ନୂଆଦିଲ୍ଲୀ,୮।୮: ପ୍ୟାରିସ୍ ଅଲିମ୍ପିକ୍ସରେ ସ୍ବର୍ଣ୍ଣ ପଦକ ମୁକାବିଲା ପୂର୍ବରୁ ଭାରତୀୟ ମହିଳା ରେସଲର ଭିନେଶ ଫୋଗାଟ୍ ହୋଇଛନ୍ତି ଅଯୋଗ୍ୟ ଘୋଷିତ। ଏହି ପ୍ରସଙ୍ଗରେ ରାଜ୍ୟସଭାରେ ଗୁରୁବାର ଚର୍ଚ୍ଚା କରିବା ନେଇ ବିରୋଧି ଦାବି କରିଥିଲା। ବିରୋଧି ଦଳର କିଛି ସଦସ୍ୟଙ୍କ ମର୍ଯ୍ୟାଦାବିହୀନ ଆଚରଣରେ ଦୁଃଖି ହୋଇ ବାଚସ୍ପତି ଜଗଦୀପ ଧନକର ଆସନ ଛାଡି ଚାଲି ଯାଇଥଲେ। ସେ କିଛି ସମୟ ପାଇଁ ଆସନରେ ବସିବାରେ ସକ୍ଷମ ହୋଇପାରିନଥିଲେ। ଏପରିକି ଗୃହରେ ହଙ୍ଗାମା କରୁଥିବା ସାଂସଦଙ୍କୁ ଚେତାବନୀ ଦେଇ କହିଥିଲେ, ଏତେ ଜୋରରେ ଚିଲାଇବାର ସାହାର କିଭଳି କଲ? ଆଉ ଥରେ ଏଭଳି ହେଲେ ଆପଣଙ୍କୁ ବାହାରକୁ ଯିବାର ରାସ୍ତା ଦେଖାଇ ଦିଆଯିବ।
ସକାଳେ ଗୃହକାର୍ଯ୍ୟ ଆରମ୍ଭ ହେବାମାତ୍ରେ ଧନକର ଜରୁରୀ ଦସ୍ତାବିଜ ଗୃହରେ ରଖିଥିଲେ। ଏହାପରେ ଶୂନ୍ୟକାଳ ଆରମ୍ଭ ହେବାମାତ୍ରେ ବିଜେପିର ଅଜିତ ଗୋପଚନ୍ଦେଙ୍କୁ ନିଜର ପ୍ରସଙ୍ଗ ଉଠାଇବାକୁ କହିଥିଲେ। ଏହାର ତୁରନ୍ତ ପରେ କଂଗ୍ରେସ, ଟିଏମ୍ସି ସହିତ ବିରୋଧି ଦଳର କିଛି ସଦସ୍ୟ ନିଜ ସ୍ଥାନରେ ଠିଆ ହୋଇଥିଲେ ଓ ଫୋଗାଟ୍ଙ୍କୁ ଅଯୋଗ୍ୟ ଘୋଷିତ କରାଯିବା ପ୍ରସଙ୍ଗରେ ଚର୍ଚ୍ଚା କରିବାକୁ ଦାବି କରିଥିଲେ। ହଙ୍ଗାମା ମଧ୍ୟରେ ଗୋପଚନ୍ଦେ ନିଜର ପ୍ରସଙ୍ଗ ଉଠାଇଥିଲେ।
ଏହି ସମୟରେ ଟିଏମ୍ସିର ଡରେକ୍ ଓ’ବ୍ରାଏନ୍ ଗୃହରେ ଆରମ୍ଭ କରିଦେଇଥିଲେ ହଙ୍ଗାମା। ଏହା ଦେଖି ବାଚସ୍ପତି ତାଙ୍କୁ କହିଥିଲେ, ଗୃହରେ ଆପଣଙ୍କ ଆଚରଣ ସବୁଠାରୁ ଖରାପ ।ଆପଣ ଆସନରେ ଥାଇ ଚିଲାଉଛନ୍ତି। ମୁଁ ଏହାର ନିନ୍ଦା କରୁଛି। ଆଗକୁ ଏଭଳି ହେଲେ ମୁଁ ଆପଣଙ୍କୁ ବାହାରର ରାସ୍ତା ଦେଖାଇବି। ଆସନରେ ଥାଇ କିଭଳି ଚିଲାଇବାକୁ ସାହାସ କଲେ ? ଏହା ଅତି ର୍ଦୁଭାଗ୍ୟପୂର୍ଣ୍ଣ ଆଚରଣ।’
