ନୂଆଦିଲ୍ଲୀ: ରବିବାର ଦିନ ଆମେଠୀରେ ଏକ ଭୟଙ୍କର ସଡ଼କ ଦୁର୍ଘଟଣା ଦେଖିବାକୁ ମିଳିଛି । ଏଠାରେ ଏକ ବୋଲେରୋ କାର ଏବଂ ବୁଲେଟ୍ ବାଇକ୍ ମଧ୍ୟରେ ଦୁର୍ଘଟଣା ଘଟିଛି । ଏହା ପରେ କାରଟି ଏକ ଗଛ ସହିତ ଧକ୍କା ହୋଇଥିଲା । ଏହି ଦୁର୍ଘଟଣାରେ ତିନିଜଣ ମହିଳା ଏବଂ ଗୋଟିଏ ଶିଶୁଙ୍କ ସମେତ ପାଞ୍ଚ ଜଣଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି । ୬ରୁ ଅଧିକ ଲୋକ ଗୁରୁତର ଆହତ ହୋଇଛନ୍ତି । ଏହି ଦୁର୍ଘଟଣା ପରେ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଚିକିତ୍ସା ପାଇଁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରିଛି । ତେବେ ଦୁର୍ଘଟଣାରେ ଅନେକଙ୍କ ଅବସ୍ଥା ଗୁରୁତର ଥିବା କୁହାଯାଉଛି । ଦୁର୍ଘଟଣା ଏତେ ଭୟଙ୍କର ଥିଲା ଯେ ଉଭୟ ଯାନ ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ଏହି ଘଟଣା ମୁସିଗଞ୍ଜ ପୋଲିସ ଷ୍ଟେସନ ଅଞ୍ଚଳର ଜାମୋ ଭାଦର ଛକରେ ଘଟିଛି ।
ସୂଚନା ମୁତାବକ, ସୁଲତାନପୁର ଜିଲ୍ଲାର ଇସଲାମଗଞ୍ଜ ଗାଁର ବାସିନ୍ଦା ଆକବର ନିଜ ବୋଲେରୋ କାରରେ ନିଜ ପରିବାର ସଦସ୍ୟଙ୍କ ସହ ମୁସିଗଞ୍ଜ ପୋଲିସ ଷ୍ଟେସନ ଅଞ୍ଚଳର ଧରାଇରେ ଏକ କାର୍ଯ୍ୟକ୍ରମରେ ଭାଗ ନେବାକୁ ଯାଇଥିଲେ । ବୋଲେରୋ ଜାମୋ ଭଦର ଛକ ନିକଟରେ ଦୁର୍ଘଟଣାର ଶିକାର ହୋଇଛି । ସାମ୍ନା ପଟୁ ଆସୁଥିବା ବୁଲେଟ୍ ସହ ଗାଡିଟି ଦୁର୍ଘଟଣାଗସ୍ତ ହୋଇଛି । ଏହି ଦୁର୍ଘଟଣା ଏତେ ଭୟଙ୍କର ଥିଲା ଯେ ବୁଲେଟ୍ ଆରୋହୀ ଦୁର୍ଗେଶ ଉପାଧ୍ୟାୟ, ପୁଅ ରାମ ଇକବାଲ ଏବଂ ଭଉଣୀ ବନ୍ଦନାଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି । ତେବେ ଗଛକୁ ଧକ୍କା ଦେବା ପରେ ବୋଲେରୋରେ ଯାତ୍ରା କରୁଥିବା ମହିଳା, ଶାହିର (୪୦), ଜାଗିର ଖାନଙ୍କ ପତ୍ନୀ ଶବନମ (୩୫), ଦିଲଶାଦଙ୍କ ପତ୍ନୀ ମଧ୍ୟ ମୃତ୍ୟୁ ବରଣ କରିଥିଲେ।