ନୂଆଦିଲ୍ଲୀ, ୨୦/୦୩: ପାକିସ୍ତାନ ବାଲୋଚିସ୍ତାନର ଗ୍ୱାଦର ବନ୍ଦର ଉପରେ ଆତଙ୍କବାଦୀ ଆକ୍ରମଣ ହୋଇଛି । ବନ୍ଧୁକ ଓ ବିସ୍ଫୋଟକ ନେଇ ଆସିଥିବା ଆକ୍ରମଣକାରୀ ଗ୍ୱାଦର ବନ୍ଦରରେ ପଶିବା ସହ ଆଖିବୁଜା ଗୁଳିମାଡ଼ କରିଥିଲେ । ଆକ୍ରମଣକାରୀ ଥିବା ଅଞ୍ଚଳକୁ ସୁରକ୍ଷାକର୍ମୀ ଘେରି ଯାଇ ପାଲଟା ଗୁଳିମାଡ଼ କରିଛନ୍ତି । ପାକିସ୍ତାନ ଗଣମାଧ୍ୟମ ଅନୁସାରେ, ପୋଲିସ ଓ ସୁରକ୍ଷାକର୍ମୀଙ୍କ ଗୁଳିରେ ୮ ଜଣ ସଶସ୍ତ୍ର ଆକ୍ରମଣକାରୀ ନିହତ ହୋଇଛନ୍ତି ।

ବନ୍ଦରରେ ଗୁଳିମାଡ଼ ଓ ବିସ୍ଫୋରଣ ଶବ୍ଦରେ ଆଖପାଖ ଅଞ୍ଚଳ ସ୍ତବ୍ଧ ହୋଇ ଯାଇଛି । ପାକିସ୍ତାନର ତୃତୀୟ ସବୁଠୁ ବଡ଼ ବନ୍ଦର ହେଉଛି ଗ୍ୱାଦର । ଯେଉଁଠି ଏକାଧିକ ସରକାରୀ କାର୍ଯ୍ୟାଳୟ ମଧ୍ୟ ରହିଛି । ଏବେ ଗ୍ୱାଦର ବନ୍ଦରରେ ଚୀନର ଇଞ୍ଜିନିୟର ନିର୍ମାଣ କାର୍ଯ୍ୟ ଜାରି ରଖିଥିବା ବେଳେ ଆକ୍ରମଣ ହୋଇଛି । ଏହା ଚୀନ-ପାକିସ୍ତାନର ଆର୍ଥିକ କରିଡର (ସିପିଇସି)ର ଅଂଶ । ଯାହାକି ବେଜିଂର ବେଲ୍ଟ ଆଣ୍ଡ୍ ରୋଡ୍ ଇନିସିଏଟିଭର କେନ୍ଦ୍ର ବିନ୍ଦୁ ।

ଗ୍ୱାଦର ବନ୍ଦରରେ ବିପୁଳ ସଂଖ୍ୟାରେ ଚୀନ୍ କର୍ମଚାରୀ କାମ କରୁଛନ୍ତି । ଚୀନ୍ କର୍ମଚାରୀ କାମ କରୁଥିବା ଅନେକ ସ୍ଥାନରେ ପୂର୍ବରୁ ପାକିସ୍ତାନର ଆତଙ୍କବାଦୀ ଆକ୍ରମଣ କରିଛନ୍ତି । ୨୦୨୩ ଅଗଷ୍ଟରେ ଗ୍ୱାଦର ବନ୍ଦରରେ ଚୀନ୍ ଶ୍ରମିକଙ୍କ ଉପରେ ଆକ୍ରମଣ ହୋଇଥିଲା । ଆକ୍ରମଣ ପାଇଁ ନିଜକୁ ଦାୟୀ କରିଥିଲା ବାଲୋଚିସ୍ତାନ ଲିବରେସନ୍ ଆର୍ମି ।

ସୂଚନାଯୋଗ୍ୟ, ଚୀନ୍-ପାକିସ୍ତାନ ଆର୍ଥିକ କରିଡର ପରିଯୋଜନାର ଗୁରୁତ୍ୱପୂର୍ଣ୍ଣ ଅଂଶ ହେଉଛି ଗ୍ୱାଦର ବନ୍ଦର । ଆରବସାଗର ପର୍ଯ୍ୟନ୍ତ ଚୀନ୍ ପହଞ୍ଚିବା ପାଇଁ ଏହା ଗୁରୁତ୍ୱପୂର୍ଣ୍ଣ । ଗତବର୍ଷ ଡିସେମ୍ବରରେ ପାକିସ୍ତାନ ଓ ଚୀନ୍ ଗ୍ୱାଦର ବନ୍ଦରକୁ ସିପିଇସି ଅନ୍ତର୍ଭୁକ୍ତ କରିବା ଲାଗି ରାଜି ହୋଇଥିଲେ । ଯାହା ଦ୍ୱାରା ଉଭୟ ଦେଶର ଲାଭ ହେବ । ସିପିଇସି ପ୍ରକଳ୍ପ ବାଲୋଚିସ୍ତାନର ଗ୍ୱାଦର ବନ୍ଦରକୁ ଚୀନର ଶିଞ୍ଜିୟାଙ୍ଗ ପ୍ରଦେଶ ସହ ଯୋଡ଼ୁଛି ।