ଜୟପୁର,୦୯/୦୯: ସମୟ ସାହୁ । ବୟସ ୨୧ । ମୟୂରଭଞ୍ଜ ଜିଲ୍ଲାର ମୂଳ ବାସିନ୍ଦା । କର୍ମକ୍ଷେତ୍ର କିନ୍ତୁ ଆମେରିକା । ପରିବାର ସହ ସେଠାରେ ବାପା ମାନସ ସାହୁ ଓ ମାଆ ଆୟଲିନ୍ ବନିକଙ୍କ ସହ ରହୁଛନ୍ତି । ଆମେରିକାର ସକ୍ରିୟ ରାଜନୀତିରେ ପାଦ ଦେଇ ବେଶ୍ ଚର୍ଚ୍ଚିତ ସମୟ । ଡେମାକ୍ରାଟିକ ପାର୍ଟିର ଜଣେ ସକ୍ରିୟ ସଦସ୍ୟ । ରାଜନୀତିରେ ତାଙ୍କ ଦମଦାର ଏଣ୍ଟ୍ରିକୁ ଆଗାମୀ ରାଷ୍ଟ୍ରପତି ନିର୍ବାଚନରେ ପ୍ରାର୍ଥୀ ହେବାକୁ ଥିବା କମଳା ହାରିସ ସ୍ୱାଗତ କରିଛନ୍ତି । ତାଙ୍କ ଉଚ୍ଚକୋଟୀର ରାଜନୈତିକ ଭାଷଣକୁ ପସନ୍ଦ କରିଛନ୍ତି । ସମୟଙ୍କ ରାଜନୈତିକ କ୍ୟାରିୟର ଏବଂ ସାଂଗଠନିକ ଦକ୍ଷତାକୁ ପ୍ରଶଂସା କରିଛନ୍ତି । ଆମେରିକା ଭଳି ପ୍ରଭାବଶାଳୀ ରାଷ୍ଟ୍ରର ସକ୍ରିୟ ରାଜନୀତିରେ ଜଣେ ଓଡ଼ିଆ ପୁଅର ଏଭଳି ଚମକ ଏବେ ତାଙ୍କ ଗାଁ, ସମ୍ପର୍କୀୟଙ୍କ ପାଇଁ ଖୁସିର କାରଣ ହୋଇଛି । କୋଟିକୋଟି ଓଡ଼ିଆଙ୍କ ପାଇଁ ଏବେ ଗର୍ବର ବିଷୟ ହୋଇଛନ୍ତି ସମୟ । ପିଲାଟି ବେଳରୁ ରାଜନୀତି ପ୍ରତି ବିଶେଷ ରୁଚି ରଖିଥିବା ସମୟ ଆଗାମୀ ଦିନରେ ଚାକିରି କରିବାକୁ ନିଷ୍ପତ୍ତି ନେଇଥିଲେ ହେଁ ରାଜନୀତିକୁ କେବେ ଛାଡ଼ିପାରିବେ ନାହିଁ ବୋଲି କହିଛନ୍ତି ।
ସୂଚନା ଅନୁଯାୟୀ, ମୟୂରଭଞ୍ଜ ଜିଲ୍ଲାର ମୂଳ ବାସିନ୍ଦା ହେଉଛନ୍ତି ମାନସ । ପ୍ରଥମେ ରାୟଗଡ଼ାରେ ଚାକିରି କରୁଥିଲେ । ପରେ ଅନ୍ୟ ଏକ ଚାକିରି ପାଇ ଚାଲିଯାଇଥିଲେ ଆମେରିକା । ସେଠାରେ ନ୍ୟୁ ହାମ୍ସସାୟାର ରାଜ୍ୟର ନାସୁଆ ସହରରେ ରହୁଛନ୍ତି । ଚାକିରି ଛାଡ଼ି ଏବେ ହୋଟେଲ ବ୍ୟବସାୟ କରୁଛନ୍ତି ମାନସ । ସମୟଙ୍କ ଜନ୍ମ ଆମେରିକାରେ । ୨୦୦୪ ମସିହା ଏପ୍ରିଲ୍ ୧୯ତାରିଖରେ । ସେଠାକାର ସେ ନାଗରିକତ୍ୱ ଗ୍ରହଣ କରିଛନ୍ତି । ସମୟ ଯେତେବେଳେ ବିଦ୍ୟାଳୟରେ ପାଠପଢ଼ା ଆରମ୍ଭ କଲେ ସେହି ସମୟରେ ଛାତ୍ର ରାଜନୀତିରେ ସକ୍ରିୟ ଅଂଶଗ୍ରହଣ କରିଥିଲେ ା ପାଠପଢ଼ା ସହ ରାଜନୀତିରେ ଅଧିକ ସମୟ ବିତାଉଥିଲେ । ୨୦୧୬ରେ ନିର୍ବାଚନ ପୂର୍ବବର୍ତ୍ତୀ ରାଲିରେ ଡେମୋକ୍ରାଟିକ୍ ଛାତ୍ର ଦଳର ନେତୃତ୍ୱ ନେଇଥିଲେ । ୨୦୨୦ ମସିହାରେ ସକ୍ରିୟ ରାଜନୀତିରେ ପ୍ରବେଶ କରିଥିଲେ ସମୟ । ହାଇସ୍କୁଲରେ ଭାଇସ୍ ଚେୟାରମ୍ୟାନ ହେବାର ଗୌରବ ଅର୍ଜନ କରିଥିଲେ । ଡେମୋକ୍ରାଟିକ୍ ଦଳର ପ୍ରାର୍ଥୀ ଭାବେ ସେ ରିପବ୍ଲିକ୍ ପାର୍ଟି ପ୍ରାର୍ଥୀଙ୍କୁ ପରାସ୍ତ କରି ଚର୍ଚ୍ଚାରେ ରହିଥିଲେ । ଛାତ୍ର ଜୀବନରୁ ରାଜନୀତି ଆରମ୍ଭ କରିଥିବା ସମୟ ଏବେ ଡାର୍ଟ ମାଉଥ୍ କଲେଜରେ ପଢ଼ୁଛନ୍ତି ।
୨୦୨୨-୨୩ରେ ସେ ଡେମାକାଟ୍ରିକ ପାର୍ଟିର ଏକ ଗୁରୁ ଦାୟିତ୍ୱ ପାଇଥିଲେ । ହାଇସ୍କୁଲ ଡେମୋକ୍ରାଟ୍ ଅଫ୍ ଆମେରିକାର ସେ ନ୍ୟାସନାଲ୍ ଚେୟାରମ୍ୟାନ ଭାବେ ମନୋନୀତ ହୋଇଥିଲେ । ଆମ ଦେଶର ବିଭିନ୍ନ ଜାତୀୟ ଦଳର ଏକ ଗୁରୁତ୍ୱପୂର୍ଣ୍ଣ ପଦ ଭଳି ଡେମୋକ୍ରାଟିକ୍ ଦଳର ସର୍ବକନିଷ୍ଠ ସଦସ୍ୟ ଭାବେ ସେ ଏହି ପଦ ହାସଲ କରିଥିଲେ । ସକ୍ରିୟ ରାଜନୀତିରେ କଲେଜ ପଢ଼ୁଆ ସମୟଙ୍କ ଏଭଳି ଯୋଗଦାନ ତାଙ୍କ ସମସାମୟିକ ଛାତ୍ରଛାତ୍ରୀଙ୍କୁ ବେଶ୍ ପ୍ରଭାବିତ କରିଥିଲା । ଡେମୋକ୍ରାଟିକ୍ ଦଳର ନେତାଙ୍କ ପାଇଁ ଭାଷଣ ଦେବା ହେଉ କିମ୍ବା ରାଲିରେ ସମ୍ବୋଧନ-ସବୁ କ୍ଷେତ୍ରରେ ବେଶ୍ ଚର୍ଚ୍ଚିତ ସମୟ । ସେ ଏବେ ବୋର୍ଡ ଅଫ୍ ଏଜୁକେସନରେ ପ୍ରତିନିଧିତ୍ୱ କରୁଛନ୍ତି । ଆମେରିକା ରାଜନୀତିରେ ଡେମୋକ୍ରାଟିକ୍ ଦଳର ଦବ୍ଦବା ଥିବାବେଳେ ଉକ୍ତ ଦଳର ସକ୍ରିୟ ରାଜନୀତିରେ ସମୟଙ୍କ ଭଳି ଯୁବ ପ୍ରତିନିଧିତ୍ୱ ଓଡ଼ିଆ ଯୁବପିଢ଼ିଙ୍କ ପାଇଁ ପ୍ରେରଣା ନିଶ୍ଚୟ ।
ବିଶାଖାପାଟଣାର ପୂର୍ବତନ ଡିଆର୍ଏମ୍ ଅନୁପ ଶତପଥୀ କହିଛନ୍ତି, ମାନସ ହେଉଛନ୍ତି ତାଙ୍କର ଅତି ଘନିଷ୍ଠ ବନ୍ଧୁ । ନିକଟରେ ସେ(ଅନୁପ) ଆମେରିକା ଯାଇଥିଲେ । ସେଠାକାର ରାଜନୀତିରେ ସମୟଙ୍କ ପତିଆରା ଦେଖି ଚକିତ ହୋଇଥିଲେ । ଆଗାମୀ ଦିନରେ ସମୟ ଏ କ୍ଷେତ୍ରରେ ଆହୁରି ସଫଳତା ପାଇବେ ବୋଲି ଅନୁପ ଆଶା ରଖିଛନ୍ତି ।
