ଇନ୍ଦୋର,୧୨।୯: କୋଲକାତା ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲା ସାରା ଦେଶକୁ ଲଜ୍ଜାରେ ମୁଣ୍ଡ ନୁଆଁଇ ଦେଇଛି। ଏହି ଘଟଣାର ମାସକ ପରେ ମଧ୍ୟ ପ୍ରଦେଶରେ ଆଉ ଏକ ଲଜ୍ଜାଜନକ ଘଟଣା। ବନ୍ଧୁକ ମୁନରେ ଦୁଇ ଜଣ ଯୁବ ସେନା ଅଧିକାରୀଙ୍କୁ ଲୁଟ୍ ପରେ ସେମାନଙ୍କ ବାନ୍ଧବୀଙ୍କୁ ଗଣଦୁଷ୍କର୍ମ କରାଯାଇଥିବାର ହୋଇଛି ଅଭିଯୋଗ । ଘଟଣାରେ ୬ ଜଣ ସମ୍ପୃକ୍ତ ଥିବା ବେଳେ ପୋଲିସ ୨ ଜଣଙ୍କୁ ଗିରଫ କରିଥିବା ନେଇ ଜଣାପଡିଛି।
ସୂଚନା ଅନୁସାରେ, ଇନ୍ଦୋର ନିକଟସ୍ଥ ମହୋ ଆର୍ମି କଲେଜରେ ଟ୍ରେନିଂ ନେଉଥିବା ଦୁଇ ଅଧିକାରୀ ନିଜର ଦୁଇ ଜଣ ବାନ୍ଧବୀଙ୍କ ସହ ନାଇଟ୍ ଡ୍ରାଇଭ୍ରେ ବାହାରିଥିଲେ। ପାଖରେ ଥିବା ପିକନିକ୍ ସ୍ପଟ୍ ଜାମ୍ଗେଟ୍କୁ ଯାଉଥିବା ବେଳେ ରାତି ପ୍ରାୟ ୨ଟା ୩୦ ମିନିଟ୍ରେ ୬ ଜଣ ଦୁର୍ବୃତ୍ତ ସେମାନଙ୍କ ଗାଡ଼ି ଉପରେ ହମଲା କରିବା ସହ ବନ୍ଧୁକ ଏବଂ ଛୁରୀ ଦେଖାଇ ଭୟଭୀତ କରିଥିଲେ। ଏପରିକି ସେମାନଙ୍କୁ ମାଡ଼ ମାରି ଅନ୍ୟ ଏକ ସ୍ଥାନକୁ ନେଇ ଯାଇଥିଲେ। ସେଠାରେ ଟଙ୍କା ଏବଂ ଅନ୍ୟାନ୍ୟ ଜିନିଷ ଦେବାକୁ ବାଧ୍ୟ କରିଥିଲେ। ଅନ୍ୟଜଣେ ଆର୍ମି ଅଫିସର ଓ ତାଙ୍କ ବାନ୍ଧବୀଙ୍କୁ ଦୁର୍ବୃତ୍ତମାନେ ୧୦ ଲକ୍ଷ ଟଙ୍କା ନେଇକି ଆସିଲେ ଅନ୍ୟ ଦୁହିଁଙ୍କୁ ଛାଡିବେ ବୋଲି କହିଥିଲେ। ଏହାପରେ ଦୁହେଁ ଅପରାଧିଙ୍କ ହାତରୁ ଖସି ଆର୍ମି ୟୁନିଟ୍ ଏବଂ ପୋଲିସକୁ ସୂଚନା ଦେଇଥିଲେ।
ଉଭୟ ତୁରନ୍ତ ୟୁନିଟକୁ ଫେରି କମାଣ୍ଡିଂ ଅଫିରସଙ୍କୁ ଜଣାଇଥିଲେ। ସେମାନେ ପୁଲିସକୁ ଖବର ଦେବା ପରେ ପୁଲିସ ଘଟଣାସ୍ଥଳରେ ପହଞ୍ଚି ଅନ୍ୟ ଆର୍ମି ଅଫିସର ଏବଂ ତାଙ୍କ ବାନ୍ଧବୀଙ୍କୁ ଉଦ୍ଧାର କରିଥିଲା। ଡାକ୍ତରୀ ପରୀକ୍ଷାରୁ ଯୁବତୀ ଦୁଷ୍କର୍ମର ଶିକାର ହୋଇଥିବା ଜଣାପଡ଼ିଛି। ସେପଟେ ପୁଲିସ ଗାଡ଼ି ଦେଖି ଫେରାର୍ ହୋଇ ଯାଇଥିବା ଦୁର୍ବୃତ୍ତଙ୍କ ମଧ୍ୟରୁ ପୁଲିସ ୨ ଜଣଙ୍କୁ ଗିରଫ କରିଛି। ସେମାନଙ୍କ ମଧ୍ୟରେ ଜଣଙ୍କ ନାଁରେ ପୂର୍ବରୁ ଅପରାଧିକ ମାମଲା ଥିବା ଜଣାପଡିଛି। ପୁଲିସ ମଧ୍ୟ ମାମଲା ରୁଜୁ କରି ଅନ୍ୟ ଅଭିଯୁକ୍ତଙ୍କୁ ଖୋଜୁଛି। ଘଟଣା ମଙ୍ଗଳବାର ବିଳମ୍ବିତ ରାତି ପ୍ରାୟ ୨ଟା ୩୦ ମିନିଟ୍ରେ ଘଟିଥିଲା। ବୁଧବାର ସନ୍ଧ୍ୟାରେ ପୀଡିତାଙ୍କର ଚେତା ଫେରିଥିଲା।
