ନୂଆଦିଲ୍ଲୀ ୦୬/୬: ଚନ୍ଦ୍ରବାବୁ ନାଇଡୁଙ୍କର ତେଲଗୁ ଦେଶମ୍‌ ପାର୍ଟି(ଟିଡିପି) ଆନ୍ଧ୍ରପ୍ରଦେଶ ବିଧାନସଭା ଓ ଲୋକସଭା ନିର୍ବାଚନରେ ଆଖିଦୃଶିଆ ପ୍ରଦର୍ଶନ କରିଛି । ବିଜେପି ପରେ ଏନ୍‌ଡିଏର ସହଯୋଗୀ ଦଳ ଭାବେ ଟିଡିପି ହିଁ ସବୁଠୁ ଅଧିକ ୧୬ଟି ଲୋକସଭା ଆସନ ଜିତିଛି । ଏପରିସ୍ଥଳେ ଟିଡିପିର ନଜର ଲୋକସଭା ବାଚସ୍ପତି ପଦ ଉପରେ ରହିଥିବା  କୁହାଯାଉଛି ।

ନାଇଡୁ ମଧ୍ୟ ଆନ୍ଧ୍ରପ୍ରଦେଶକୁ ସ୍ୱତନ୍ତ୍ର ରାଜ୍ୟ ମାନ୍ୟତା ପାଇଁ ଦାବି କରିପାରନ୍ତି । ଏହି ପ୍ରସଙ୍ଗରେ  ହିଁ ଟିଡିପି ୨୦୧୮ରେ ଏନ୍‌ଡିଏ ଛାଡିଥିଲା। ସେହିପରି ଦଳ ଗୁରୁତ୍ୱପୂର୍ଣ୍ଣ ବିଭାଗର କ୍ୟାବିନେଟ୍‌ ମନ୍ତ୍ରୀ ପଦ ମାଗିପାରେ । କେନ୍ଦ୍ର ସରକାରରେ ଅଧିକ ପ୍ରତିନିଧିତ୍ୱ ଚାହିଁପାରେ। ପୂର୍ବରୁ ୨୦୧୪ରେ ବିଜେପି ନେତୃତ୍ୱାଧୀନ  ଏନ୍‌ଡିଏ ସରକାର ସମୟରେ ତାଙ୍କ ଦଳକୁ ଗୋଟିଏ କ୍ୟାବିନେଟ୍‌ ଓ ଗୋଟିଏ ରାଷ୍ଟ୍ରମନ୍ତ୍ରୀ ପଦ ମିଳିଥିଲା ।  ଆନ୍ଧ୍ରର ରାଜଧାନୀ ଭାବେ ଅମରାବତୀର ବିକାଶ କରିବା ମଧ୍ୟ ଦଳର ପ୍ରାଥମିକତା ରହିବ । ସେଥିଲାଗି ନାଇଡୁ  କେନ୍ଦ୍ର ନିକଟରୁ ଅଧିକ ଅର୍ଥ ଦାବି କରିବେ । ଦୀର୍ଘ ଦିନ ହେଲା ପଡି଼ରହିଥିବା ପୋଲାଭରମ୍‌ ପ୍ରକଳ୍ପକୁ ଶେଷ  କରିବାକୁ ବି ଦଳ ଆର୍ଥିକ ସହାୟତା ମାଗିବ ବୋଲି ଆକଳନ କରାଯାଉଛି ।