ଫୁଲବାଣୀ,୨୦/୩ : ତିରୁପତିରୁ ଘରକୁ ଫେରୁଥିବା ବେଳେ ଆନ୍ଧ୍ରପ୍ରଦେଶ ବିଜୟନଗରମ ଠାରେ ଟ୍ରେନରୁ ଖସିପଡି ଜଣେ ବ୍ୟବସାୟୀଙ୍କ ମୃତ୍ୟୁ ଘଟିଛି। ବ୍ୟବସାୟୀ ଜଣକ ହେଲେ  ନଦୀଖଣ୍ଡି ସାହିର ଯୁବ ବ୍ୟବସାୟୀ ମୋହନ ସାହୁ(୪୨)। 

ସୁଚନା ଅନୁସାରେ, ମୋହନ ତାଙ୍କ ପିତା ଓ ପରିବାର ସହ ତିରୁପତି ବୁଲିବା ପାଇଁ ଯାଇଥିଲେ।  ରବିବାର ଦିନ ବୁଲାବୁଲି ସାରି ଟ୍ରେନ୍ ଯୋଗେ ଫେରୁଥ‌ିଲେ। ସୋମବାର ମଧ୍ୟରାତ୍ରରେ ସମସ୍ତେ ଶୋଇଥିବା ବେଳେ ମୋହନ ପରିସ୍ରା କରିବା ପାଇଁ ଟ୍ରେନର ଶୌଚାଳୟକୁ ଯାଇଥିଲେ। ଶୌଚାଳୟରୁ ବାହାରି ନିଜ ବର୍ଥକୁ ଫେରିବା ବାଟରେ ଗେଟ ପାଖରେ ପଡିଥ‌ିବା ପାଣିରେ ତାଙ୍କର ଗୋଡ ଖସିଯିବାରୁ ସେ ଟ୍ରେନ୍ ବାହାରକୁ ଖସି ପଡିଥିଲେ। ଫଳରେ ଟ୍ରେନର ଟ୍ରାକ୍ ଭିତରେ ପଡି ଯାଇଥିଲେ। ଏହାଦ୍ବାରା ତାଙ୍କ ସମ୍ପୁର୍ଣ ଶରୀର ଖଣ୍ଡବିଖଣ୍ଡିତ ହୋଇଯାଇଥିଲା । ପରେ ପରିବାର ଲୋକେ ତାଙ୍କୁ ନ ଦେଖି ଖୋଜାଖୋଜି କରିଥିଲେ। ସେତେବେଳକୁ ଟ୍ରେନଟି ପ୍ରାୟ ୭୦ କିମି ଆଗକୁ ଚାଲିଯାଇଥିଲା । ପରିବାର ଲୋକେ ଟ୍ରେନକୁ ଅଟକାଇ ଖୋଜାଖୋଜି କରିବା ପରେ ମୋହନ ବିଜୟନଗରମ ନିକଟରେ ପଡି ରହିଥ‌ିବା ସୂଚନା ମିଳିଥିଲା । ରେଳବାଇ ପୁଲିସକୁ ଖବର ଦିଆ ଯିବାରେ ପୁଲିସ ପହଞ୍ଚି ଶବ ଜବତ କରିବା ସହ ବ୍ୟବଚ୍ଛେଦ କରି ବୁଧବାର ପରିବାରକୁ ହସ୍ତାନ୍ତର କରିଛି।

ଆହୁରି ପଢନ୍ତୁ : କୁଳଡିହା ଅଭୟାରଣ୍ୟରେ ବନ୍ଧୁକ କାରଖାନା ଠାବ : ୪ ବନ୍ଧୁକ ଜବତ , ଜଣେ ଗିରଫ