ନୂଆଦିଲ୍ଲୀ: ଆନ୍ଧ୍ରପ୍ରଦେଶର ତିରୁପତି ବାଲାଜୀ ମନ୍ଦିରର ପ୍ରସାଦରେ ବ୍ୟବହୃତ ଘିଅର ଯାଞ୍ଚ ରିପୋର୍ଟ ସାମ୍ନାକୁ ଆସିବା ପରେ ସମଗ୍ର ଦେଶରେ ଏବେ ରାଜନୀତି ଉଷ୍ଣ ହୋଇଛି। ତିରୁପତି ମନ୍ଦିରର ଲଡୁ ପ୍ରସାଦରେ ମାଛ ତେଲ ଏବଂ ପଶୁ ଚର୍ବିର ମିଶ୍ରଣ ହେଉଥିବା ଏହି ରିପୋର୍ଟରେ ନିଶ୍ଚିତ ହୋଇଛି । ଟିଡିପି ଏହି ପ୍ରସଙ୍ଗରେ ଜଗନ୍ ମୋହନ ରେଡ୍ଡୀଙ୍କ ନେତୃତ୍ବାଧିନ ପୂର୍ବ ସରକାରଙ୍କ ଉପରେ ଅଭିଯୋଗ ଆଣିଛି । ଅନ୍ୟ ପକ୍ଷରେ ଆଡଭୋକେଟ ବିନୀତ ଜିନ୍ଦଲ ଏ ସମ୍ପର୍କରେ କେନ୍ଦ୍ର ଗୃହ ମନ୍ତ୍ରଣାଳୟକୁ ଏକ ଚିଠି ଲେଖିଛନ୍ତି।

ଆଡଭୋକେଟ୍ ବିନୀତ ଜିନ୍ଦଲ ଗୃହ ମନ୍ତ୍ରଣାଳୟ ଏବଂ ଆନ୍ଧ୍ରପ୍ରଦେଶ ପୋଲିସ ମୁଖ୍ୟଙ୍କୁ ଚିଠି ଲେଖି ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ଜଗନ୍ ମୋହନ ରେଡ୍ଡୀ, ତିରୁମାଲା ତିରୁପତି ଦେବସ୍ଥାନମ ଅଧିକାରୀ ଏବଂ ପଶୁ ଚର୍ବି ମିଶ୍ରିତ ଘିଅ ଯୋଗାଉଥିବା ଠିକାଦାରଙ୍କ ବିରୋଧରେ ଅଭିଯୋଗ ପଞ୍ଜିକରଣ କରିବାକୁ ଦାବି କରିଛନ୍ତି । ଏଥିସହ ପୂର୍ବତନ ସିଏମ ଜଗନ ମୋହନ ରେଡ୍ଡୀ ଏବଂ ଅନ୍ୟମାନଙ୍କ ବିରୋଧରେ ଜାତୀୟ ସୁରକ୍ଷା ଆଇନ (NSA) ଲାଗୁ କରିବାକୁ ସେ ଦାବି କରିଛନ୍ତି।

ଏହା ବ୍ୟତୀତ ଆନ୍ଧ୍ରପ୍ରଦେଶ କଂଗ୍ରେସ ମୁଖ୍ୟ ତଥା ଜଗନ୍ ମୋହନ ରେଡ୍ଡୀଙ୍କ ଭଉଣୀ ଓ୍ବାଇ.ଏସ୍ ଶର୍ମିଲା କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ଚିଠି ଲେଖି ପ୍ରଭୁ ବାଲାଜୀଙ୍କ ଲଡୁରେ ବ୍ୟବହୃତ ଘିଅରେ ପଶୁ ଚର୍ବିର ବ୍ୟବହାର ଯାଞ୍ଚ କରିବାକୁ ସିବିଆଇକୁ ଅନୁରୋଧ କରିଛନ୍ତି।

ଏହି ପ୍ରସଙ୍ଗରେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେପି ନଡା ଆଜି (ଶୁକ୍ରବାର) କହିଛନ୍ତି ଯେ, ସେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏନ ଚନ୍ଦ୍ରବାବୁ ନାଇଡୁଙ୍କ ସହ କଥା ହୋଇଛନ୍ତି ଏବଂ ତିରୁପତି ଲଡୁ ପ୍ରସଙ୍ଗରେ ସମ୍ପୂର୍ଣ୍ଣ ରିପୋର୍ଟ ମାଗିଛନ୍ତି । ସେ କହିଛନ୍ତି ଯେ କେନ୍ଦ୍ର ସରକାର ଏହି ଘଟଣାର ଅନୁସନ୍ଧାନ କରିବେ ଏବଂ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବେ।

ତେବେ ଯେତେବେଳେ ଏହି ପ୍ରସଙ୍ଗରେ ରାଜନୀତି ଜୋର୍ ଧରିଲା, ସେତେବେଳେ ଆନ୍ଧ୍ରପ୍ରଦେଶର ପୂର୍ବତନ ସିଏମ ଜଗନ୍ ମୋହନ ଏବଂ ତାଙ୍କ ଦଳ YSR କଂଗ୍ରେସ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ । ସିଏମ୍ ଏନ ଚନ୍ଦ୍ରବାବୁ ନାଇଡୁ ଏବଂ ଟିଡିପିର ଅଭିଯୋଗ ଉପରେ ତଦନ୍ତ ପାଇଁ ଏକ ନ୍ୟାୟିକ କମିଟି ଗଠନ କରିବାକୁ YSR କଂଗ୍ରେସ ଦାବି କରିଛି । ଏହି ପ୍ରସଙ୍ଗରେ ଖାଦ୍ୟମନ୍ତ୍ରୀ ପ୍ରହ୍ଲାଦ ଯୋଶୀ କହିଛନ୍ତି ଯେ ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଯାହା କହିଛନ୍ତି ତାହା ଗୁରୁତର ବିଷୟ । ସେ କହିଛନ୍ତି ଯେ ବିସ୍ତୃତ ଅନୁସନ୍ଧାନ ଆବଶ୍ୟକ ଏବଂ ଦୋଷୀଙ୍କୁ ଦଣ୍ଡ ଦିଆଯିବା ଉଚିତ୍ । କେନ୍ଦ୍ର ମନ୍ତ୍ରୀ ଗିରିରାଜ ସିଂ ମଧ୍ୟ ଶୁକ୍ରବାର ଏହି ପ୍ରସଙ୍ଗରେ କହିଛନ୍ତି ଯେ ତିରୁପତି ପ୍ରସାଦ ମାମଲାରେ ସିବିଆଇ ତଦନ୍ତର ଆବଶ୍ୟକତା ରହିଛି ।