ଅନୁଗୁଳ, ୧୯/୦୧ : ଟ୍ରକ୍ ଧକ୍କାରେ ଆଶାକର୍ମୀ ମୃତ। ୫୫ନଂ ଜାତୀୟ ରାଜପଥ ଅନୁଗୁଳ ଥାନା ଛକ ସମ୍ମୁଖ ଟ୍ରାଫିକ୍ ପୋଷ୍ଟ ନିକଟରେ ଏହି ଦୁର୍ଘଟଣା ଘଟିଛି। ମୃତକ ଜଣଙ୍କ ଆଠମଲ୍ଲିକ ମାଧପୁର ଅଞ୍ଚଳର କୁମାରୀ ସାହୁ ବୋଲି ଜଣାପଡିଛି।
ସୂଚନାନୁଯାୟୀ, କୁମାରୀ ସାହୁ ଅନୁଗୁଳ ମେଡିକାଲରେ ଜଣେ ପ୍ରସୂତୀ ମହିଳାଙ୍କୁ ଆଡମିଶନ କରି ଏକ ସ୍କୁଟିରେ ଅନ୍ୟ ଜଣେ ଲୋକଙ୍କ ସହ ଫେରୁଥିଲେ। ଅନୁଗୁଳ ଥାନା ଛକ ସମ୍ମୁଖ ଟ୍ରାଫିକ୍ ପୋଷ୍ଟ ନିକଟରେ ତାଙ୍କୁ ଏକ ଟ୍ରକ୍ ଧକ୍କା ଦେଇଥିଲା। ଟ୍ରକ୍ ଚକା ତଳେ ଚାପି ହୋଇ ତାଙ୍କର ମୃତ୍ୟୁ ଘଟିଛି। ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି। ନିକଟରେ ପୋଲିସ ଷ୍ଟେସନ ଥିବାରୁ ତୁରନ୍ତ ଘଟଣା ସ୍ଥଳକୁ ପୋଲିସ ପହଁଚି ଲୋକଙ୍କୁ ବୁଝାସୁଝା କରି ଶବ ଉଦ୍ଧାର କରିଛି। ଶବ ବ୍ୟବଚ୍ଛେଦ ପରେ ମୃତକଙ୍କ ଘର ଲୋକଙ୍କୁ ହସ୍ତାନ୍ତର କରାଯିବ ବୋଲି ସୂଚନା ମିଳିଛି। ବର୍ତ୍ତମାନ ଗାଡି ଚଳାଚଳ ସ୍ଵାଭାବିକ ରହିଛି।