ନୂଆଦିଲ୍ଲୀ: ୟୁକ୍ରେନ୍କୁ ଧ୍ବଂସ କରିବାକୁ ଚାହୁଁଥିବା ଋଷିଆକୁ ଏବେ ଯୁଦ୍ଧ ଫେରିଛି । ଏନେଇ ଶନିବାର ୟୁକ୍ରେନ୍ର ସ୍ବାଧୀନତା ଦିବସ ଅବସରରେ କହିଛନ୍ତି ରାଷ୍ଟ୍ରପତି ଭୋଲଦିମିର ଜେଲେନସ୍କି । ସୋଭିଏତ ସଂଘରୁ ଅଲଗା ହୋଇ ୧୯୯୧ ଆଜିର ଦିନରେ ସ୍ବାଧୀନ ରାଷ୍ଟ୍ର ଭାବରେ ଆତ୍ମପ୍ରକାଶ କରିଥିଲା ୟୁକ୍ରେନ୍ । କିନ୍ତୁ ଏବେ ଋଷ ସହ ଯୁଦ୍ଧ ଲଢ଼ୁଛି ୟୁକ୍ରେନ୍ । ଫେବୃଆରୀ ୨୦୨୨ରେ ଆରମ୍ଭ ହୋଇଥିବା ଏହି ଯୁଦ୍ଧରେ ଏବେ ଋଷିଆ ଉପରେ ଭାରୀ ପଡ଼ିଛି ୟୁକ୍ରେନ୍ ।
ୟୁକ୍ରେନ୍ ସେନା ଋଷର କୁର୍ସକ୍ରେ ସ୍ଥିତି ଜାହିର କରିଥିବା ବେଳେ ମସ୍କୋ ଆଡ଼କୁ ଅଗ୍ରସର ହେଉଛି । ସ୍ବାଧୀନତା ଦିବସ ଅବସରରେ ଜେଲେନସ୍କି ଏକ ରେକର୍ଡେଡ୍ ଭିଡିଓ ସେୟାର କରିଛନ୍ତି । ଏହାକୁ ସେ ଗତ ସପ୍ତାହରେ ସୁମି ଅଞ୍ଚଳରୁ ସୁଟ୍ କରିଥିବା କୁହାଯାଉଛି । ସେ କହିଛନ୍ତି, ଏହା ହେଉଛି ସେହି ସ୍ଥାନ ଯେଉଁଠୁ ୟୁକ୍ରେନ୍ ସେନା ଅଗଷ୍ଟ ୬ରେ ଋଷ ସୀମାରେ ପ୍ରବେଶ କରିଥିଲା । କିଭ୍ ପୁଣି ଥରେ ସମସ୍ତଙ୍କୁ ଚକିତ କରିଛି। ଏବେ ଋଷିଆ ଜାଣିପାରିବ ପ୍ରତିଶୋଧ କଣ ।
ସେ ଆହୁରି କହିଛନ୍ତି ଯେ, ୨୦୨୨ରେ ଯୁଦ୍ଧ ଆରମ୍ଭ କରି ଋଷିଆ ଭାବିଥିଲା ଆମକୁ ଧ୍ବଂସ କରିଦେବ । କିନ୍ତୁ ଆମେ ଆଜି ୩୩ତମ ସ୍ବାଧୀନତା ଦିବସ ପାଳନ କରୁଛୁ । ଦିନେ ଶତ୍ରୁ ଆମ ଦେଶକୁ ଯାହା ଆଣିଥିଲେ ଏବେ ତାଙ୍କ ପାଖକୁ ଫେରିଛି ବୋଲି ଜେଲେନସ୍କି କହିଛନ୍ତି । ଏହା ସହ ପୁଟିନଙ୍କୁ ରୋଗ୍ଣ ବୃଦ୍ଧ ବ୍ୟକ୍ତି ବୋଲି ସେ କହିଛନ୍ତି । ଅନ୍ୟପଟେ ଜେଲେନସ୍କି ଆଜି ମସ୍କୋ ସଂପର୍କିତ ରୂଢ଼ିବାଦୀ ଚର୍ଚ୍ଚଗୁଡ଼ିକୁ ବନ୍ଦ କରିବା ଲାଗି ନୂଆ ଆୟନ ଲାଗୁ କରିଛନ୍ତି । କିଭ୍ର ଏଭଳି ନିଷ୍ପତ୍ତିକୁ କଡ଼ା ଭାଷାରେ ବିରୋଧ କରିଛି ମସ୍କୋ ।
