ଦାରିଙ୍ଗବାଡି,୨/୯(ଆପ୍ର): ଦାରିଙ୍ଗବାଡି ଥାନା ଅଂଚଳର ଜଣେ  ନାବାଳିକା ଛାତ୍ରୀଙ୍କୁ ଦୁଷ୍କର୍ମ କରିବା ଅଭିଯୋଗରେ ଜଣେ ଯୁବକଙ୍କୁ ପୁଲିସ୍ ଗିରଫ କରି କୋର୍ଟ ଚାଲାଣ  କରିଛି। ଗିରଫ ଯୁବକ ଜଣଙ୍କ ହେଲେ ଦାରିଙ୍ଗବାଡି ଥାନା ଅନ୍ତର୍ଗତ ପାଙ୍ଗାଲି ଗ୍ରାମର ହର୍ମୀ ମଲିକ (୨୬) ।

ନାବାଳିକା ଜଣଙ୍କ ରବିବାର ମଧ୍ୟାହ୍ନ ୧୨ ଟା ସମୟରେ ଦାରିଙ୍ଗବାଡି ବଜାରକୁ ଡ୍ରେସ୍ କିଣିବାକୁ ଆସିଥିବା ବେଳେ ସମ୍ପର୍କୀୟ ମଉସା ହର୍ମି ମଲିକ ଅଟୋ ଧରି ପାଖକୁ ଆସି ଘରେ ଛାଡ଼ି ଦେବି ବୋଲି ଜବରଦସ୍ତ କହିଥିଲେ । ଏହା ପରେ ନାବାଳିକା ଜଣଙ୍କ ଅଟୋରେ ବସିଥିଲେ । ହେଲେ ନାବାଳିକା ଜଣଙ୍କୁ ହର୍ମୀ ଘରେ ଛାଡ଼ିବା ବଦଳରେ ପାଙ୍ଗାଲୀ ଆଡେ ନେଇ ଏକ ନିଛାଟିଆ ସ୍ଥାନରେ ଦୁଷ୍କର୍ମ କରିଥିଲେ । ଏହାପରେ କାହାରିକୁ ନ କହିବାକୁ ଧମକ ମଧ୍ୟ ଦେଇଥିଲେ । ଯଦି କାହାରିକୁ ଘଟଣା ସମ୍ପର୍କ ରେ କହିବ ତାହାଲେ ହତ୍ୟା କରିବି ବୋଲି କହି ନାବାଳିକା ଘର ପାଖରେ ଆଣି ଅଟୋ ରେ ଛାଡ଼ି ଦେଇ ଚାଲି ଯାଇଥିଲା । ଏହା ପରେ ନାବାଳିକା ଜଣଙ୍କ ସେ ତାଙ୍କ ମାଇଁ, ମାମୁଁ, ଆଇଙ୍କୁ ଘଟଣା ସମ୍ପର୍କରେ ଜଣାଇବା ସହ ଦାରିଙ୍ଗବାଡି ଥାନାରେ ଏତଲା ଦେଇଥିଲେ । ପୁଲିସ୍ ଅଭିଯୋଗ ପାଇବା ପରେ  ହର୍ମି ମଲିକଙ୍କୁ ଗିରଫ କରିଥିଲା । ନାବାଳିକା ଜଣଙ୍କ ଅଷ୍ଟମ ଶ୍ରେଣୀରେ ପଢ଼ୁଥିବା ଜଣା ପଡ଼ିଛି ।