ଭୁବନେଶ୍ୱର ୦୧/୦୪: ପାଣି ପିଇବା କିମ୍ବା ରଖିବା ପାଇଁ ଆମେ ଭିନ୍ନ ଭିନ୍ନ ବୋତଲ ବ୍ୟବହାର କରିଥାଉ । ଏପରିକି ମାର୍କେଟରେ ବିଭିନ୍ନ ପ୍ରକାରର ପାଣି ବୋତଲ ମିଳିଯାଇଥାଏ । ଏସବୁ ବୋତଲକୁ ନେଇ ଲୋକଙ୍କ ଭିତରେ ଦ୍ୱନ୍ଦ୍ୱ ସୃଷ୍ଟି ହେବା ସ୍ୱାଭାବିକ । କାରଣ କେଉଁ ବୋତଲରେ ପାଣି ପିଇବା ସ୍ୱାସ୍ଥ୍ୟ ପାଇଁ ହିତକର ତାହା ସେମାନେ ଜାଣି ପାରିନଥାନ୍ତି । ତେବେ ଚାଲନ୍ତୁ ଜାଣିବା କେଉଁ ବୋତଲରେ ପାଣି ପିଇବା କେତେ ସୁରକ୍ଷିତ? ସୁସ୍ଥ ରହିବା ପାଇଁ ପାଣିର ଗୁଣବତ୍ତାକୁ ଗୁରୁତ୍ୱ ଦେବା କେତେ ଜରୁରି ସମସ୍ତେ ଜାଣିନ୍ତି । ପ୍ଲାଷ୍ଟିକ୍ ବୋତଲରେ ପାଣି ପିଇବା କ୍ଷତିକାରକ ଏହା ସମସ୍ତଙ୍କୁ ଜଣା । କିନ୍ତୁ ଷ୍ଟିଲ୍, ଆଲୁମିନିୟମ୍ ବା ତମ୍ବାର ବୋତଲକୁ ନେଇ ଦ୍ୱନ୍ଦ୍ୱରେ ରହିଥାନ୍ତି ।
ପ୍ଲାଷ୍ଟିକ୍ ବୋତଲ ଆଦୌ ନୁହେଁ :
ପ୍ଲାଷ୍ଟିକ ବୋତଲ କମ୍ ଟଙ୍କା ହୋଇଥିବା ବେଳେ ନେବା-ଆଣିବାରେ ମଧ୍ୟ ସୁବିଧା ହୋଇଥାଏ । ତେଣୁ ପ୍ରାୟ ଲୋକ ଏହାକୁ ଗୁରୁତ୍ୱ ଦେଇଥାନ୍ତି । କିନ୍ତୁ ଏହା ଅନେକ ସ୍ୱାସ୍ଥ୍ୟ ସମସ୍ୟା ସୃଷ୍ଟି କରିଥାଏ । ଗରମ ଓ ଖରାରେ ଯିବା ଆସିବା ସମୟରେ ପ୍ଲାଷ୍ଟିକ ବୋତଲରୁ ହାନିକାରକ ରସାୟନ ବାହାରି ପାଣିରେ ମିଶିଥାଏ, ଯାହାକୁ ଆମେ ପରେ ପିଇଥାଉ । କିଛିଦିନ ପରେ ବିଭିନ୍ନ ରୋଗରେ ଆକ୍ରାନ୍ତ ହେବାର ଆଶଙ୍କା ବଢିଥାଏ । ପ୍ଲାଷ୍ଟିକ୍ ବୋତଲରେ ବିସ୍ଫୋନଲ୍-ଏ ଓ କେମିକାଲ୍ କମ୍ପୋନେଟ୍ ରହିଥାଏ, ଯାହା ପ୍ଲାଷ୍ଟିକ୍ ଜିନିଷକୁ ମଜଭୁତ କରିବାରେ ସହଯୋଗ କରିଥାଏ । ପ୍ଲାଷ୍ଟିକ୍ ବୋତଲରେ ଥିବା ଏହି ତତ୍ତ୍ୱ ପାଣି ସହ ମିଶି ଶରୀରକୁ ଯାଇଥାଏ । ଫଳରେ ମୋଟାପଣ, ପ୍ରଜନନ କ୍ଷମତାରେ ସମସ୍ୟା ଓ କର୍କଟ ପରି ରୋଗର ଆଶଙ୍କା ସୃଷ୍ଟି କରିଥାଏ ।
ମେଟାଲ୍ ବୋତଲ ଶ୍ରେଷ୍ଠ ବିକଳ୍ପ :
