ସମ୍ଵଲପୁର, ୩୦/୦୮ : ଆତ୍ମସମର୍ପଣ କଲେ ୨ ହାର୍ଡକୋର୍ ମାଓବାଦୀ। ଆମିଲା ଓରଫ ପୂଜା ତାତି ଏବଂ ରଘୁ ଓରଫ ସାଇତୁ ପଡମ ଉତ୍ତରାଞ୍ଚଳ ଆଇଜି, ବରଗଡ଼ ଏସପିଙ୍କ ନିକଟରେ ଆତ୍ମସମର୍ପଣ କରିଛନ୍ତି। ଆମିଲାର ମୁଣ୍ଡ ଉପରେ ୪ ଲକ୍ଷ ଟଙ୍କା ଏବଂ ରଘୁ ମୁଣ୍ଡ ଉପରେ ୩ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା ହୋଇଥିଲା। ମାଓବାଦୀ ସଙ୍ଗଠନରେ ଶାରିରୀକ ଏବଂ ମାନସିକ ନିର୍ଯାତନା ବଢୁଥିବାରୁ ଏହି ଦୁଇ ମାଓବାଦୀ ସଙ୍ଗଠନ ଛାଡିଛନ୍ତି। ଉଭୟଙ୍କ ନାମରେ ବହୁ ମାମଲା ରହିଛି।  

ସୂଚନାନୁଯାୟୀ, ୨୦୧୦ ମସିହା ଠାରୁ ଗନ୍ଧମାର୍ଦ୍ଦନ ରିଜର୍ଭ ସଂରକ୍ଷିତ ଜଙ୍ଗଲରେ ଏରିଆ କମିଟି କମାଣ୍ଡର ଥିଲା ଆମିଲା। ବରଗଡ଼ ଏବଂ ବଲାଙ୍ଗୀର ଜିଲ୍ଲାରେ ମାଓ କାର୍ଯ୍ୟକଳାପ ବୃଦ୍ଧି କରିବାରେ ନେତୃତ୍ଵ ନେଇଥିଲା। ସେହିପରି ୨୦୧୨ ମସିହା ଠାରୁ ମାଓ ସଙ୍ଗଠନରେ ସାମିଲ ହୋଇଥିଲା ରଘୁ। ସେମାନଙ୍କ ନାଁରେ ବହୁ ମାମଲା ରହିଛି। ତେବେ ଏହି ଦୁଇ ମାଓବାଦୀଙ୍କୁ ସମାଜର ମୁଖ୍ୟ ସ୍ରୋତରେ ସାମିଲ କରାଯିବା ସହ ସମସ୍ତ ସୁବିଧା ଯୋଗାଇ ଦିଆଯିବ।