ଫୁଲବାଣୀ,୨୪/୩ : ପିଲା ସାଲୁଙ୍କି ନଦୀରୁ ଆଜି ଏକ ନବଜାତ ଶିଶୁ କନ୍ୟାର ମୃତ ଦେହ ଉଦ୍ଧାର କରାଯାଇଛି। ତେବେ ମୃତ ଶିଶୁର କୌଣସି ପରିଚୟ ମିଳି ନ ଥିବା ବେଳେ ଏହା କେଉଁ ପରିସ୍ଥିତିରେ ଏଠାକୁ ଭାସି ଆସିଛି, ସେ ନେଇ କିଛି ଜଣା ପଡିନାହିଁ।
ସୂଚନା ଅନୁସାରେ, ଫୁଲବାଣୀ ସହର ଦେଇ ବୋହି ଯାଇଥିବା ପିଲା ସାଲୁଙ୍କୀ ନଦୀର ଅପର ପାର୍ଶ୍ଵରେ ଆଜି ସକାଳେ ନିକଟସ୍ଥ ଡାକପାଲା ଗାଁର ସ୍ତ୍ରୀଲୋକ ମାନେ ଗାଧୋଇବା ପାଇଁ ଆସିଥିଲେ। ଏହି ସମୟରେ ପାଣିରେ ଏକ ମୃତ ଶିଶୁ କନ୍ୟା ଭାସୁଥିବା ଦେଖିଥିଲେ । ଏ ନେଇ ଟାଉନ ଥାନାକୁ ଖବର ଦେଇଥିଲେ। ପୋଲିସ ସହ ସ୍ବେଚ୍ଛାସେବୀ ଅନୁଷ୍ଠାନ ଟିମ ହ୍ୟୁମାନିଟିର କର୍ମୀ ପହଞ୍ଚି ମୃତ ଶିଶୁ କନ୍ୟାର ଶବକୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ପଠାଇଥିଲେ। ଏ ନେଇ ଅଧିକ ତଦନ୍ତ ଚାଲିଥିବା ଟାଉନ ଥାନା ପକ୍ଷରୁ କୁହାଯାଇଛି।