ପ୍ଲାଷ୍ଟିକ୍ ବୋତଲରୁ ହେଉଥିବା ସମସ୍ୟାକୁ ଜାଣିବା ପରେ କୌଣସି ମେଟାଲ୍ ବା ଧାତୁ ବୋତଲ ବ୍ୟବହାର କରିବା ଉଚିତ୍ । ଅବଶ୍ୟ ଯେକୌଣସି ମେଟାଲ୍ ବା ଧାତୁ ବୋତଲ ପ୍ଲାଷ୍ଟିକଠାରୁ ଅଧିକ ଟଙ୍କା ପଡିଥାଏ । କିନ୍ତୁ ଦୀର୍ଘ ଦିନ ଚାଲିଥାଏ । ସେହିପରି ଏହି ପାଣି ବୋତଲରେ କୌଣସି ରାସାୟନ ନଥାଏ । ଏହାବ୍ୟତୀତ ପାଣିର ତାପମାତ୍ରା ମଧ୍ୟ ନିୟନ୍ତ୍ରିତ ରହିଥାଏ । ତେବେ ଚାଲନ୍ତୁ ଜାଣିବା ପାଣି ପିଇବା ପାଇଁ କେଉଁ ଧାତୁର ବୋତଲ ସର୍ବୋକୃଷ୍ଠ ।
ଷ୍ଟେନ୍ଲେସ୍ ଷ୍ଟିଲ୍ :
ଯଦି ଅଧିକ ଦିନ ଚାଲିବାର ବିକଳ୍ପ ଖୋଜୁଥାନ୍ତି, ତେବେ ଷ୍ଟିଲ୍ ବୋତଲ ହିଁ ଶ୍ରେଷ୍ଠ । ଏହା କ୍ଷତିକାରକ ରସାୟନଠାରୁ ମଧ୍ୟ ସୁରକ୍ଷା ଦେବା ସହ କଳଙ୍କି ଲାଗିବାର ଭୟ ନଥାଏ । ଏଥିରେ ପାଣି ରଖିବା ଦ୍ୱାରା ସ୍ୱାଦ ଉପରେ କିଛି ପ୍ରଭାବ ପଡି ନଥାଏ । ଏହାକୁ ସଫା କରିବାରେ କୌଣସି ସମସ୍ୟା ନଥାଏ ।
ଆଲୁମିନିୟମ୍ ବୋତଲ :
ଏହା ଖୁବ୍ ହାଲ୍କା ଓ ପ୍ଲାଷ୍ଟିକ୍ଠାରୁ ବହୁ ଗୁଣରେ ଭଲ । କିନ୍ତୁ ଏହାକୁ ଦୀର୍ଘଦିନ ବ୍ୟବହାର କରିବା ଦ୍ୱାରା ଅନେକ ସ୍ୱାସ୍ଥ୍ୟ ସମସ୍ୟା ଦେଖା ଦେଇଥାଏ । ଯେପରିକି ଡିମେନ୍ସିଆ ଓ ଆନେମିଆ ଆଦି । ସେହିପରି ଲିଭର୍ ଓ ପେଟ ସମସ୍ୟା ଆଦି ସୃଷ୍ଟି କରିଥାଏ ।
ତମ୍ବା ବୋତଲ :
କୁହାଯାଏ ତମ୍ବା ବୋତଲରେ ପାଣି ପିଇବା ଦ୍ୱାରା ହଜମ ପ୍ରକ୍ରିୟା ତୀବ୍ର ହୋଇଥାଏ । ଏପରିକି ରୋଗ ପ୍ରତିରୋଧକ ଶକ୍ତି ମଧ୍ୟ ବଢାଇଥାଏ । କିନ୍ତୁ କୌଣସି ଅମ୍ଲିୟ ପାନୀୟ ସଂସ୍ପର୍ଶରେ ଆସିଲେ ପ୍ରତିକ୍ରିୟା ହେବା ସହ ରଙ୍ଗ ପରିବର୍ତ୍ତନ କରି ସ୍ୱାଦରେ ମଧ୍ୟ ଭିନ୍ନତା ଆସିଥାଏ । କେବଳ ସ୍ୱାଦ ନୁହେଁ,ଏପରି ପାଣି ଅଧିକ ପିଇବା ଦ୍ୱାରା ଶରୀର ଉପରେ କ୍ଷତି ପହଞ୍ଚିବାର ଆଶଙ୍କା ମଧ୍ୟ ରହିଥାଏ ।
ବୋତଲ କିଣିବା ସମୟରେ :
ବୋତଲର କୋଟିଂ ଉପରେ ଧ୍ୟାନ ଦେବାକୁ ଭୁଲନ୍ତୁ ନାହିଁ । ଏହା ନନ୍-ଟକ୍ସିକ୍ ଓ ଫୁଡ୍ ସେଫ୍ ହୋଇଥିବା ଆବଶ୍ୟକ । ଉଚ୍ଚ ଗୁଣବତ୍ତା ଓ ଫୁଡଗ୍ରେଡ୍ ଷ୍ଟେନ୍ଲେସ୍ ଷ୍ଟିଲ୍ ହିଁ କିଣନ୍ତୁ । ପାଣିର ତାପମାତ୍ରାକୁ ନିୟନ୍ତ୍ରିତ ରଖିପାରୁଥିବା ବୋତଲ ହିଁ କିଣନ୍ତୁ ।
