ଢେଙ୍କାନାଳ, ୨୪।୩: ତୁଟିଲାନି ନିଜ ବାପ ଅଜା ଅମଳର ଘରବାଡ଼ି ଭାଗ ବଣ୍ଟା । ଏହାକୁ ନେଇ ଚାଲିଥିବା ବିବାଦରୁ ଆଜି ଗଡ଼ିଲା ବଡ଼ ଭାଇର ମୁଣ୍ଡ । ଏପରି ଅଭାବନୀୟ ହତ୍ୟାକାଣ୍ଡ ଘଟିଛି ଢେଙ୍କାନାଳ ସଦର ଥାନା ଅନ୍ତର୍ଗତ କାଉଁରିଆପାଳ ଗ୍ରାମରେ । ଗ୍ରାମର ତଳସାହି ବାସିନ୍ଦା ପଦ୍ମ ଚରଣ ମହାନ୍ତିଙ୍କୁ ରବିବାର ସକାଳେ ତାଙ୍କ ସାନ ଭାଇ, ପୁତୁରା ଓ ସାନ ବୋହୁ ଠେଙ୍ଗା ବାଡ଼ିରେ ନିସ୍ତୁକ ଆକ୍ରମଣ କରିଥିଲେ । ଘଟଣାସ୍ଥଳରେ ପଦ୍ମ ଚରଣ ମହାନ୍ତିଙ୍କର ମୃତ୍ୟୁ ଘଟିଛି । ଖବର ପାଇ ସଦର ଥାନା ପୁଲିସ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଛେଦ ପାଇଁ ଢେଙ୍କାନାଳ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଛି । ସେପଟେ ହତ୍ୟାକାଣ୍ଡ ଘଟାଇ ଅଭିଯୁକ୍ତମାନେ ଫେରାର ହୋଇଯାଇଥିବା ଜଣାପଡ଼ିଛି । 

ସୂଚନା ମୁତାବକ, ମୃତ ପଦ୍ମଚରଣ ମହାନ୍ତି ତିନି ଭାଇ ଓ ତିନି ଭଉଣୀ । ଘରବାଡ଼ି ଭାଗବଣ୍ଟା   ନେଇ ମଝିଆ ଭାଇ ଅର୍ଥାତ୍ ହତ୍ୟାକାଣ୍ଡର ଅଭିଯୁକ୍ତ ବରୁଣ ମହାନ୍ତି ଜିଦ୍ ଧରିବାରୁ ଉଭୟ ପରିବାର ମଧ୍ୟରେ ବିବାଦ ଲାଗିରହିଥିଲା । ଏ ସମ୍ପର୍କରେ ମଧ୍ୟ ମାମଲା ସଦର ଥାନାକୁ ଯାଇଥିଲେ, କିନ୍ତୁ ପୁଲିସ ଗୁରୁତ୍ୱ ଦେଇ ନଥିବାରୁ ଏହି ହତ୍ୟାକାଣ୍ଡ ଘଟିଥିବା ଅଭିଯୋଗ କରିଛନ୍ତି ମୃତକଙ୍କ ସାନଭାଇ । ଏପରିକି ତାଙ୍କ ମଝିଆ ଭାଇ ବରୁଣ ମହାନ୍ତି, ପୁଅ ଭବାନୀ ମହାନ୍ତି ଓ ବରୁଣଙ୍କ ପତ୍ନୀ ବିନତୀ ମିଶି ପଦ୍ମଚରଣଙ୍କୁ ପିଟି ପିଟି ମାରିଦେଇଥିବା ଅଭଯୋଗ ଉଠାଇ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଅଭିଯୋଗ କରିଛନ୍ତି । ପୁଲିସ ଶବ ବ୍ୟବଚ୍ଛେଦ କରି ହତ୍ୟାକାଣ୍ଡର ତଦନ୍ତ ଆରମ୍ଭ କରିଛି ।