ମସ୍କୋ,୦୯/୦୮: ଅଢ଼େଇ ବର୍ଷରୁ ଅଧିକ ଦିନ ହେଲା ରୁଷ୍‌-ୟୁକ୍ରେନ୍‌ ଯୁଦ୍ଧ ଚାଲିଥିବାବେଳେ ଏବେ ଏହି ଲଢ଼େଇ ରୁଷ୍‌  ମାଟିରେ ଲଢ଼ାଯାଉଛି । ୟୁକ୍ରେନ୍‌ ସୈନ୍ୟ ଏବେ ରୁଷ୍‌ ସୀମା ଭିତରେ ପ୍ରବେଶ  କରି ରୁଷ୍‌ ସୈନ୍ୟଙ୍କ ସହ ଲଢ଼େଇ  କରୁଛନ୍ତି । ୟୁକ୍ରେନ୍‌ ଏବେ ରୁଷ୍‌ର କ୍ରସ୍କ ଅଞ୍ଚଳରେ ପଶି ୩ ଦିନ ହେଲା ସେଠାରେ ରୁଷ୍‌ ସୈନ୍ୟଙ୍କ ସହ ଲଢ଼ୁଛନ୍ତି ।  ସପ୍ତାହେ ଧରି ୟୁକ୍ରେନ ସୈନ୍ୟ ରୁଷ୍‌ର କ୍ରସ୍କ  ସୀମା ନିକଟରେ ଜୋରଦାର ଆକ୍ରମଣ ଜାରି ରଖିଥିଲା । ୟୁକ୍ରେନ୍‌ର ଜମିକୁ କବ୍‌ଜା କରିବା ଲକ୍ଷ୍ୟରେ ବାହାରିଥିବା ରୁଷ୍‌ ସୈନ୍ୟ ଏବେ  ନିଜ ଜମିକୁ ବଞ୍ଚାଇବା ପାଇଁ ସଂଘର୍ଷ କରୁଛନ୍ତି ।  ଏପରି ସ୍ଥିତିରେ ରୁଷ୍‌ ସେଠାରେ ଏମର୍ଜେନ୍ସି  ଘୋଷଣା କରିଛି ।  

କ୍ରସ୍କ ଡେପୁଟି ଗଭର୍ନର ଆଣ୍ଡ୍ରେଇ  ବେଲୋଷ୍ଟୋଟ୍‌ସ୍କି କହିଛନ୍ତି, ଅତିକମ୍‌ରେ  ୧ ହଜାର ୟୁକ୍ରେନ ସୈନ୍ୟ ଟ୍ୟାଙ୍କ ଏବଂ  ଯୁଦ୍ଧବାହନ ସହ ଗତ ମଙ୍ଗଳବାର ରୁଷ୍‌ ସୀମା  ଭିତରେ ପଶିଛନ୍ତି । ସେଠାରୁ ପ୍ରାୟ ୩ ହଜାର  ଲୋକଙ୍କୁ ସ୍ଥାନାନ୍ତର କରାଯାଇଛି । ଅନ୍ୟୁନ୍ୟ ୪ ସାଧାରଣ ନାଗରିକଙ୍କ ମୃତ୍ୟୁ ଘଟିଛି । ତେବେ ୟୁକ୍ରେନ୍‌ ପକ୍ଷରୁ ଏହି ଅତିକ୍ରମଣ ବାବଦରେ  କିଛି କୁହାଯାଇନାହିଁ । ୟୁକ୍ରେନ୍‌ ରାଷ୍ଟ୍ରପତି  ଭୋଲୋଡିଭି ଜେଲେନ୍‌ସ୍କିଙ୍କ ସହଯୋଗୀ ମିଖାଇଲୋ ପୋଡୋଲ୍ୟାକ୍‌ କହିଛନ୍ତି, ଯୁଦ୍ଧ ସବୁବେଳେ ଯୁଦ୍ଧ । ଏହାର ନିଜସ୍ୱ ନିୟମ  ରହିଛି । ଆକ୍ରମଣକାରୀକୁ ସବୁବେଳେ ଅନୁରୂପ ଫଳ ମିଳିଥାଏ ।