲୋକଙ୍କୁ ପରାମର୍ଶ ଦିଆଯାଇଥିଲା । ସେହିପରି ଗଞ୍ଜାମ ଏସ୍ପିଙ୍କ ନିର୍ଦ୍ଦେଶକ୍ରମେ ସମସ୍ତ ଚାହା ଦାକାନ, ଫାଷ୍ଟ୍ ଫୁଡ୍ ଦୋକାନ ଏବଂ ଢାବାଗୁଡ଼ିକୁ ରାତି ଆଠଟା ସୁଦ୍ଧା ବନ୍ଦ କରିବା ପାଇଁ ଦୋକାନ ମାଲିକଙ୍କୁ ନିର୍ଦ୍ଦେଶ ଦିଆଯାଇଥିଲା ।
