ଭୁବନେଶ୍ୱର,୩୧/୦୫: ତମାଖୁମୁକ୍ତ କ୍ୟାମ୍ପସ କରିବା ପାଇଁ ବିଭିନ୍ନ ପଦକ୍ଷେପ ନିଆଯାଉଛି । ତମାଖୁ ବର୍ଜନ ଦିବସ ଆସିଲେ ସଚେତନତା କାର୍ଯ୍ୟକ୍ରମ କରାଯାଉଛି । ହେଲେ ସ୍କୁଲ, କଲେଜ ପାଖରେ ଖୋଲିଥିବା ସିଗାରେଟ୍, ଗୁଟ୍ଖା ଦୋକାନ ବନ୍ଦ ହୋଇପାରୁନି ।
ନିୟମ ଅଛି, ଶିକ୍ଷାନୁଷ୍ଠାନର ଶହେ ମିଟର ପରିସୀମା ମଧ୍ୟରେ କୌଣସି ନିଶା ସାମଗ୍ରୀ ଦୋକାନ ରହିବ ନାହିଁ । ଏହି ଆଇନ୍ ୨୦୦୩ରୁ ଲାଗୁ କରାଯାଇଛି । ହେଲେ ଏବେ ବି ଶିକ୍ଷାନୁଷ୍ଠାନ ନିକଟରେ ମାଳମାଳ ନିଶାଦ୍ରବ୍ୟ ଦୋକାନ ରହିଛି । ଶିକ୍ଷାର୍ଥୀମାନେ ଏଠାରୁ ନିଶା ସେବନ କରୁଛନ୍ତି । ନିରବଦ୍ରଷ୍ଟା ପୁଲିସ ପ୍ରଶାସନର ବେଶ୍ ଫାଇଦା ନେଇ ଦୋକାନୀମାନେ ଖୁଲମ୍ଖୁଲ୍ଲା ବିକ୍ରି କରୁଛନ୍ତି । ଏପରିକି ଗଞ୍ଜେଇ ଓ ବ୍ରାଉନ୍ସୁଗାର ବି ଏସବୁ ଦୋକାନରେ ମିଳୁଥିବା ଜଣାପଡ଼ିଛି ।
ଶୁକ୍ରବାର ବିଶ୍ୱ ତମାଖୁ ବର୍ଜନ ଦିବସ । ବିଭିନ୍ନ ଶିକ୍ଷାନୁଷ୍ଠାନରେ ଏହା ପାଳନ କରାଯିବ । ସଚେତନତା ଶୋଭାଯାତ୍ରା କରାଯିବ । ପ୍ରତିବର୍ଷ ଏପରି ହେଉଛି । ହେଲେ ଶିକ୍ଷାନୁଷ୍ଠାନ ନିକଟରେ ବିକ୍ରି ହେଉଥିବା ନିଶାଦ୍ରବ୍ୟକୁ ବନ୍ଦ କରାଯାଇପାରୁନାହିଁ । ପୁଲିସ ପ୍ରଶାସନ ଠାରୁ ଆରମ୍ଭ କରି ଜିଲ୍ଲା ପ୍ରଶାସନ ସମସ୍ତେ ଦେଖି ନଦେଖିଲା ପରି ରହୁଛନ୍ତି ।
ରାଜଧାନୀର ଅନେକ ପ୍ରତିଷ୍ଠିତ ହାଇସ୍କୁଲ୍ ଏବଂ ପ୍ରାଥମିକ ବିଦ୍ୟାଳୟ ନିକଟରେ ନିଶାଦ୍ରବ୍ୟ ବିକ୍ରି କରାଯାଉଛି । କେବଳ ସ୍କୁଲ୍ ନୁହେଁ, ବିଜେବି ସ୍ୱୟଂଶାସିତ ମହାବିଦ୍ୟାଳୟ ସମ୍ମୁଖ ଏବଂ ଏହାର ଚାରିପଟେ ଛତୁ ଫୁଟିଲା ଭଳି ଦୋକାନ ରହିଛି । ମହର୍ଷି କଲେଜ ନିକଟରେ ମଧ୍ୟ ନିଶାଦ୍ରବ୍ୟ ବିକ୍ରି ହେଉଛି । ସେହିପରି ରମାଦେବୀ ମହିଳା ବିଶ୍ୱବିଦ୍ୟାଳୟ ନିକଟରେ ୫ରୁ ଅଧିକ ଦୋକାନ ରହିଛି । ଉତ୍କଳ ବିଶ୍ୱବିଦ୍ୟାଳୟ ଫାଟକ ପାଖରେ ନିଶାଦ୍ରବ୍ୟ ବିକ୍ରି ହେଉଥିବା ବେଳେ କ୍ୟାମ୍ପସ ଭିତରେ ସିଗାରେଟ୍, ଗୁଟ୍ଖା ଖୋଲାରେ ବିକ୍ରି ଚାଲିଛି । ଅନେକ ସମୟରେ ଲୁଚାଇ ମଦ ଓ ଗଞ୍ଜେଇ ବିକ୍ରି କରାଯାଉଛି । କେବଳ ରାଜଧାନୀ ନୁହେଁ, ରାଜ୍ୟସାରା ସମାନ ଅବସ୍ଥା ।
ଶିକ୍ଷାନୁଷ୍ଠାନ କର୍ତ୍ତୃପକ୍ଷ ଏସବୁ ଦେଖୁଥିଲେ ମଧ୍ୟ ଚୁପ୍ ରହୁଛନ୍ତି । କାର୍ଯ୍ୟାନୁଷ୍ଠାନ ନେବାର କ୍ଷମତା ତମାଖୁ ନିୟନ୍ତ୍ରଣ କମିଟିକୁ ଦିଆଯାଇଥିଲେ ମଧ୍ୟ କମିଟି ନିରବ । ମଝିରେ ମଝିରେ ଲୋକଦେଖାଣିଆ ଭାବେ ପୁଲିସ ଚଢ଼ଉ କରୁଛି । କେବଳ ଜରିମାନା ଆଦାୟ କରି ରହିଯାଉଛି । ଉତ୍କଳ ବିଶ୍ୱବିଦ୍ୟାଳୟର ଜଣେ ଅଧିକାରୀ କହିଛନ୍ତି, ଆମ ବିଶ୍ୱବିଦ୍ୟାଳୟରେ ରାତି ହେଲେ ନିଶାଡ଼ିଙ୍କର ଆଡ୍ଡା ଜମେ । ଦିନରେ ଖୁଲମ୍ଖୁଲ୍ଲା ସିଗାରେଟ୍ ଓ ଗୁଟ୍ଖା ବିକ୍ରି ହୁଏ । ଏସବୁ ବାରଣ କରିବ କିଏ ବୋଲି ସେ ପ୍ରଶ୍ନ କରିଛନ୍ତି? ଯଦି ବାରଣ କରୁ ତେବେ ଦୋକାନୀମାନେ ପିଲାଙ୍କୁ ଲଗାଇ ଆମକୁ ଆକ୍ରମଣ କରିବାକୁ ପଛାଉ ନାହାନ୍ତି ।
