ଉମରକୋଟ୍, ୨୬।୩: ନବରଙ୍ଗପୁର ଜିଲ୍ଲା କୁନ୍ଦେଇ ଥାନା ଅନ୍ତର୍ଗତ କସକଙ୍ଗା ପଞ୍ଚାୟତର ସର୍ଗିପାରା ଏବଂ ବଦେଇଡିହିକୁ ଯିବା ରାସ୍ତା କଡ଼ରେ ଜଣେ ଅଜଣା ମହିଳାଙ୍କ ମୃତଦେହ ଠାବ ହୋଇଛି । ମୃତ ମହିଳାଙ୍କ ପରିଚୟ ମିଳିନଥିବା ବେଳେ ମହିଳାଙ୍କ ହାତରେ ସରଦିନି ଗଣ୍ଡ ଲେଖା ହୋଇଥିବା ଦେଖିବାକୁ ମିଳିଛି । ଏହି ଲେଖାରୁ ତାଙ୍କ ନାଁ ସରଦିନି ବୋଲି ଅନୁମାନ କରାଯାଉଛି ।
କିନ୍ତୁ, ମହିଳା ଜଣକ କିଏ ଘର କେଉଁଠି ଏବଂ ତାଙ୍କ ମୃତଦେହ କିପରି ରାସ୍ତାକଡ଼କୁ ଆସିଲା ତାହା ଜଣାପଡ଼ିନାହିଁ । ଏହା ହତ୍ୟାକାଣ୍ଡ ନା ଆଉ କିଛି ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନାହିଁ । ଘଟଣାସ୍ଥଳରେ କୁନ୍ଦେଇ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ତଦନ୍ତ ପରେ ଘଟଣାର ସବୁ ତଥ୍ୟ ଜଣାପଡ଼ିବ ବୋଲି ପୋଲିସ ପ୍ରକାଶ କରିଛି ।
