ନୂଆଦିଲ୍ଲୀ ୨୯/୦୮: ଗତ କୋପା ଆମେରିକା କପ୍ ସମୟରେ ଶୃଙ୍ଖଳା ଭଙ୍ଗ କରିଥିବା ଉରୁଗୁଏର ୫ ଜଣ ଷ୍ଟାର୍ ଖେଳାଳି ନିଲମ୍ବିତ ହୋଇଛନ୍ତି । ଉରୁଗୁଏ ଓ କଲମ୍ବିଆ ମଧ୍ୟରେ ଅନୁଷ୍ଠିତ ସେମି ଫାଇନାଲ୍ ମୁକାବିଲା ସମୟରେ ଉରୁଗୁଏର ଖେଳାଳିମାନେ ଗ୍ୟାଲେରୀରେ ପ୍ରବେଶ କରି ଦର୍ଶକଙ୍କ ସହ ଗଣ୍ଡଗୋଳ କରିଥିଲେ । ଉକ୍ତ ଘଟଣାର ତଦନ୍ତ କରୁଥିବା କନ୍ମେବଲ୍ ଉରୁଗୁଏ ଫୁଟବଲ୍ ଆସୋସିଏସନ୍କୁ ଅର୍ଥଦଣ୍ଡ ଓ ଚେତବନୀ ଦେବା ସହ ଦଳର ୫ ଜଣ ଖେଳାଳିଙ୍କୁ ଅର୍ଥଦଣ୍ଡ ଓ ଅନ୍ତର୍ଜାତୀୟ ଫୁଟବଲ୍ରୁ କିଛି ମ୍ୟାଚ୍ ବାସନ୍ଦ କରିଛି ।
ଲିଭରପୁଲ୍ ପକ୍ଷରୁ ଖେଳୁଥିବା ଡାରୱିନ ନ୍ୟୁନେଜ ସର୍ବାଧିକ ୫ଟି ମ୍ୟାଚ୍ରୁ ନିଲମ୍ବିତ ହୋଇଛନ୍ତି । ଏଥିସହ ୨୦,୦୦୦ ଡଲାର ଜରିମାନା ଦାବି କରାଯାଇଛି । ସେହିପରି ମିଡ୍ ଫିଲ୍ଡର ରୋଡ୍ରିଗୋ ବେଣ୍ଟାଙ୍କର ୪ଟି ମ୍ୟାଚ ଓ ୧୬,୦୦୦ଡଲାର, ରୋନାଲ୍ଡା ଆରୌଜୋ, ଜୋସ ମାରିଆ ଗିମିନେଜ ଓ ମାଥିଆସ ଓଲିଭିଏରା ୩ଟି ଲେଖାଏଁ ମ୍ୟାଚ୍ରୁ ନିଲମ୍ବିତ ହେବା ସହ ୧୨,୦୦୦ଡଲାର ଜରିମାନ ଭରଣା କରିବେ । ଉରୁଗୁଏ ଫୁଟବଲ୍ ଆସୋସିଏସନ୍କୁ ୨୦,୦୦୦ ଡଲାର ଜରିମାନା ଦେବାକୁ ନିର୍ଦ୍ଦେଶ ଦିଆଯାଇଛି ।
ପ୍ରମୁଖ ଖେଳାଳି ନିଲମ୍ବିତ ହେବା ଫଳରେ ଉରୁଗୁଏର ଆଗାମୀ ବିଶ୍ୱକପ୍ ଯୋଗ୍ୟତା ପର୍ଯ୍ୟାୟ ପ୍ରଭାବିତ ହେବ । ସେପ୍ଟେମ୍ବରରୁ ନଭେମ୍ବର ମଧ୍ୟରେ ଉରୁଗୁଏ ଯୋଗ୍ୟତା ପର୍ଯ୍ୟାୟର ପାରାଗୁଏ, ଭେନେଜୁଏଲା, ପେରୁ, ଇକ୍ୱେଡର, କଲମ୍ବିଆ, ଓ ବ୍ରାଜିଲକୁ ଭେଟିବାର କାର୍ଯ୍ୟକ୍ରମ ରହିଛି ।
