ଫିରିଙ୍ଗିଆ, ୯।୯ : କୃଷକ ଓ ମହିଳା ସ୍ୱୟଂସହାୟକ ଗୋଷ୍ଠୀମାନଙ୍କର ଆର୍ଥିକ ଅଭିବୃଦ୍ଧି ପାଇଁ ବର୍ତ୍ତମାନ ପାରମ୍ପରିକ କୃଷି ପରିବର୍ତେ୍ତ ବିକଳ୍ପ ଚାଷ ପାଇଁ ପୋ୍ରତ୍ସାହିତ କରାଯାଉଛି  । ବିଗତ ଦିନମାନଙ୍କରେ କନ୍ଧମାଳ ଜିଲ୍ଲାରେ ଫଳ ଓ ପନିପରିବାର ସଫଳ ଉତ୍ପାଦନ ଦେଖି ଆଗକୁ ଗେଣ୍ଡୁ ଫୁଲ ଚାଷ କରି ବାହାର ଜିଲ୍ଲା ଓ ରାଜ୍ୟ କୁ ରପ୍ତାନୀ କରିବା ପାଇଁ ସ୍ଥିର କରାଯାଇଛି  ।  

ଆଗକୁ ଆସୁଥିବା ପୂଜା ପାର୍ବଣକୁ ଦୃଷ୍ଟିରେ ରଖି ମହିଳା ସ୍ୱୟଂସହାୟକ ଦଳମାନେ ଗେଣ୍ଡୁ ଫୁଲ ଚାଷ କରି ବେଶ୍ ଦୁଇପଇସା ରୋଜଗାର କରିବା ପାଇଁ ଅଣ୍ଟା ଭିଡିଛନ୍ତି । ସେଥିପାଇଁ ଫୁଲବାଣୀ ସମନ୍ୱିତ ଆଦିବାସୀ ଉନ୍ନୟନ ପ୍ରକଳ୍ପ ତରଫରୁ ପ୍ରକଳ୍ପ ପ୍ରଶାସିକା ଦେବଜାନୀ ଭୂୟାଙ୍କ ତତ୍ତ୍ବାବଧାନ ରେ ଫିରିଙ୍ଗିଆ ବ୍ଲକ୍ ବୈଠକ ଗୃହ ଠାରେ ଏକ ପ୍ରଶିକ୍ଷଣ ଶିବିର ଆୟୋଜିତ ହୋଇଯାଇଛି  । ଏହି ପ୍ରଶିକ୍ଷଣ କାର୍ଯ୍ୟକ୍ରମରେ ଆଇଟିଡିଏ, ମିଶନଶକ୍ତି, ପ୍ରଦାନ, ହର୍ଷଟ୍ରଷ୍ଟ ଏବଂ ସ୍ୱାତୀ ଅନୁଷ୍ଠାନ  ମିଳିତ ଭାବେ ସହଯୋଗ କରିଥିବା ବେଳେ କାର୍ଯ୍ୟକ୍ରମ ପରିଚାଳକ ପି. ମୂରଲି ମୋହନ ଏହାର ବଜାରୀକରଣକୁ ପ୍ରାଧାନ୍ୟ ଦେଇଥିଲେ  । 

ଏହି ଲାଭଦାୟକ ଚାଷକୁ ଆଗକୁ ନେବାକୁ ହେଲେ ଅଧିକ ଚାଷୀଙ୍କୁ ଯୋଡିବାକୁ ହେବ ବୋଲି ମିଶନ ଶକ୍ତି ବ୍ଲକ୍ କାର୍ଯ୍ୟକ୍ରମ ସଂଯୋଜକ କହିଥିଲେ  । ପ୍ରଦାନ ତରଫରୁ ତାଲିମରେ ଚାରାରୋପଣ ପ୍ରଣାଳୀ, ରୋଗପୋକ ନିୟନ୍ତ୍ରଣ ଆଦି ବିଷୟରେ ଶିକ୍ଷା ପ୍ରଦାନ କରାଯାଇଥିବା ବେଳେ ସ୍ୱାତୀ ଅନୁଷ୍ଠାନ ତରଫରୁ ବ୍ଲକ୍ ଜୀବିକା ସଂଯୋଜକ ଉମାକାନ୍ତ ସାହୁ ଚାଷୀମାନଙ୍କ ଚୟନ ଓ କ୍ଷେତ୍ର ସ୍ତରୀୟ ପ୍ରସ୍ତୁତିରେ ସହେଯାଗ କରିଥିଲେ  । ସମନ୍ୱିତ ଆଦିବାସୀ ଉନ୍ନୟନ ପ୍ରକଳ୍ପର ଏଭଳି ପ୍ରଶିକ୍ଷଣ ଓ ବଜାରୀକରଣ ପଦକ୍ଷେପକୁ ଫିରିଙ୍ଗିଆର ଚାଷୀ ଓ ସ୍ୱୟଂସହାୟକ ଦଳର ସଭ୍ୟା ମାନେ ସ୍ୱାଗତ କରିବାସହ ଏହା ମହିଳାମାନଙ୍କ ଆୟ ବଢାଇବାରେ ସହାୟକ ହେବ ବୋଲି ଆଶା ପ୍ରକଟ କରିଛନ୍ତି  ।