ଭୁବନେଶ୍ୱର,୧୦/୦୫: ଆଜି ଏସୀୟ କ୍ରୀଡ଼ାରେ ରୌପ୍ୟ  ବିଜେତା ଓଡ଼ିଆ ଜାଭେଲିନ ଫିଙ୍ଗାଳି କିଶୋର କୁମାର ଜେନା ଦୋହା ଡାଏମଣ୍ଡ ଲିଗ୍‌ରେ ପଦାର୍ପଣ କରିବେ । ପ୍ରଥମ ଓଡ଼ିଆ ଭାବେ ସେ ଏହି ଗୌରବ ହାସଲ କରିବାକୁ  ଯାଉଛନ୍ତି । ଅଲିମ୍ପିକ୍ସ ଚାମ୍ପିଅନ ନୀରଜ ଚୋପ୍ରାଙ୍କ ସହ ବିଶ୍ୱର ଶ୍ରେଷ୍ଠ  ୯ ଜଣ ଜାଭେଲିନ ଫିଙ୍ଗାଳିଙ୍କ ସହ ସେ ପ୍ରତିଦ୍ୱନ୍ଦ୍ୱିତା କରିବେ ।  ଅଲିମ୍ପିକ୍ସ ଏବଂ ବିଶ୍ୱ ଚାମ୍ପିଅନ ନୀରଜ ଚୋପ୍ରା ମଧ୍ୟ ଦୋହାରୁ ସିଜନ ଆରମ୍ଭ କରିବାକୁ ଯାଉଛନ୍ତି । 

ଗତ ୬  ତାରିଖରେ ଆୟୋଜକଙ୍କ ପକ୍ଷରୁ ୧୦ ଜଣିଆ ଏଣ୍ଟ୍ରି ତାଲିକା  ପ୍ରକାଶ ପାଇଥିଲା । ଏଥିରେ ଭାରତରୁ ନୀରଜଙ୍କ ସହ  କିଶୋର ସାମିଲ ରହିଥିଲେ । ଏହି ଦୁଇ ଜଣଙ୍କ ସହ ଜାପାନର ରଡେରିକ ଜେନକି ଡିନ, ଫିନ୍‌ଲାଣ୍ଡର ଓଲିଭର ହେଲାଣ୍ଡର, ମଲଡୋଭାର ଆଡ୍ରିଆନ ମାରଡାରେ, ଲିଥୁଆନିଆର ଏଡିସ ମାତୁସେଭିସିୟସ, ଗ୍ରେନାଡାର ଆଣ୍ଡରସନ ପିଟର୍ସ, ଆମେରିକାର  କଟିସ ଥମ୍ପସନ, ଚେକ ଗଣରାଜ୍ୟର ଜାକୁବ ଭାଦଲେଜଚ  ଏବଂ ଜର୍ମାନୀର ଜୁଲିଆନ ୱେବର ତାଲିକାରେ ରହିଛନ୍ତି । ନୀରଜଙ୍କ ଶ୍ରେଷ୍ଠ ପ୍ରଦର୍ଶନ ୮୯.୯୪ ମିଟର ଏବଂ କିଶୋରଙ୍କ  ୮୭.୫୪ ମିଟର ରହିଛି । ପୂର୍ବରୁ ଉଭୟ ପ୍ୟାରିସ ଅଲିମ୍ପିକ୍ସକୁ  ଯୋଗ୍ୟତା ହାସଲ କରିସାରିଛନ୍ତି । ଭାରତୀୟ ସମୟ ରାତି  ୧୦ଟା ୧୨ ମିନିଟରୁ ଜାଭେଲିନ୍‌ ଥ୍ରୋ ଇଭେଣ୍ଟ ଆରମ୍ଭ ହେବ।